Asian Market: એશિયન બજારોમાં મિશ્ર વલણ, વોલ સ્ટ્રીટ રેકોર્ડ ટોચે અને જાપાનની બોન્ડ યીલ્ડ 40 વર્ષના હાઈ પર

Asian Market: અમેરિકા અને ઈરાન વચ્ચે ચાલી રહેલા તણાવ અને શાંતિ કરારની અનિશ્ચિતતા વચ્ચે ગ્લોબલ માર્કેટમાંથી મિશ્ર સંકેતો મળી રહ્યા છે. સોમવારે એશિયન બજારોમાં મિશ્ર કારોબાર જોવા મળ્યો હતો. બીજી તરફ, શુક્રવારે અમેરિકન શેરબજાર રેકોર્ડ ઊંચાઈ પર બંધ થયા છે, જ્યારે ભૌગોલિક તણાવને કારણે ક્રૂડ ઓઈલના ભાવમાં મોટો ઉછાળો જોવા મળ્યો છે.

એશિયન બજારોની મિશ્ર ચાલ

સોમવારે એશિયાના મુખ્ય બજારોમાં ઉતાર-ચઢાવ જોવા મળ્યો હતો.

જાપાન: જાપાનનો નિક્કેઈ (Nikkei 225) ઇન્ડેક્સ 0.17% વધ્યો હતો, જ્યારે ટોપિક્સ (Topix) માં 0.3% નો ઘટાડો નોંધાયો હતો.

હોંગકોંગ: હેંગ સેંગ (Hang Seng) ઇન્ડેક્સના ફ્યુચર્સ 25,098 ના સ્તરે રહ્યા હતા, જે અગાઉના 25,182.39 ના ક્લોઝિંગ કરતાં નીચા હતા. આંકડા હોંગકોંગ માર્કેટના નબળા ઓપનિંગનો સંકેત આપે છે.

સોફ્ટબેંકમાં જંગી તેજી: સોફ્ટબેંક ગ્રુપના શેરમાં 5% નો ઉછાળો આવ્યો હતો. કંપનીએ જાહેરાત કરી છે કે તે ફ્રાન્સમાં આર્ટિફિશિયલ ઈન્ટેલિજન્સ (AI) ઈન્ફ્રાસ્ટ્રક્ચર ઊભું કરવા માટે આગામી 5 વર્ષમાં 45 બિલિયન યુરોનું રોકાણ કરશે.

ગિફ્ટ નિફ્ટી અને ભારતીય બજાર માટે સંકેત

ભારતીય શેરબજારની વાત કરીએ તો, ગિફ્ટ નિફ્ટી 23,702 ના લેવલની આસપાસ ટ્રેડ થઈ રહ્યો હતો. આ આંકડો નિફ્ટી ફ્યુચર્સના અગાઉના ક્લોઝિંગ કરતા લગભગ 46 પોઈન્ટ નીચે છે, જે ભારતીય શેરબજાર માટે શરૂઆત નકારાત્મક રહેવાનો ઈશારો કરે છે.

વોલ સ્ટ્રીટમાં રેકોર્ડ બ્રેક તેજી

શુક્રવારે અમેરિકન માર્કેટમાં ટેક શેરોની આગેવાની હેઠળ શાનદાર તેજી જોવા મળી હતી, જેનાથી સાપ્તાહિક અને માસિક વધારો નોંધાયો છે.

ડોવ જોન્સ : 363.37 પોઈન્ટ (0.72%) વધીને 51,032.34 ની વિક્રમી સપાટીએ પહોંચ્યો.

S&P 500: 16.44 પોઈન્ટ (0.22%) ના વધારા સાથે 7,580.07 પર બંધ થયો.

નેસ્ડેક : 55.15 પોઈન્ટ (0.21%) વધીને 26,972.62 પર બંધ થયો.

