Asian Paints Shares: મોંઘા ક્રૂડ ઓઈલ છતાં એશિયન પેઈન્ટ્સનો શેર 3% ઉછળ્યો, ભાવ વધારાના નિર્ણયથી શેરમાં આવી ચમક

Asian Paints Shares: ઈરાન અને ઈઝરાયેલ વચ્ચે ચાલી રહેલા તણાવને કારણે આંતરરાષ્ટ્રીય બજારમાં કાચા તેલ (Crude Oil) ના ભાવ વધી રહ્યા છે અને બીજી તરફ રૂપિયો નબળો પડી રહ્યો છે. સામાન્ય રીતે જ્યારે પણ ક્રૂડ ઓઈલ મોંઘું થાય ત્યારે પેઈન્ટ કંપનીઓના ખર્ચમાં વધારો થાય છે અને તેમના શેર ગગડે છે. પરંતુ, આ નકારાત્મક સંકેતો છતાં દેશની સૌથી મોટી પેઈન્ટ કંપની એશિયન પેઈન્ટ્સ (Asian Paints) ના શેરમાં આજે 2% થી વધુનો ઉછાળો જોવા મળ્યો છે.

જાણો શું છે આ તેજી પાછળનું કારણ અને કંપનીએ ભાવમાં કેટલો વધારો કર્યો છે.

ભાવ વધારાથી શેરની ચમક વધી

કાચા તેલમાં તેજી આવતા કંપનીના નફા પર અસર પડવાની આશંકા હતી, પરંતુ એશિયન પેઈન્ટ્સે સ્માર્ટ ચાલ ચાલતા બીજી વખત ભાવ વધારો (Price Hike) ઝીંક્યો છે. આ સમાચાર આવતા જ શેરબજારમાં કંપનીના શેરને મોટો સપોર્ટ મળ્યો. ઇન્ટ્રા-ડે ટ્રેડિંગ દરમિયાન એશિયન પેઈન્ટ્સનો શેર 2.10% ઉછળીને 2515.20 રૂપિયાના સ્તરે પહોંચી ગયો હતો.

પેઈન્ટ બનાવતી કંપનીઓ માટે કાચું તેલ ખૂબ જ મહત્વનું છે. કંપનીના કુલ કાચા માલના ખર્ચમાં ક્રૂડ ઓઈલ અને તેની સાથે જોડાયેલી પ્રોડક્ટ્સનો હિસ્સો અંદાજે 35-40% જેટલો હોય છે. તેથી ક્રૂડના ભાવ વધે એટલે કંપનીનો ખર્ચ વધે અને નફો ઘટે. હાલમાં ટાઇટેનિયમ ઓક્સાઇડના ભાવ સ્થિર છે, પરંતુ પેકેજિંગ અને લોજિસ્ટિક્સ પાછળનો ખર્ચ વધ્યો છે. આ બોજ ગ્રાહકો પર નાખીને કંપનીએ પોતાની પ્રોફિટેબિલિટી જાળવી રાખવાનો પ્રયાસ કર્યો છે.

કેટલો વધ્યો ભાવ?

બ્રોકરેજ ફર્મ નોમુરાના જણાવ્યા મુજબ, એશિયન પેઈન્ટ્સે તેના પોર્ટફોલિયોની મોટાભાગની પ્રોડક્ટ્સ પર ફરી એકવાર 3-5% ના ભાવ વધારાની જાહેરાત કરી છે. આ નવા ભાવ 5 મે થી લાગુ થશે. અત્રે ઉલ્લેખનીય છે કે, અગાઉ એપ્રિલ મહિનામાં જ કંપનીએ 6-8% નો ભાવ વધારો કર્યો હતો. સપ્લાય ચેઈનમાં આવતી અડચણો અને મોંઘા લોજિસ્ટિક્સને કારણે આ નિર્ણય લેવામાં આવ્યો છે.

શેરની એક વર્ષની ચાલ

એશિયન પેઈન્ટ્સના શેરમાં છેલ્લા એક વર્ષમાં મોટી વધઘટ જોવા મળી છે.

રેકોર્ડ હાઈ: 4 ડિસેમ્બર 2025 ના રોજ શેર 2985.50 રૂપિયાની ઉંચી સપાટીએ હતો.

રેકોર્ડ લો: ત્રણ જ મહિનામાં શેરમાં મોટો ઘટાડો થયો અને 23 માર્ચ 2026 ના રોજ તે ઘટીને 2116.00 રૂપિયાના સ્તરે પહોંચી ગયો હતો.

માર્કેટ એક્સપર્ટ્સનું માનવું છે કે ભાવ વધારા છતાં પેઈન્ટની માંગ મજબૂત રહેવાની શક્યતા છે. જો આગામી સમયમાં કાચા તેલના ભાવ સ્થિર થાય, તો કંપનીના રેવન્યુ ગ્રોથ અને માર્જિનમાં વધુ સુધારો જોવા મળી શકે છે. જોકે, સ્પર્ધાના આ યુગમાં રોકાણકારોએ સાવચેતીપૂર્વક આગળ વધવું જોઈએ.

ડિસ્ક્લેમર: અહીં આપેલી માહિતી સ્ટોક પર્ફોમન્સ પર આધારિત છે. એ નોંધવું અગત્યનું છે કે બજારમાં રોકાણ બજારના જોખમોને આધીન છે. રોકાણકાર તરીકે, પૈસાનું રોકાણ કરતા પહેલા હંમેશા નિષ્ણાતની સલાહ લો. મનીકંટ્રોલ ક્યારેય કોઈને અહીં પૈસા રોકવાની સલાહ આપતું નથી.

આ પણ વાંચો-Share Market News: શેરબજારમાં અચાનક રિકવરી, સેન્સેક્સ નીચલા સ્તરેથી 650 પોઈન્ટ ઉછળ્યો; શું છે તેજી પાછળના 4 મુખ્ય કારણો?