ગ્લોબલ માર્કેટ: પુતિનના ઘર પર 91 ડ્રોનથી હુમલા બાદ બજારમાં ફફડાટ, સોનામાં ઐતિહાસિક કડાકો અને અમેરિકન બજારો તૂટ્યા

Global Markets: વૈશ્વિક બજારો માટે સપ્તાહની શરૂઆત ઘણી ઉથલ-પાથલ ભરેલી રહી છે. એક તરફ રશિયા અને યુક્રેન વચ્ચેના યુદ્ધમાં મોટી ઘટના બની છે, તો બીજી તરફ અમેરિકન બજારોમાં નફાવસૂલીના કારણે ઘટાડો નોંધાયો છે. રશિયાના રાષ્ટ્રપતિ વ્લાદિમીર પુતિનના નિવાસસ્થાન પર થયેલા ડ્રોન હુમલાના સમાચાર બાદ બજારનું સેન્ટિમેન્ટ ખરાબ થયું હોય તેવું લાગી રહ્યું છે. આ ભૌગોલિક રાજકીય તણાવ અને પ્રોફિટ બુકિંગની સીધી અસર સોના-ચાંદી અને શેરબજાર પર જોવા મળી છે.

અમેરિકન બજારોમાં નફાવસૂલી (Wall Street Update)

અમેરિકન બજારોમાં વર્ષના છેલ્લા સપ્તાહની શરૂઆત ધીમી અને ઘટાડા સાથે થઈ છે. વોલ સ્ટ્રીટ પર જોરદાર નફાવસૂલી (Profit Booking) જોવા મળી હતી, જેના કારણે મુખ્ય ઈન્ડેક્સ લાલ નિશાનમાં બંધ થયા હતા. ખાસ કરીને મોટી ટેકનોલોજી કંપનીઓના શેરોમાં, જે ગયા સપ્તાહે વધ્યા હતા, તેમાં હવે ઘટાડો જોવા મળ્યો છે. આ તેજીએ S&P 500 ઈન્ડેક્સને રેકોર્ડ ઊંચાઈ પર પહોંચાડ્યો હતો, પરંતુ ઈન્ફોર્મેશન ટેકનોલોજી સેક્ટરે દબાણ ઉભું કરતા બજાર ગગડ્યું છે. ખાસ કરીને AI અને ટેક શેરોમાં વેચવાલીનું દબાણ રહ્યું.

સ્ટોક્સ અને ઈન્ડેક્સની સ્થિતિ

સ્પેસિફિક શેરોની વાત કરીએ તો, દિગ્ગજ ચિપ મેકર કંપની Nvidia ના શેરમાં 1.2 ટકાનો ઘટાડો નોંધાયો હતો. આ ઉપરાંત Palantir Technologies ના શેરમાં પણ 2.4 ટકાનું ગાબડું પડ્યું હતું. આ મોટા શેરોમાં થયેલા ઘટાડાએ બજારના સેન્ટિમેન્ટને નબળું પાડ્યું છે.

મેટલ્સની ચમક ફીકી પડી: સોના-ચાંદીમાં મોટો કડાકો

શેરબજારની સાથે કોમોડિટી માર્કેટમાં પણ હાહાકાર મચી ગયો છે. મેટલ્સની ચમક અચાનક ઘટી ગઈ છે. સોનાના ભાવમાં 2 મહિના બાદ સૌથી મોટો ઘટાડો જોવા મળ્યો છે. સોનું તેના રેકોર્ડ હાઈ લેવલથી સીધું 200 ડોલર તૂટ્યું છે. આ ઘટાડો રોકાણકારો માટે આંચકાજનક છે.

ચાંદીની હાલત પણ ખરાબ છે. સપ્ટેમ્બર 2020 પછી ચાંદીમાં આટલો મોટો ઘટાડો જોવા મળ્યો છે. ચાંદી તેના રેકોર્ડ હાઈ લેવલથી 9 ડોલર જેટલી ઘટી છે, જે ટકાવારીની દ્રષ્ટિએ 10 ટકાથી વધુનો ઘટાડો દર્શાવે છે. અન્ય કિંમતી ધાતુઓમાં પણ મંદી છે. પ્લેટિનમ અને પેલેડિયમમાં 16 ટકાનો જંગી ઘટાડો થયો છે. પેલેડિયમમાં તો 2020 પછી એક જ દિવસમાં સૌથી મોટો ઘટાડો નોંધાયો છે. કોપરના ભાવ પણ રેકોર્ડ હાઈથી 4 ટકા નીચે ગબડ્યા છે.

પુતિનના ઘર પર ડ્રોન હુમલો અને યુદ્ધના ભણકારા

બજારના મૂડને બગાડવામાં રશિયા-યુક્રેન યુદ્ધના નવા સમાચારે મોટો ભાગ ભજવ્યો છે. રશિયાએ દાવો કર્યો છે કે યુક્રેને વ્લાદિમીર પુતિનના ઘર પર ડ્રોન હુમલો કર્યો છે. રશિયાના જણાવ્યા મુજબ, નોવગોરોડ વિસ્તારમાં આવેલા પુતિનના નિવાસસ્થાનને ટાર્ગેટ કરવા માટે એકસાથે 91 ડ્રોનનો ઉપયોગ કરવામાં આવ્યો હતો. આ ઘટના બાદ પુતિન યુક્રેન પર ભડક્યા છે.

