Stock Market Today: ટ્રેડિંગ લેતા પહેલા જાણી લો આજના મોટા સમાચારો, બજાર પર દેખાશે સીધી અસર

Stock Market Today: આજે 9 જુલાઈએ ભારતીય શેરબજારમાં તેજી સાથે શરૂઆત થવાની પૂરી શક્યતા છે. વહેલી સવારે ગિફ્ટ નિફ્ટી 23,990ના સ્તરની આસપાસ ટ્રેડ કરી રહ્યો હતો, જે ભારતીય બજારો માટે શાનદાર ઓપનિંગના સંકેત આપે છે. જોકે, ગ્લોબલ માર્કેટમાં ઉથલપાથલ ચાલુ છે. ગુરુવારે ઈરાન પર અમેરિકાના નવા હુમલાઓ બાદ ક્રૂડ ઓઈલના ભાવમાં ભડકો થયો છે. આ હુમલાઓએ ઈરાન યુદ્ધ સમાપ્ત થવાની અને હોર્મુઝ સ્ટ્રેટ ફરી ખુલવાની તમામ આશાઓ પર પાણી ફેરવી દીધું છે.

ગઈકાલના બજારનો કડાકો

8 જુલાઈએ સતત બીજા દિવસે ભારતીય શેરબજારમાં મોટો કડાકો જોવા મળ્યો હતો. બપોરના સેશનમાં નિફ્ટી 24,000 ના સ્તરની નીચે સરકી ગયો હતો. અમેરિકી રાષ્ટ્રપતિ ડોનાલ્ડ ટ્રમ્પે ઈરાન સાથેના કામચલાઉ યુદ્ધવિરામને સમાપ્ત જાહેર કરતા અને કાચા તેલમાં 6% ના ઉછાળાને કારણે બજારમાં ભારે વેચવાલી જોવા મળી.

સેન્સેક્સ 1,677.12 પોઈન્ટ (2.15%) તૂટીને 76,503.60 પર બંધ થયો.નિફ્ટી 516.65 પોઈન્ટ (2.12%) ના ઘટાડા સાથે 23,882.05 પર બંધ રહ્યો. નોંધનીય છે કે, 30 માર્ચ 2026 પછી પહેલીવાર બંને ઈન્ડેક્સમાં 2-2 ટકાનો જંગી ઘટાડો નોંધાયો છે.

એશિયન બજારો: AI અને સેમિકન્ડક્ટર શેરોમાં રોકાણકારોનો રસ વધતા એશિયન બજારોમાં તેજી છે. જાપાનનો નિક્કેઈ 2.45%, કોસ્પી 1.94%, સ્ટ્રેટ ટાઈમ્સ 0.35% અને હેંગસેંગ 0.30% ના ઉછાળા સાથે ટ્રેડ થઈ રહ્યા છે. માત્ર તાઈવાનના બજારમાં 0.10% નો સામાન્ય ઘટાડો છે.

અમેરિકન બજારો: ઈરાન સાથેની યુદ્ધવિરામ સમજૂતી તૂટવાના ટ્રમ્પના નિવેદનથી અમેરિકન બજારો પર દબાણ આવ્યું હતું. S&P 500 માં 0.28% નો ઘટાડો (7,482.71 પર બંધ) અને ડાઉ જોન્સમાં 1.09% નો ઘટાડો (52,348.39 પર બંધ) નોંધાયો છે. જ્યારે ચિપ સ્ટોક બ્રોડકોમમાં તેજીના કારણે નેસ્ડેક 0.20% વધીને 25,870.65 પર પહોંચ્યો હતો.

ચલણ અને બોન્ડ યીલ્ડ

મિડલ ઈસ્ટમાં વધતા તણાવને કારણે સલામત રોકાણ તરીકે અમેરિકન ડોલરની માંગ વધી છે. ડોલર ઈન્ડેક્સ 100.98 ના મજબૂત સ્તર પર છે. બીજી તરફ US ટ્રેઝરી યીલ્ડમાં ખાસ ફેરફાર નથી થયો; 10-વર્ષની યીલ્ડ 4.57% અને 2-વર્ષની યીલ્ડ 4.20% પર સ્થિર છે. એશિયન કરન્સીમાં સાઉથ કોરિયન વૉન અને જાપાનીઝ યેનમાં મામૂલી તેજી છે, જ્યારે ફિલિપાઈન પેસો અને ઈન્ડોનેશિયન રૂપિયામાં ઘટાડો જોવા મળ્યો છે.

કોમોડિટી માર્કેટ: ક્રૂડ ઓઈલ અને ગોલ્ડ

ક્રૂડ ઓઈલ: જિયોપોલિટિકલ ટેન્શનને કારણે બ્રેન્ટ ક્રૂડ 0.56% અને WTI ક્રૂડ 0.53% ની તેજી બતાવી રહ્યા છે.

સોનું-ચાંદી: મોંઘવારી અને એનર્જીના વધતા ભાવોની ચિંતા વચ્ચે સોના-ચાંદીમાં ઘટાડો ચાલુ છે. કોમેક્સ પર સોનામાં 0.07% અને ચાંદીમાં 0.09% ની નરમાઈ જોવા મળી છે.

FII અને DII ના રોકાણના આંકડા

વિદેશી રોકાણકારોનો ભારતીય બજાર પર ભરોસો કાયમ છે. 8 જુલાઈએ વિદેશી સંસ્થાકીય રોકાણકારોએ સળંગ ચોથા સેશનમાં રૂ. 1,962 કરોડના શેર ખરીદ્યા હતા. સામે પક્ષે, સ્થાનિક સંસ્થાકીય રોકાણકારોએ પણ વેચવાલી અટકાવીને રૂ. 790 કરોડની ખરીદી કરી હતી.

આ પણ વાંચો-Stocks to Watch: સેન્સેક્સની એક્સપાયરી પર શેરબજારમાં તેજીના સંકેત! ઇન્ફોસિસ, વેદાંતા અને ઇન્ડિગો સહિત આ શેરો મચાવશે ધૂમ