FIIsની વાપસીથી બેંકિંગ અને ફાઈનાન્સ સેક્ટરને થશે સૌથી મોટો ફાયદો, આગામી 3 વર્ષમાં મળશે ડબલ ડિજિટ રિટર્ન

MF Investment: ભારતીય શેરબજાર અને મ્યુચ્યુઅલ ફંડ રોકાણકારો માટે ખૂબ જ મોટી રાહતના સંકેતો મળી રહ્યા છે. બજારના આંકડા જોઈને સ્પષ્ટ લાગી રહ્યું છે કે વિદેશી સંસ્થાકીય રોકાણકારોની ધમાકેદાર 'ઘર વાપસી' થઈ રહી છે. છેલ્લા 8 દિવસની અંદર વિદેશી રોકાણકારોએ ભારતીય બજારમાં 70,000 કરોડની બમ્પર ખરીદી કરી છે. એટલું જ નહીં, બજારમાં તેમની શોર્ટ પોઝિશન (મંદીના સોદા) પણ ખૂબ જ ઝડપથી ઓછી થઈ છે. તેમાં પણ સોનામાં સુગંધ ભળે તેમ કાચા તેલના ભાવમાં આવેલી નરમાઈ FIIs નો જોશ બમણો કરી રહી છે.

તો શું બજારના ખરાબ દિવસો પૂરા થઈ ગયા છે અને અહીંથી માર્કેટ મોટી છલાંગ લગાવવાની તૈયારી કરી રહ્યું છે? જો હા, તો રોકાણકારોએ કયા મ્યુચ્યુઅલ ફંડ્સ પર નજર રાખવી જોઈએ અને FIIs ના ફેવરિટ સેક્ટર કયા હોઈ શકે છે? આ તમામ સવાલો પર 'વિજય મંત્રી ફાઈનાન્શિયલ સર્વિસિસ'ના CEO અને ફાઉન્ડર વિજય મંત્રીએ પોતાનો ખાસ અભિપ્રાય આપ્યો છે.

FIIs ની જંગી ખરીદી: મધ્ય ઓક્ટોબરથી અત્યાર સુધીમાં FIIs એ કુલ 90,000 કરોડ ની ખરીદી કરી છે. જ્યારે છેલ્લા 9 ટ્રેડિંગ સેશનમાં જ તેમના તરફથી 78,000 કરોડ નું રોકાણ કરવામાં આવ્યું છે.

શોર્ટ કવરિંગ: માત્ર 9 દિવસમાં 1.9 લાખ શોર્ટ કોન્ટ્રાક્ટ કવર થયા છે અને હાલમાં નેટ શોર્ટ્સ ઘટીને માત્ર 50,000 રહી ગયા છે.

ઈન્ડેક્સમાં ઉછાળો: 23 ઓક્ટોબરથી બજારમાં બમ્પર તેજી છે. આ સમયગાળામાં નિફ્ટી અને બેંક નિફ્ટીમાં 11 ટકા, મિડ-સ્મોલકેપમાં 7.5 ટકા અને માઈક્રોકેપમાં 6 ટકા ની તેજી આવી છે.

સેક્ટર મુજબ રિટર્ન: આ ગાળામાં કેપિટલ માર્કેટમાં 17 ટકા, રિયલ્ટીમાં 16 ટકા, ફાઈનાન્શિયલ સર્વિસિસમાં 13 ટકા, ફાર્મામાં 12 ટકા અને ઓટો સેક્ટરમાં 12 ટકા નો શાનદાર ઉછાળો નોંધાયો છે.

