Asian Markets Today: એશિયન બજારોમાં મિશ્ર વલણ, ફેડ પોલિસી પર રોકાણકારોની નજર

Asian Markets Today: આજે વૈશ્વિક બજારોમાંથી મિશ્ર સંકેતો મળી રહ્યા છે. અમેરિકાના વોલ સ્ટ્રીટમાં રાતોરાત જોવા મળેલા ઉતાર-ચઢાવ બાદ બુધવારે એશિયન બજારોમાં થોડી નરમાશ જોવા મળી હતી. હાલમાં દુનિયાભરના રોકાણકારોની નજર અમેરિકન ફેડરલ રિઝર્વના નવા ચેરમેન કેવિન વોર્શની પ્રથમ પોલિસીના પરિણામો પર ટકેલી છે. આ અપેક્ષા વચ્ચે ડોલર ઇન્ડેક્સ 100 ની નીચે આવી ગયો છે અને બોન્ડ યીલ્ડ 4.3 ટકા પર ટકી છે.

ગિફ્ટ નિફ્ટી અને ભારતીય બજારના સંકેતો

ભારતીય શેરબજાર માટે સવારના સંકેતો ફ્લેટથી લઈને સહેજ પોઝિટિવ જોવા મળ્યા છે. ગિફ્ટ નિફ્ટી 24,032 ના લેવલ પર ટ્રેડ કરી રહ્યો હતો, જે નિફ્ટી ફ્યુચર્સના અગાઉના બંધ કરતા લગભગ 31 પોઈન્ટનું પ્રીમિયમ દર્શાવે છે.

FIIs દ્વારા કેશ માર્કેટમાં હળવી વેચવાલી કરવામાં આવી છે. જોકે, ઇન્ડેક્સ ફ્યુચર્સમાં 13,500 થી વધુ શોર્ટ કોન્ટ્રાક્ટ્સ કવર થયા છે અને લોંગ-શોર્ટ રેશિયો પણ 13% ની આસપાસ પહોંચી ગયો છે.

વોલ સ્ટ્રીટના મિશ્ર વલણની અસર એશિયા પર દેખાઈ છે. જાપાનનો નિક્કેઈ 225 ઈન્ડેક્સ 0.20% ઘટ્યો છે, જ્યારે તેનો ટોપિક્સ ઈન્ડેક્સ 0.46% વધ્યો છે. દક્ષિણ કોરિયાના કોસ્પીમાં 1.02% નો ઘટાડો નોંધાયો છે અને કોસડેક પણ થોડો ગગડ્યો છે. જોકે, હોંગકોંગના હેંગ સેંગ ઈન્ડેક્સ ફ્યુચર્સે બજારમાં ઉછાળા સાથે ખૂલવાના સંકેત આપ્યા છે.

વોલ સ્ટ્રીટ: ટેક શેરોમાં ભારે વેચવાલી, ડાઉ જોન્સ નવી ટોચે

મંગળવારે US શેરબજારમાં ટેક્નોલોજી શેરોમાં ભારે દબાણ જોવા મળ્યું હતું, પરંતુ બ્લુ-ચિપ શેરોમાં તેજી રહી હતી.ડાઉ જોન્સ ઇન્ડસ્ટ્રિયલ એવરેજ 328.64 પોઈન્ટ (0.64%) ઉછળીને 51,999.67 ની નવી વિક્રમી સપાટીએ બંધ થયો હતો. જ્યારે ટેક આધારિત S&P 500 ઈન્ડેક્સ 42.94 પોઈન્ટ (0.57%) ઘટીને 7,511.35 પર અને નેસ્ડેક 307.60 પોઈન્ટ (1.15%) તૂટીને 26,376.34 પર બંધ થયા હતા. મુખ્ય શેરોની ચાલ: ઇન્ટેલના શેરમાં 8.45%, AMD માં 7.30%, માઇક્રોન ટેક્નોલોજીમાં 6.18%, બ્રોડકોમમાં 4.37% અને એનવિડિયા (Nvidia) માં 2.37% નો મોટો ઘટાડો નોંધાયો હતો. આલ્ફાબેટ (1.09%) અને એપલ (0.95%) ના શેર વધ્યા હતા.

US-ઈરાન શાંતિ કરારની મોટી અસર

બ્લૂમબર્ગના એક તાજેતરના રિપોર્ટ મુજબ, અમેરિકા અને ઈરાન વચ્ચે શાંતિ કરાર ફાઈનલ થવાની તૈયારીમાં છે. આ ડીલ મુજબ ઈરાનને ઘણા મોટા આર્થિક ફાયદા થશે. જેમાં ઈરાનને તાત્કાલિક તેલ વેચવાનો અધિકાર, $300 બિલિયનના ડેવલપમેન્ટ ફંડનો ઉપયોગ કરવાની છૂટ અને ફ્રીઝ કરાયેલી સંપત્તિઓ પાછી મળવાનો સમાવેશ થાય છે.

જાપાનમાં વેપાર ખાધ ઘટી

મે મહિનામાં જાપાનની નિકામાં વાર્ષિક ધોરણે 17% નો વધારો થયો છે, જે બજારના 16.2% ના અનુમાન કરતા ઘણો સારો છે. આયાત પણ 12.5% વધી છે. પરિણામે, મે મહિનામાં જાપાનની વેપાર ખાધ 378.7 બિલિયન યેન ($2.36 બિલિયન) રહી છે, જે 564.6 બિલિયન યેનના અંદાજ કરતા ઘણી ઓછી છે.

કોમોડિટી અને કરન્સી માર્કેટ અપડેટ્સ

સોનામાં ચમકારો: મોંઘવારીની ચિંતા ઘટતા સોનામાં સળંગ પાંચમા સેશનમાં તેજી જોવા મળી છે. સ્પોટ ગોલ્ડ 0.4% વધીને $4,348.93 પ્રતિ ઔંસ અને US ગોલ્ડ ફ્યુચર્સ 0.3% વધીને $4,368.40 પર પહોંચી ગયું છે. ચાંદી પણ 0.4% વધીને $70.47 પ્રતિ ઔંસ થઈ છે.

ક્રૂડ ઓઈલમાં ઉછાળો: ઈરાન શાંતિ કરાર અને હોર્મુઝ સ્ટ્રેટ ફરી ખુલવાની આશાએ ક્રૂડમાં તેજી આવી છે. બ્રેન્ટ ક્રૂડ 0.49% વધીને $79.35 પ્રતિ બેરલ અને US WTI ક્રૂડ 0.51% ના વધારા સાથે $76.44 પ્રતિ બેરલ પર ટ્રેડ થઈ રહ્યું છે.

કરન્સી બજાર: ફેડરલ રિઝર્વના નિર્ણય પહેલા ડોલરમાં નરમાઈ આવી છે અને ડોલર ઇન્ડેક્સ 99.53 પર છે. યુરો $1.1611 પર અને બ્રિટિશ પાઉન્ડ $1.3430 પર ટ્રેડ થઈ રહ્યો છે. જ્યારે જાપાનીઝ યેન 160.43 પ્રતિ ડોલર પર જોવા મળ્યો છે.

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.