Share Market : સેન્સેક્સ 430 પોઈન્ટ તૂટ્યો અને નિફ્ટી 23300ની નીચે ખાબક્યો, રૂપિયામાં પણ ઘટાડો

Share Market : ભારતીય શેરબજારમાં મંગળવારે કારોબારની શરૂઆત ભારે ઘટાડા સાથે થઈ છે. મિડલ ઈસ્ટ દેશોમાં ચાલી રહેલા તણાવ અને આંતરરાષ્ટ્રીય સ્તરે ક્રૂડ ઓઈલના વધતા ભાવને કારણે ગ્લોબલ માર્કેટનું સેન્ટિમેન્ટ બગડ્યું છે, જેની સીધી અસર આજે ભારતીય ઇક્વિટી માર્કેટ પર જોવા મળી રહી છે.

સેન્સેક્સ અને નિફ્ટીની હાલની સ્થિતિ

આજે બજાર ખુલતાની સાથે જ લાલ નિશાનમાં સરકી ગયું હતું. સેન્સેક્સ બોમ્બે સ્ટોક એક્સચેન્જનો ઇન્ડેક્સ સેન્સેક્સ 439.28 પોઈન્ટ એટલે કે 0.58% ના મોટા ઘટાડા સાથે 73,838.04 ના સ્તર પર કારોબાર કરી રહ્યો છે.

નિફ્ટી નેશનલ સ્ટોક એક્સચેન્જનો ઇન્ડેક્સ નિફ્ટી પણ 132.85 પોઈન્ટ એટલે કે 0.58% તૂટીને 23,243.90 ના લેવલ પર આવી ગયો છે.આ શેરબજારના કડાકાની સાથે સાથે ભારતીય રૂપિયામાં પણ આજે ઘટાડો નોંધાયો છે.

આજે સવારે ગિફ્ટ નિફ્ટી પણ 23,312 ના લેવલ આસપાસ ટ્રેડ કરી રહ્યો હતો. આ નિફ્ટી ફ્યુચર્સના અગાઉના ક્લોઝિંગ કરતાં લગભગ 150 પોઈન્ટ નીચે હતો. આ આંકડાઓએ બજાર ખુલતા પહેલા જ ભારતીય શેરબજાર માટે નેગેટિવ ઓપનિંગનો સ્પષ્ટ સંકેત આપી દીધો હતો.

કેવો રહ્યો હતો સોમવારનો કારોબાર?

આ અગાઉ સોમવારે પણ ભારતીય શેરબજાર ઘટાડા સાથે જ બંધ થયું હતું. ગઈકાલે નિફ્ટી 50 ઇન્ડેક્સ 165.15 પોઈન્ટ (0.70%) ઘટીને 23,382.60 પર બંધ રહ્યો હતો. જ્યારે સેન્સેક્સ 508.40 પોઈન્ટ (0.68%) ના કડાકા સાથે 74,267.34 પર બંધ થયો હતો.

બજાર કેમ તૂટી રહ્યું છે? સમજો ક્રૂડ ઓઈલ કનેક્શન

શેરબજારમાં આજના ઘટાડા પાછળનું સૌથી મોટું કારણ કાચું તેલ છે. લગભગ એક મહિનામાં સૌથી મોટા ઉછાળા બાદ હવે ક્રૂડ ઓઈલના ભાવ ઉચ્ચ સ્તરે સ્થિર થઈ ગયા છે. ગત સેશનમાં 4.2% ના ઉછાળા બાદ, ઓગસ્ટ ડિલિવરી માટે બ્રેન્ટ ક્રૂડનો ભાવ 95 ડોલર પ્રતિ બેરલની આસપાસ પહોંચી ગયો છે. બીજી તરફ વેસ્ટ ટેક્સાસ ઈન્ટરમીડિએટ પણ 92 ડોલર પ્રતિ બેરલની નજીક ટ્રેડ કરી રહ્યું છે.

આ પણ વાંચો-Gold Rate Today: સતત બીજા દિવસે સોનું સસ્તું થયું, જાણો દિલ્હીથી અમદાવાદ સુધી 18, 22 અને 24 કેરેટનો લેટેસ્ટ ભાવ