FIIsના પરત ફરવાથી BFSI સેક્ટરને થશે સૌથી મોટો ફાયદો

માર્કેટ એક્સપર્ટ વિજય મંત્રીનું માનવું છે કે વિદેશી રોકાણકારોના પરત ફરવાનો સૌથી વધુ ફાયદો BFSI (બેંકિંગ, ફાઈનાન્શિયલ સર્વિસિસ અને ઈન્શ્યોરન્સ) સેક્ટરને થશે. અગાઉ FIIs એ સૌથી વધુ વેચવાલી BFSI સેક્ટરમાં જ કરી હતી, તેથી હવે બેંકિંગમાં મોટા 'ટ્રેડ રિવર્સલ' (તેજી તરફી વળાંક) ની પૂરી આશા છે. હાલમાં બેંકિંગ શેરોનું વેલ્યુએશન સસ્તું છે અને ક્રેડિટ ગ્રોથ પણ ઘણો બહેતર છે.

તેમણે આગળ જણાવ્યું કે 'ચીન+1' અને 'યુરોપ+1' થીમથી ભારતને સીધો ફાયદો થશે, જેનાથી દેશના મેન્યુફેક્ચરિંગ સેક્ટરમાં મોટી તેજીની આશા બનશે. આ ઉપરાંત ફાર્મા અને હેલ્થકેર સેક્ટર એ 'મલ્ટી ડિકેડ થીમ' (અનેક દાયકાઓ સુધી ચાલનારી થીમ) છે.

રોકાણકારોએ કયા મ્યુચ્યુઅલ ફંડ પસંદ કરવા? 3 વર્ષમાં ડબલ ડિજિટ રિટર્નની આશા

વિજય મંત્રીએ મ્યુચ્યુઅલ ફંડ રોકાણકારોને નીચે મુજબની મહત્વની સલાહ આપી છે.

હેલ્થકેર અને મલ્ટીકેપ ફંડ પસંદ કરો: રોકાણકારોએ હેલ્થકેર ફંડ પર ખાસ નજર રાખવી જોઈએ. આ ઉપરાંત તેમણે મલ્ટીકેપ ફંડ પસંદ કરવાની સલાહ આપી છે, કારણ કે મલ્ટીકેપ ફંડથી પોર્ટફોલિયોમાં બહેતર બેલેન્સ મળે છે.

25%-25% એલોકેશનનો નિયમ: તેમના મતે રોકાણકારોના પોર્ટફોલિયોમાં સ્મોલકેપ, મિડકેપ અને લાર્જકેપ ત્રણેયમાં ઓછામાં ઓછું 25%-25% એલોકેશન હોવું જોઈએ.

3 વર્ષમાં ડબલ ડિજિટ રિટર્ન: મ્યુચ્યુઅલ ફંડને લઈને હવે ભારતીય રોકાણકારોનો દ્રષ્ટિકોણ બદલાયો છે. રોકાણકારોએ સારા ફંડ હાઉસ અને સારા ફંડ મેનેજરની પસંદગી કરવી જોઈએ. આગામી 3 વર્ષમાં બજારમાંથી ડબલ ડિજિટ (10% થી વધુ) રિટર્ન મળવાની પૂરી આશા છે. આ સાથે જ તેમણે સરકાર પાસે માંગણી કરી છે કે સ્થાનિક રોકાણકારોને ટેક્સમાં પણ રાહત મળવી જોઈએ.

ડિસ્ક્લેમર:- Moneycontrol.com પર વ્યક્ત કરવામાં આવેલા મંતવ્યો નિષ્ણાતોના પોતાના અંગત મંતવ્યો છે. આ મંતવ્યો કે ભલામણો માટે વેબસાઇટ અથવા તેનું મેનેજમેન્ટ કોઈપણ રીતે જવાબદાર નથી. મનીકંટ્રોલ તેના યુઝર્સને આગ્રહ કરે છે કે કોઈપણ પ્રકારનો રોકાણનો નિર્ણય લેતા પહેલા પ્રમાણિત નાણાકીય નિષ્ણાતની સલાહ ચોક્કસથી લેવી.

આ પણ વાંચો-મોંઘવારીમાંથી જલ્દી મળશે મોટી રાહત! ક્રૂડ ઓઈલ ગગડીને $70 પર આવશે, જાણો SBIનો લેટેસ્ટ રિપોર્ટ