HDFC Bank ના શેરમાં કડાકો છતાં મ્યુચ્યુઅલ ફંડ્સની ‘બમ્પર’ ખરીદી: માર્ચમાં 17,250 કરોડના શેર ખરીદ્યા

ભારતીય શેરબજારની દિગ્ગજ ખાનગી બેંક HDFC Bank માટે છેલ્લા કેટલાક દિવસો ઉતાર-ચઢાવવાળા રહ્યા છે. બેંકના મેનેજમેન્ટમાં થયેલા ફેરફાર અને પાર્ટ-ટાઈમ ચેરમેન અતનુ ચક્રવર્તીના અચાનક રાજીનામા બાદ રોકાણકારોમાં ચિંતા વધી હતી. આ નકારાત્મક સમાચારોને કારણે માર્ચ મહિનામાં બેંકના શેરમાં મોટો ઘટાડો જોવા મળ્યો હતો. જોકે, આ ઘટાડાને મ્યુચ્યુઅલ ફંડ્સે એક મોટી તક તરીકે ઝડપી લીધી છે.

માર્ચ મહિનામાં મ્યુચ્યુઅલ ફંડ્સની મોટી એન્ટ્રી

જ્યારે સામાન્ય રોકાણકારો ગભરાઈને HDFC Bank ના શેર વેચી રહ્યા હતા, ત્યારે દેશના મોટા મ્યુચ્યુઅલ ફંડ હાઉસે તેમાં જંગી ખરીદી કરી છે. આંકડાઓ મુજબ, માત્ર માર્ચ મહિનામાં જ મ્યુચ્યુઅલ ફંડ્સે અંદાજે 17,250 કરોડના શેર ખરીદી લીધા છે. નોંધનીય છે કે માર્ચ મહિનામાં HDFC બેંકના શેર 17.5% થી વધુ તૂટ્યા હતા, જે માર્ચ 2020 પછીનો સૌથી મોટો માસિક ઘટાડો છે.

ટોપ-3 ખરીદદારો કોણ છે?

ICICI પ્રુડેન્શિયલ મ્યુચ્યુઅલ ફંડ: સૌથી વધુ ખરીદી કરીને તેમણે 5,073 કરોડના નવા શેર ઉમેર્યા છે.

SBI મ્યુચ્યુઅલ ફંડ: બીજા નંબરે રહીને તેમણે 2,706 કરોડનું રોકાણ કર્યું છે.

નિપ્પોન ઇન્ડિયા મ્યુચ્યુઅલ ફંડ: તેમણે પણ 2,145 કરોડના શેરની ખરીદી કરી છે.

આ ઉપરાંત પરાગ પારેખ ફ્લેક્સી કેપ ફંડ (2,037 કરોડ), UTI, ટાટા અને એડલવાઈસ જેવા ફંડ્સે પણ આ ઘટાડાનો લાભ ઉઠાવ્યો છે.

વિદેશી રોકાણકારોએ વેચ્યા, તો દેશી રોકાણકારોએ ખરીદ્યા

શેરહોલ્ડિંગ પેટર્ન પર નજર કરીએ તો, વિદેશી રોકાણકારો (FII) એ સતત ત્રીજા મહિને બેંકમાં પોતાનો હિસ્સો ઘટાડ્યો છે. ડિસેમ્બર 2025 માં તેમની ભાગીદારી 47.67% હતી, જે માર્ચ 2026 ના અંતે ઘટીને 44.05% થઈ ગઈ છે. તેની સામે ઘરેલું સંસ્થાગત રોકાણકારો (DII) અને મ્યુચ્યુઅલ ફંડ્સનો હિસ્સો વધ્યો છે. મ્યુચ્યુઅલ ફંડ્સે માર્ચ ક્વાર્ટરમાં જ 28,293 કરોડની કુલ ખરીદી કરી છે.

નિષ્ણાતોનું શું કહેવું છે?

બ્રોકરેજ ફર્મ જેએમ ફાઇનાન્શિયલ (JM Financial) ના જણાવ્યા અનુસાર, ટૂંકા ગાળામાં શેર પર થોડું દબાણ રહી શકે છે કારણ કે રોકાણકારો મેનેજમેન્ટની સ્થિરતાને લઈને વધુ સ્પષ્ટતા ઈચ્છે છે. જોકે, બેંકનું વેલ્યુએશન અત્યારે ઘણું આકર્ષક છે અને તેની ફ્રેન્ચાઈઝી ઘણી મજબૂત છે. તેથી, લાંબા ગાળા માટે આ લેવલ પર રોકાણ કરવું ફાયદાકારક સાબિત થઈ શકે છે.

ડિસ્ક્લેમર: અહીં આપેલી માહિતી બ્રોકરેજ ફર્મના રિપોર્ટ પર આધારિત છે. શેરબજારમાં રોકાણ જોખમોને આધીન હોય છે. કોઈપણ રોકાણનો નિર્ણય લેતા પહેલા, કૃપા કરીને સર્ટિફાઇડ નિષ્ણાત અથવા તમારા નાણાકીય સલાહકારની મદદ લો. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.

આ પણ વાંચો-Market outlook : મજબૂત વધારા સાથે બજાર બંધ, સેન્સેક્સ 1,263 પોઈન્ટ ઉછળ્યો, જાણો 16 એપ્રિલે કેવી રહેશે માર્કેટની ચાલ