FPI Investment: શેર બજારમાં વિદેશી રોકાણકારોની શાનદાર વાપસી, ઓગસ્ટ મહિનામાં ઠાલવ્યા 23544 કરોડ

FPI Investment: ભારતીય શેર બજારમાં રોકાણ કરતા લોકો માટે એક સારા અને ઉત્સાહજનક સમાચાર સામે આવ્યા છે. ભારતીય બજારમાંથી સતત પૈસા પાછા ખેંચી રહેલા વિદેશી પોર્ટફોલિયો રોકાણકારો હવે ફરી એકવાર ભારતીય શેરો તરફ આકર્ષાયા છે. ઓગસ્ટ મહિનામાં વિદેશી રોકાણકારોએ બજારમાં પોતાની ખરીદી ખૂબ જ તેજ કરી દીધી છે.

ઓગસ્ટ અને જુલાઈમાં વિદેશી રોકાણકારોની જંગી ખરીદી

લેટેસ્ટ આંકડાઓ મુજબ, FPI એ ઓગસ્ટ મહિનામાં અત્યાર સુધીમાં ભારતીય શેર બજારમાં 23544 કરોડનું મોટું રોકાણ કર્યું છે. આ અગાઉ જુલાઈ મહિનામાં પણ વિદેશી રોકાણકારોએ 20200 કરોડ રૂપિયા ભારતીય શેરોમાં ઠાલવ્યા હતા. નોંધનીય છે કે, જુલાઈ પહેલા સતત 4 મહિના સુધી વિદેશી રોકાણકારોએ બજારમાં ભારે વેચવાલી કરી હતી.

સેન્ટ્રલ ડિપોઝિટરી સર્વિસીસના લેટેસ્ટ આંકડાઓ

મે: 32963 કરોડની વેચવાલી

એપ્રિલ: 60847 કરોડની વેચવાલી

માર્ચ: રેકોર્ડ 1.17 લાખ કરોડની વેચવાલી

ફેબ્રુઆરી: જોકે, વર્ષની શરૂઆતમાં ફેબ્રુઆરીમાં તેમણે 22615 કરોડનું રોકાણ કર્યું હતું.

વર્ષ 2026 અને 2025 ના આંકડા શું કહે છે?

ભલે અત્યારે ઓગસ્ટમાં ખરીદી જોવા મળી રહી છે, પરંતુ ઓવરઓલ આંકડા જોઈએ તો વર્ષ 2026 માં અત્યાર સુધીમાં વિદેશી રોકાણકારોએ ભારતીય બજારમાંથી અંદાજે 2,30,000 કરોડના શેર વેચ્યા છે. જ્યારે અગાઉના વર્ષ 2025 ની વાત કરીએ તો, ત્યારે પણ તેમણે 1.66 લાખ કરોડની જંગી વેચવાલી કરી હતી.

એક્સપર્ટ્સ શું કહે છે? શા માટે પાછા ફર્યા વિદેશી રોકાણકારો?

જીઓજિત ઇન્વેસ્ટમેન્ટ્સના ચીફ ઇન્વેસ્ટમેન્ટ સ્ટ્રેટેજિસ્ટ વી. કે. વિજયકુમાર જણાવે છે કે, ભારતીય બજારમાં FPI ની વાપસી પાછળ મુખ્ય ત્રણ કારણો છે.

ભારતીય કંપનીઓના જૂન ક્વાર્ટરના શાનદાર પરિણામો

રૂપિયા ની સ્થિરતા

ભારતીય બજારમાં કંપનીઓના ગ્રોથની ઉજ્જવળ સંભાવનાઓ

એક રસપ્રદ વાત એ છે કે, વિદેશી રોકાણકારો અત્યારે આકર્ષક વેલ્યુએશન હોવા છતાં મોટી બેન્કિંગ અને IT કંપનીઓના શેરોમાં વધારે ખરીદી નથી કરી રહ્યા. તેના બદલે, તેઓ ઊંચા વેલ્યુએશન છતાં પસંદગીની મિડકેપ (મધ્યમ કદની) કંપનીઓમાં પોતાના પૈસા લગાવી રહ્યા છે.

આગળ બજારની ચાલ કેવી રહેશે?

બજારના જાણકારોનું માનવું છે કે, આવનારા સમયમાં માર્કેટની દિશા બે મુખ્ય પરિબળો પર આધાર રાખશે. પહેલું, આંતરરાષ્ટ્રીય બજારમાં કાચા તેલની કિંમતો અને બીજું, અમેરિકા અને ઈરાન વચ્ચે ચાલી રહેલો ભૌગોલિક-રાજકીય તણાવ. આ ઉપરાંત, વિદેશી રોકાણકારો માત્ર શેર બજાર જ નહીં, પરંતુ બોન્ડ માર્કેટમાં પણ રસ દાખવી રહ્યા છે. ઓગસ્ટ મહિનામાં તેમણે 'ફુલી એક્સેસિબલ રૂટ' હેઠળ ડેબ્ટ માર્કેટમાં 852 કરોડનું રોકાણ કર્યું છે, જ્યારે 'જનરલ રૂટ' દ્વારા 995 કરોડ પાછા ખેંચ્યા છે.

આ પણ વાંચો-NTPC Greenની સબસિડરીને લાગ્યો જેકપોટ, 500 MWની મોટી ડીલ મળી, 24 ઓગસ્ટે શેર ઉડાન ભરશે