BSE ના 50%થી વધુ શેરો 52-વીક લો પર, રોકાણકારોના 56 લાખ કરોડ ડૂબ્યા

આજના શેરબજારમાં ચારેબાજુ જોવા મળેલા કડાકાએ રોકાણકારોની ઊંઘ હરામ કરી દીધી છે. પશ્ચિમ એશિયામાં વધતો તણાવ અને ગ્લોબલ માર્કેટની અનિશ્ચિતતાની સીધી અસર ભારતીય બજાર પર પડી છે. બોમ્બે સ્ટોક એક્સચેન્જ (BSE) ના આંકડા ડરામણા છે, કારણ કે માર્ચ મહિનામાં લિસ્ટેડ અડધાથી વધુ શેરો પોતાના 52-સપ્તાહના નીચલા સ્તરે (52-week low) પહોંચી ગયા છે. આ દર્શાવે છે કે બજારની નબળાઈ માત્ર અમુક શેરો પૂરતી સીમિત નથી, પરંતુ આખા માર્કેટમાં ફેલાઈ ગઈ છે.

2,234 શેરો 52-વીક લો પર પટકાયા

BSE ના લેટેસ્ટ આંકડા મુજબ, એક્સચેન્જ પર એક્ટિવ રીતે ટ્રેડ થતા 4,270 શેરોમાંથી લગભગ 2,234 શેરો માર્ચ મહિનામાં 52-વીકના તળિયે પહોંચી ગયા છે. એટલે કે 50% થી વધુ શેરો તૂટ્યા છે.

આમાંથી 445 શેરો તો એવા છે જે તેમના ઓલ-ટાઇમ લો (All-time low) લેવલ પર આવી ગયા છે. ચિંતાની વાત એ છે કે, આમાં 1,000 જેટલા શેરો A અને B ગ્રુપના છે, જે બજારમાં ખૂબ જ એક્ટિવ અને લિક્વિડ માનવામાં આવે છે. આ બાબત દર્શાવે છે કે કડાકો કેટલો ગંભીર છે.

બજારમાં બચેલા 2,036 શેરોની હાલત પણ ખાસ સારી નથી.

આમાંથી 16% એટલે કે 334 શેરો તેમના 52-વીક લો થી માત્ર 1 થી 10% જ ઉપર ટ્રેડ કરી રહ્યા છે. 414 શેરો 10 થી 20% ઉપર, 294 શેરો 20 થી 30% ઉપર અને 356 શેરો 30 થી 50% ઉપર છે. માત્ર 353 શેરો 50 થી 100% ઉપર અને 285 શેરો 100% થી વધુના ઉછાળા પર ટ્રેડ કરી રહ્યા છે. આ આંકડાઓ સાબિત કરે છે કે વેચવાલીનું દબાણ લગભગ દરેક લેવલના શેરો પર જોવા મળી રહ્યું છે.

માર્કેટ કેમ તૂટી રહ્યું છે? જાણો મોટા કારણો

માર્કેટ એનાલિસ્ટ્સના મતે આ ભારે કડાકા પાછળ ઘણા પરિબળો જવાબદાર છે:

ભૌગોલિક તણાવ: અમેરિકા, ઈરાન અને ઈઝરાયેલ વચ્ચે વધતો યુદ્ધનો ખતરો.

મોંઘું ક્રૂડ ઓઇલ: કાચા તેલના ભાવ ઊંચા હોવાથી ભારત જેવા આયાતકાર દેશ પર મોંઘવારી અને કરંટ એકાઉન્ટ ડેફિસિટનું દબાણ વધ્યું છે.

FII ની સતત વેચવાલી: વિદેશી રોકાણકારો (FII) સતત બજારમાંથી પૈસા કાઢી રહ્યા છે.

અન્ય કારણો: રૂપિયામાં નબળાઈ અને કંપનીઓની કોર્પોરેટ કમાણીને લઈને અનિશ્ચિતતા.

રોકાણકારોના 56 લાખ કરોડ સ્વાહા

આ ઐતિહાસિક કડાકાને કારણે રોકાણકારોની સંપત્તિમાં મોટું ગાબડું પડ્યું છે. વર્ષ 2024 ના ઉચ્ચ સ્તરથી લઈને અત્યાર સુધીમાં BSE લિસ્ટેડ કંપનીઓનું કુલ માર્કેટ કેપ લગભગ 56 લાખ કરોડ રૂપિયા ઘટી ગયું છે. જોકે, પ્રમોટર્સનો હિસ્સો ઘટવાને કારણે માર્કેટ ફ્લોટમાં 4% નો વધારો જોવા મળ્યો છે, જેનાથી આ નુકસાનનું પ્રમાણ થોડું બેલેન્સ થયું છે.

ક્યાં રોકાણ કરવું અને કયા સેક્ટરથી દૂર રહેવું?

માર્કેટ ભલે તૂટ્યું હોય, પરંતુ આ ઘટાડાને કારણે ઘણા સારા શેરોના વેલ્યુએશન હવે તેમના લાંબા ગાળાની એવરેજની આસપાસ કે તેથી નીચે આવી ગયા છે, જે નવી તકો ઊભી કરી શકે છે.

ગ્લોબલ બ્રોકરેજ ફર્મ ગોલ્ડમેન સૅક્સની સલાહ મુજબ:

આ સેક્ટર્સમાં તક છે: હાલના માહોલમાં ડિફેન્સિવ સેક્ટર્સ જેવા કે કન્ઝ્યુમર સ્ટેપલ્સ, ટેલિકોમ અને ડિફેન્સમાં રોકાણ કરવું વધુ સારો વિકલ્પ બની શકે છે. બ્રોકરેજે બેન્કિંગ સેક્ટર પર પણ પોઝિટિવ વલણ જાળવી રાખ્યું છે, કારણ કે ત્યાં મજબૂત એસેટ ક્વોલિટી અને નેટ ઇન્ટરેસ્ટ માર્જિનમાં સુધારાની અપેક્ષા છે.

આ સેક્ટર્સથી સાવધ રહો: ઓટો અને કન્ઝ્યુમર ડ્યુરેબલ્સ સેક્ટરને 'માર્કેટ વેઇટ' આપવામાં આવ્યું છે, કારણ કે તે મોંઘવારી અને વ્યાજ દરો પ્રત્યે વધુ સંવેદનશીલ છે. આ સિવાય NBFCs, ઇન્ડસ્ટ્રિયલ્સ, કેમિકલ્સ, IT અને ફાર્મા સેક્ટરમાં પણ અત્યારે સાવચેતી રાખવાની સલાહ આપવામાં આવી છે.

આ પણ વાંચો-CMPDI IPO લિસ્ટિંગ: 172 રૂપિયાનો શેર 160 પર લિસ્ટ થયો, રોકાણકારોને સીધો 7% નો ઘાટો

ડિસ્ક્લેમર: અહીં આપેલી માહિતી બ્રોકરેજ ફર્મના રિપોર્ટ પર આધારિત છે. શેરબજારમાં રોકાણ જોખમોને આધીન હોય છે. કોઈપણ રોકાણનો નિર્ણય લેતા પહેલા, કૃપા કરીને સર્ટિફાઇડ નિષ્ણાત અથવા તમારા નાણાકીય સલાહકારની મદદ લો. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.