પુતિને અમેરિકાના ચૂંટાયેલા રાષ્ટ્રપતિ ડોનાલ્ડ ટ્રમ્પ સાથે વાત કરીને આ હુમલાની જાણકારી આપી છે. રશિયાએ ચીમકી આપી છે કે આ હુમલા બાદ વાતચીતની સ્થિતિમાં બદલાવ આવશે. જોકે, યુક્રેને આ આરોપોને ફગાવી દીધા છે. યુક્રેનનું કહેવું છે કે પુતિનના ઘર પર હુમલાની વાત તદ્દન ખોટી અને રશિયાનું જુઠ્ઠાણું છે. યુક્રેને શંકા વ્યક્ત કરી છે કે રશિયા હવે યુક્રેનની સરકારી ઈમારતો પર હુમલા કરી શકે છે. આ મામલે ટ્રમ્પે પ્રતિક્રિયા આપતા કહ્યું કે, કોઈના પર હુમલો કરવો અલગ વાત છે, પરંતુ કોઈના ઘર પર હુમલો કરવો એ બીજી વાત છે અને આ સમય તેના માટે યોગ્ય નથી.

ટ્રમ્પની ઈરાન અને હમાસને ખુલ્લી ચેતવણી

જીઓ-પોલિટિકલ તણાવ માત્ર રશિયા સુધી સીમિત નથી. અમેરિકાના ચૂંટાયેલા રાષ્ટ્રપતિ ડોનાલ્ડ ટ્રમ્પે ઈઝરાયેલના પીએમ બેન્જામિન નેતન્યાહૂ સાથે ફ્લોરિડામાં મુલાકાત કરી છે. ટ્રમ્પે સ્પષ્ટ કહ્યું છે કે તેઓ ઈરાન પર હુમલાના સમર્થનમાં તૈયાર છે. જો ઈરાન પરમાણુ ક્ષમતાનો ફરીથી વિકાસ કરશે અથવા બેલેસ્ટિક મિસાઈલોનું ઉત્પાદન વધારશે તો હુમલો સંભવ છે.

આ ઉપરાંત, ટ્રમ્પે હમાસને પણ કડક શબ્દોમાં ચેતવણી આપી છે. તેમણે કહ્યું છે કે હમાસ પાસે હથિયાર હેઠા મૂકવા માટે હવે "બહુ ઓછો સમય" બચ્યો છે. જો તેઓ હથિયાર નહીં મૂકે તો તેમણે તેનું ગંભીર પરિણામ ભોગવવું પડશે.

ફેટ ચેરમેન જેરોમ પોવેલ ટ્રમ્પના નિશાના પર

અમેરિકાની આર્થિક નીતિઓ નક્કી કરતા યુએસ ફેડરલ રિઝર્વ (US Fed) ના ચેરમેન જેરોમ પોવેલ પણ હવે ટ્રમ્પના નિશાના પર આવી ગયા છે. ટ્રમ્પે સંકેત આપ્યો છે કે યોગ્ય સમયે ફેડના આગામી ચેરમેનની જાહેરાત કરવામાં આવશે. ટ્રમ્પે તો ત્યાં સુધી કહ્યું કે જેરોમ પોવેલે રાજીનામું આપી દેવું જોઈએ અથવા બની શકે કે તેમને નોકરીમાંથી કાઢી મૂકવામાં આવે. જાન્યુઆરી મહિનામાં કોઈ પણ સમયે નવા ચેરમેનની જાહેરાત થઈ શકે છે, જે બજાર માટે અનિશ્ચિતતા ઉભી કરી શકે છે.

એશિયન બજારોમાં મિશ્ર વલણ

અમેરિકાના નબળા સંકેતોની અસર એશિયન બજારોમાં મિશ્ર જોવા મળી રહી છે. ભારતીય બજારના સંકેત આપતો ગિફ્ટ નિફ્ટી (Gift Nifty) 39 પોઈન્ટ એટલે કે 0.15 ટકાની નબળાઈ સાથે 25,927 ના સ્તર પર ટ્રેડ કરી રહ્યો છે.

જાપાનનો નિક્કેઈ ઈન્ડેક્સ 0.16 ટકાના ઘટાડા સાથે કારોબાર કરી રહ્યો છે. બીજી તરફ, હોંગકોંગના હેંગસેંગમાં 0.27 ટકા અને સ્ટ્રેટ ટાઈમ્સમાં 0.34 ટકાની તેજી જોવા મળી છે. તાઈવાનનું બજાર 0.51 ટકા તૂટ્યું છે અને કોરિયાનો કોસ્પી ઈન્ડેક્સ 0.20 ટકાના ઘટાડા સાથે ટ્રેડ કરી રહ્યો છે. ચીનના શાંઘાઈ કમ્પોઝિટમાં પણ 0.06 ટકાનો સામાન્ય ઘટાડો જોવા મળી રહ્યો છે.

આ પણ વાંચો- 7th Pay Commission: 10 વર્ષમાં સરકારી કર્મચારીઓનો પગાર 55% વધ્યો, હવે 8મા પગાર પંચ પર સૌની નજર! જાણો પગારનું પૂરું ગણિત

ડિસ્ક્લેમર: Moneycontrol.com પર આપવામાં આવેલા વિચાર અને રોકાણની સલાહ રોકાણ વિશેષજ્ઞોના પોતાના અંગત વિચાર અને સલાહ હોય છે. Moneycontrol યુઝર્સને સલાહ આપે છે કે તે કોઈ રોકાણ નિર્ણય લેવાના પહેલા સર્ટિફાઈડ એક્સપર્ટથી સલાહ લો.