Closing Bell: યુદ્ધવિરામની ચિંતાએ બજારનો ખેલ બગાડ્યો, સેન્સેક્સ 931 પોઈન્ટ તૂટ્યો, નિફ્ટી 23800 નીચે બંધ

Closing Bell: ભારતીય શેરબજારમાં છેલ્લા 5 દિવસથી ચાલી રહેલી શાનદાર તેજી પર આજે, 9 એપ્રિલે બ્રેક લાગી ગઈ છે. મધ્ય-પૂર્વમાં યુદ્ધવિરામ અંગેની નવી ચિંતાઓને કારણે બજારમાં વેચવાલીનું દબાણ જોવા મળ્યું અને રોકાણકારોએ મોટાપાયે પ્રોફિટ બુકિંગ કર્યું. પરિણામે, બજાર દિવસભર લાલ નિશાનમાં રહ્યું અને મોટા ઘટાડા સાથે બંધ થયું.

આજના કારોબારના અંતે, BSE સેન્સેક્સ 931.25 પોઈન્ટ (1.20%) ના મોટા ઘટાડા સાથે 76,631.65 ના સ્તરે બંધ થયો. તેવી જ રીતે, NSE નિફ્ટી 222.25 પોઈન્ટ (0.93%) તૂટીને 23,775.10 ના સ્તરે બંધ થયો, જે 23,800 ના મહત્વના મનોવૈજ્ઞાનિક સ્તરની નીચે છે.

કયા સેક્ટરમાં મંદી, ક્યાં તેજી?

આજના ઘટાડાની આગેવાની બેન્કિંગ અને ઓઈલ-ગેસ સેક્ટરે કરી હતી. સેક્ટોરલ ફ્રન્ટ પર નજર કરીએ તો ઓઈલ એન્ડ ગેસ, PSU બેન્ક, ઈન્ફ્રા, કન્ઝ્યુમર ડ્યુરેબલ્સ અને પ્રાઈવેટ બેન્ક સેક્ટરમાં 0.4% થી 2% સુધીનો ઘટાડો જોવા મળ્યો.

નિફ્ટીના ટોપ લૂઝર્સ અને ગેનર્સ

આજના ઘટાડામાં મોટાભાગના હેવીવેઇટ શેર્સમાં વેચવાલી જોવા મળી હતી.

લૂઝર્સ (ઘટનારા શેર): L&T, ઈન્ટરગ્લોબ એવીએશન (Indigo), HDFC બેન્ક, શ્રીરામ ફાઇનાન્સ અને જિયો ફાઇનાન્સિયલના શેર નિફ્ટી પર સૌથી વધુ તૂટ્યા હતા.

ગેનર્સ (વધનારા શેર): બજારની વિપરીત દિશામાં, ડો. રેડ્ડીઝ લેબ્સ, હિન્ડાલ્કો, બજાજ ઓટો, ભારત ઇલેક્ટ્રોનિક્સ અને ONGC જેવા શેરોમાં તેજી જોવા મળી.

બીજી તરફ, નિફ્ટી મિડકેપ અને સ્મોલકેપ ઈન્ડેક્સ લગભગ સપાટ સ્તરે બંધ થયા, જે દર્શાવે છે કે ઘટાડાની અસર મુખ્યત્વે મોટા શેરો પર વધુ હતી.

આ પણ વાંચો-શેરબજારમાં ભૂકંપ: 5 દિવસની તેજી પર બ્રેક, સેન્સેક્સ 1200 પોઈન્ટ તૂટ્યો, જાણો 8 મોટા કારણો