IndiGo share price: નવા CEOની જાહેરાત થતાં જ IndiGoના શેરમાં 9%નો જબરદસ્ત ઉછાળો, રોકાણકારોએ કરી બમ્પર ખરીદી

IndiGo share price: એવિએશન સેક્ટરની દિગ્ગજ કંપની ઇન્ડિગો (IndiGo)ની પેરેન્ટ કંપની ઈન્ટરગ્લોબ એવિએશન લિમિટેડના રોકાણકારો માટે ખુશીના સમાચાર છે. 1 એપ્રિલના રોજ શરૂઆતી કારોબારમાં કંપનીના શેરમાં 8.7 ટકાની શાનદાર તેજી જોવા મળી હતી. આ ઉછાળા સાથે BSE પર કંપનીનો શેર 4286.25 રૂપિયાના હાઈ લેવલ પર પહોંચી ગયો હતો. શેરમાં આવેલી આ બમ્પર તેજી પાછળનું મુખ્ય કારણ કંપની દ્વારા નવા CEO ની કરવામાં આવેલી જાહેરાત છે.

નવા CEO તરીકે વિલિયમ વૉલ્શની પસંદગી

ઈન્ડિગોએ એક દિવસ પહેલા જ જાહેરાત કરી છે કે ઈન્ટરનેશનલ એર ટ્રાન્સપોર્ટ એસોસિએશન (IATA)ના વર્તમાન ડિરેક્ટર જનરલ વિલિયમ વૉલ્શ તેમના નવા ચીફ એક્ઝિક્યુટિવ ઓફિસર (CEO) બનશે. વિલિયમ વૉલ્શ આ વર્ષે 3 ઓગસ્ટ અથવા તે પહેલા પોતાનો નવો કાર્યભાર સંભાળી શકે છે. IATA માં તેમનો હાલનો કાર્યકાળ 31 જુલાઈના રોજ પૂર્ણ થઈ રહ્યો છે.

અગાઉ 10 માર્ચના રોજ તત્કાલીન CEO પીટર એલ્બર્સે અચાનક પોતાના પદ પરથી રાજીનામું આપી દીધું હતું. ત્યારથી કંપનીના કો-ફાઉન્ડર અને મેનેજિંગ ડિરેક્ટર રાહુલ ભાટિયા એરલાઈનના કામકાજની કમાન સંભાળી રહ્યા છે. નોંધનીય છે કે ડિસેમ્બર 2025 માં ઈન્ડિગોના ઓપરેશન્સમાં મોટા પાયે અડચણો આવી હતી.

વિલિયમ વૉલ્શ એવિએશન ઈન્ડસ્ટ્રીમાં ખૂબ જાણીતું નામ છે અને તેમને સામાન્ય રીતે 'વિલી' તરીકે ઓળખવામાં આવે છે. તેઓ અગાઉ બ્રિટિશ એરવેઝ અને ઈન્ટરનેશનલ એરલાઈન્સ ગ્રુપ (IAG) ના CEO રહી ચૂક્યા છે. (IAG એક હોલ્ડિંગ કંપની છે જેની નીચે બ્રિટિશ એરવેઝ, એર લિંગસ, આઈબેરિયા, લેવલ અને વુએલિંગ જેવી એરલાઈન્સ ચાલે છે). IATA એક વૈશ્વિક સમૂહ છે જેમાં ઈન્ડિગો, એર ઈન્ડિયા, એર ઈન્ડિયા એક્સપ્રેસ અને સ્પાઈસજેટ સહિતની એરલાઈન્સ સામેલ છે. ખાસ વાત એ છે કે વૉલ્શ એવા જૂજ CEO માંથી એક છે જે પોતે એક પાયલટ પણ છે. તેઓ ઈન્ડિગોના ત્રીજા વિદેશી CEO બનશે.

શેરની સ્થિતિ અને કંપનીની વેલ્યુએશન

આ તેજી સાથે ઈન્ટરગ્લોબ એવિએશનનું માર્કેટ કેપ વધીને 1.62 લાખ કરોડ રૂપિયા થઈ ગયું છે. કંપનીના આંકડાઓ પર નજર કરીએ તો, ડિસેમ્બર 2025 ના અંત સુધી પ્રમોટર્સ પાસે કંપનીમાં 41.58 ટકા હિસ્સેદારી હતી.

જોકે, લાંબા ગાળાના પ્રદર્શનની વાત કરીએ તો છેલ્લા 6 મહિનામાં આ શેર 24 ટકા તૂટ્યો છે અને છેલ્લા 3 મહિનામાં તેમાં 16 ટકાનો ઘટાડો નોંધાયો છે. આ શેરની ફેસ વેલ્યુ 10 રૂપિયા છે. BSE પર કંપનીના શેરનો 52 સપ્તાહનો હાઈ (એડજસ્ટેડ) 6225.05 રૂપિયા રહ્યો છે, જ્યારે 52 સપ્તાહનો લો 3894.80 રૂપિયા રહ્યો છે. નવા અને અનુભવી CEO ની એન્ટ્રીથી રોકાણકારોને કંપનીના ભવિષ્ય પર મોટો ભરોસો બેઠો છે, જેની અસર શેરબજારમાં સ્પષ્ટ દેખાઈ રહી છે.

આ પણ વાંચો- શેરબજારના રોકાણકારો માટે મોટા સમાચાર! આજથી F&O સેગમેન્ટમાં 8 નવા શેરોની એન્ટ્રી, ચેક કરો લોટ સાઈઝની પૂરી લિસ્ટ

ડિસ્ક્લેમર: અહીં આપેલી માહિતી સ્ટોક પર્ફોમન્સ પર આધારિત છે. એ નોંધવું અગત્યનું છે કે બજારમાં રોકાણ બજારના જોખમોને આધીન છે. રોકાણકાર તરીકે, પૈસાનું રોકાણ કરતા પહેલા હંમેશા નિષ્ણાતની સલાહ લો. મનીકંટ્રોલ ક્યારેય કોઈને અહીં પૈસા રોકવાની સલાહ આપતું નથી.