Diwali Muhurat Trading: મુહૂર્ત ટ્રેડિંગની તારીખ અને સમય જાહેર, જાણો આ પરંપરાનું મહત્વ

Diwali Muhurat Trading: દિવાળીનો તહેવાર નજીક આવી રહ્યો છે અને શેર માર્કેટમાં રોકાણકારોમાં ઉત્સાહનો માહોલ છે. દર વર્ષની જેમ આ વખતે પણ નેશનલ સ્ટોક એક્સચેન્જ (NSE) દ્વારા દિવાળી 2025ના અવસરે મુહૂર્ત ટ્રેડિંગની તારીખ અને સમયની જાહેરાત કરવામાં આવી છે. આ ખાસ એક કલાકનો ટ્રેડિંગ સેશન રોકાણકારો માટે શુભ અને સમૃદ્ધિનું પ્રતીક માનવામાં આવે છે.

મુહૂર્ત ટ્રેડિંગની વિગતો

NSEના તાજેતરના સર્ક્યુલર મુજબ, દિવાળી 2025ના ઉપલક્ષ્યમાં મુહૂર્ત ટ્રેડિંગ 21 ઓક્ટોબર, મંગળવારે યોજાશે. આ ખાસ સેશન બપોરે 1:45થી 2:45 દરમિયાન એક કલાક માટે ચાલશે. આ સાથે, 15 મિનિટનો પ્રી-ઓપનિંગ સેશન બપોરે 1:30થી શરૂ થશે, જે રોકાણકારોને ટ્રેડિંગની તૈયારી માટે સમય આપશે. ટ્રેડ મોડિફિકેશનનો સમય બપોરે 2:55 સુધી રહેશે.

આ દિવસે શેર માર્કેટમાં દિવાળી લક્ષ્મી પૂજનના કારણે આખો દિવસ હોલિડે રહેશે, અને તે પછીના દિવસે 22 ઓક્ટોબરે દિવાળી બલિપ્રતિપદાના અવસરે પણ સંપૂર્ણ રજા જાહેર કરવામાં આવી છે.

મુહૂર્ત ટ્રેડિંગ એ શેર માર્કેટની દાયકાઓ જૂની પરંપરા છે, જે નવા નાણાકીય વર્ષની શરૂઆત અને દિવાળીના શુભ અવસર સાથે જોડાયેલી છે. આ એક કલાકના સેશનમાં રોકાણકારો નાના પાયે રોકાણ કરીને પરંપરાને જાળવી રાખે છે. એવું માનવામાં આવે છે કે આ દિવસે કરેલું રોકાણ સમૃદ્ધિ લાવે છે અને આખા વર્ષ દરમિયાન નાણાકીય લાભ આપે છે. આ ટ્રેડિંગ ઇક્વિટી, ફ્યુચર એન્ડ ઓપ્શન, કરન્સી અને કોમોડિટી માર્કેટમાં થાય છે.

ક્યારે શરૂ થઈ આ પરંપરા?

મુહૂર્ત ટ્રેડિંગની શરૂઆત બોમ્બે સ્ટોક એક્સચેન્જ (BSE)માં 1957માં અને NSEમાં 1992માં થઈ હતી. એક્સપર્ટ્સનું માનવું છે કે આ પરંપરા આધ્યાત્મિક વિશ્વાસ અને ફાઇનાન્શિયલ સ્ટ્રેટેજીનું સંગમ છે. મોટાભાગના રોકાણકારો આ દિવસે પ્રતીકાત્મક રીતે નાનું રોકાણ કરે છે, જે લાંબા ગાળાના નફા માટે હોય છે.

લાંબા ગાળાનું રોકાણ

મુહૂર્ત ટ્રેડિંગ દરમિયાન રોકાણકારો અને બ્રોકર્સ મૂલ્ય-આધારિત સ્ટોક્સ પર ધ્યાન કેન્દ્રિત કરે છે, જે લોન્ગ-ટર્મ રોકાણ માટે યોગ્ય હોય છે. આ શેર્સ ઘણીવાર આગામી પેઢીઓ સુધી ટકી રહે તેવા હોય છે. દિવાળીનો દિવસ નવું કામ શરૂ કરવા માટે શુભ માનવામાં આવે છે, તેથી ઘણા નવા રોકાણકારો આ દિવસે શેર માર્કેટમાં પોતાનું પ્રથમ રોકાણ શરૂ કરે છે.

ડિસ્ક્લેમર: શેર માર્કેટમાં કોઈપણ પ્રકારનું રોકાણ કરતા પહેલાં માર્કેટ એક્સપર્ટની સલાહ લેવી જરૂરી છે.