મુખ્ય ટેક શેરોમાં માઈક્રોસોફ્ટમાં 5.45% અને ડેલના શેરમાં 32.8% નો જંગી ઉછાળો જોવા મળ્યો હતો. જ્યારે બીજી બાજુ એનવિડિયા 1.45%, એપલ 0.14% અને એમેઝોન 1.23% ઘટ્યા હતા.

જાપાનમાં 40 વર્ષની ટોચે પહોંચી બોન્ડ યીલ્ડ

મે મહિનામાં જાપાનના મેન્યુફેક્ચરિંગ સેક્ટરમાં થોડી ધીમી ગતિ જોવા મળી છે. S&P ગ્લોબલ જાપાન મેન્યુફેક્ચરિંગ PMI 54.5 રહ્યો હતો, જે એપ્રિલના 55.1 કરતાં ઓછો છે. બીજી તરફ, 20 મેના રોજ જાપાનની 10-વર્ષની સોવરિન બોન્ડ યીલ્ડ વધીને 2.809% થઈ ગઈ છે, જે 1996 પછી સૌથી ઉચ્ચ સ્તર છે. જાપાનના વડાપ્રધાન સાને તાકાઈચી લોકોના જીવનનિર્વાહ ખર્ચમાં મદદ કરવા માટે સપ્લિમેન્ટરી બજેટ તૈયાર કરી રહ્યા છે. આ માટે સરકાર નવું દેવું લેશે તેવી અટકળોને પગલે યીલ્ડમાં આટલો મોટો ઉછાળો આવ્યો છે.

ભૌગોલિક તણાવ અને ક્રૂડ ઓઈલના ભાવમાં ભડકો

ઈઝરાયેલે લેબનોનમાં ઈરાન સમર્થિત હિઝબુલ્લાહ સામે પોતાના જમીની હુમલાઓ વધુ તેજ કર્યા છે. આ યુદ્ધની પરિસ્થિતિને કારણે કાચા તેલના ભાવમાં જોરદાર ઉછાળો આવ્યો છે.US ક્રૂડ ફ્યુચર્સ 2.71% ઉછળીને 89.73 ડોલર પ્રતિ બેરલ પર પહોંચી ગયું છે. બ્રેન્ટ ક્રૂડનો ભાવ 2.37% વધીને 93.28 ડોલર પ્રતિ બેરલના સ્તરે પહોંચ્યો છે. આ દરમિયાન, અમેરિકા અને ઈરાન વચ્ચે યુદ્ધવિરામ અને હોર્મુઝ સ્ટ્રેટ ખોલવા અંગે મેસેજની આપ-લે અને ડ્રાફ્ટ એગ્રીમેન્ટની ચર્ચાઓ ચાલી રહી છે, પરંતુ હજુ સુધી કોઈ નક્કર પ્રગતિ સ્પષ્ટ થઈ નથી.

ભારત-US ટ્રેડ મંત્રણા

ભારત અને અમેરિકા વચ્ચે 1 જૂનથી 4 જૂન સુધી દિલ્હીમાં મહત્વપૂર્ણ ટ્રેડ વાટાઘાટો શરૂ થવા જઈ રહી છે. અમેરિકી રાજદૂત સર્જિયો ગોરના જણાવ્યા અનુસાર, બંને દેશો વચ્ચે વચગાળાના ટ્રેડ એગ્રીમેન્ટને ફાઈનલ કરવાની વાતચીત હવે તેના અંતિમ તબક્કામાં પહોંચી ગઈ છે.

કરન્સી બજારની સ્થિતિ

અમેરિકા-ઈરાન શાંતિ કરારની રાહ જોઈ રહેલા ચલણ બજારમાં અમેરિકી ડોલર સ્થિર જોવા મળ્યો હતો. ડોલર ઈન્ડેક્સ 99.00 પર ફ્લેટ રહ્યો હતો. યુરો 0.08% ઘટીને 1.165 ડોલર અને જાપાનીઝ યેન 0.08% નબળો પડીને 159.41 પ્રતિ ડોલર પર આવી ગયો હતો.

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.