Ola Electric Shares: 1 મહિનામાં 74% ઉછળ્યો ઓલા ઇલેક્ટ્રિકનો શેર, હવે શું કરવું? ખરીદવા, વેચવા કે હોલ્ડ? જાણો એક્સપર્ટનો વ્યૂ

Ola Electric Shares: છેલ્લા કેટલાક સમયથી શેરબજારમાં ઓલા ઇલેક્ટ્રિકના શેર ચર્ચાનું કેન્દ્ર બન્યા છે. ઓલાના શેરમાં છેલ્લા 1 મહિનામાં આશરે 74% નો જોરદાર ઉછાળો જોવા મળ્યો છે. એટલું જ નહીં, પોતાના 52 અઠવાડિયાના સૌથી નીચલા સ્તર 22.25 રૂપિયાથી આ શેર અત્યાર સુધીમાં 82% જેટલો વધી ચૂક્યો છે. આ તોફાની તેજીને જોઈને રોકાણકારો મૂંઝવણમાં છે કે હવે આ શેરમાં નફો બુક કરી લેવો જોઈએ કે પછી વધુ તેજી માટે હોલ્ડ રાખવો જોઈએ.

ચાલો જાણીએ એક્સપર્ટ્સ આ શેર વિશે શું માની રહ્યા છે અને કયા લેવલ પર નજર રાખવી જરૂરી છે.

શેરને મુકાયો ASM ફ્રેમવર્કમાં

રોકાણકારોએ એક વાતની ખાસ નોંધ લેવી જોઈએ કે BSE અને NSE એ ઓલા ઇલેક્ટ્રિકના શેરને શોર્ટ-ટર્મ ASM ફ્રેમવર્કમાં મૂક્યો છે. સામાન્ય રીતે જ્યારે કોઈ શેરમાં ટૂંકા ગાળામાં બહુ મોટી વધ-ઘટ જોવા મળે ત્યારે શેરબજાર દ્વારા તેને ખાસ દેખરેખ હેઠળ રાખવામાં આવે છે. આનાથી ઘણીવાર શેર પર દબાણ આવી શકે છે, પરંતુ તે હંમેશા નકારાત્મક જ હોય તેવું જરૂરી નથી.

ઓલા ઇલેક્ટ્રિક સતત નવા ઉત્પાદનો અને ટેકનોલોજી પર કામ કરી રહી છે. કંપનીએ તાજેતરમાં જ S1 X+ 5.2 Kwh મોડલ લોન્ચ કર્યું છે, જેમાં 4680 'ભારત સેલ્સ' (Bharat Cells) નો ઉપયોગ કરવામાં આવ્યો છે. કંપની પોતાની ઇન-હાઉસ લિથિયમ આયર્ન ફોસ્ફેટ (LFP) સેલ ટેકનોલોજી પર પણ કામ કરી રહી છે, જે આગામી સમયમાં ખર્ચ ઘટાડવામાં મદદરૂપ થશે. નિષ્ણાતો માને છે કે જો કંપની પોતાની બેટરી જાતે બનાવવામાં સફળ રહેશે, તો તેની નફાકારકતામાં મોટો સુધારો થઈ શકે છે.

નિષ્ણાતોનો શું છે અભિપ્રાય?

WealthMills Securitiesના ઇક્વિટી સ્ટ્રેટેજીસ્ટ ક્રાંતિ બાથિની ના જણાવ્યા મુજબ, બેટરી ઉત્પાદનને લઈને થયેલી જાહેરાતો બાદ શેરમાં પોઝિટિવિટી જોવા મળી છે. જોકે, બજાર હવે કંપનીના આગામી ત્રિમાસિક પરિણામોની રાહ જોઈ રહ્યું છે. જે રોકાણકારો વધુ જોખમ લેવાની ક્ષમતા ધરાવે છે તેઓ મધ્યમથી ટૂંકા ગાળા માટે એન્ટ્રી વિચારી શકે છે, પરંતુ આગામી બે ક્વાર્ટરના પરિણામો શેરની સાચી દિશા નક્કી કરશે.

સાથે જ કંપનીએ તેની સર્વિસ ક્વોલિટી પર વધુ ધ્યાન આપવું પડશે, કારણ કે ગ્રાહકો હવે આ બાબતે વધુ જાગૃત બન્યા છે.

ટેકનિકલ લેવલ: ક્યાં છે સપોર્ટ અને ટાર્ગેટ?

Angel One ના ઓશો કૃષ્ણન ના જણાવ્યા અનુસાર, અત્યારે સાવચેતી રાખવી જરૂરી છે:

રેઝિસ્ટન્સ: જો શેર 42 રૂપિયાની ઉપર ટકી જાય (Breakout), તો તે 50 રૂપિયાના સ્તર સુધી પહોંચી શકે છે.

સપોર્ટ: નીચેની તરફ 35 રૂપિયા પર મજબૂત સપોર્ટ છે. જો આ લેવલ તૂટે તો 32 રૂપિયા સુધીનો ઘટાડો જોવા મળી શકે છે.

ઓલા ઇલેક્ટ્રિક અત્યારે એક મહત્વના મોડ પર છે. જો તમે પહેલેથી રોકાણ કરેલું હોય, તો તમે સખત સ્ટોપલોસ સાથે હોલ્ડ કરી શકો છો. નવી એન્ટ્રી કરવા માંગતા રોકાણકારોએ 42 રૂપિયાના બ્રેકઆઉટની રાહ જોવી હિતાવહ છે.

ડિસ્ક્લેમર: અહીં આપેલી માહિતી બ્રોકરેજ ફર્મના રિપોર્ટ પર આધારિત છે. શેરબજારમાં રોકાણ જોખમોને આધીન હોય છે. કોઈપણ રોકાણનો નિર્ણય લેતા પહેલા, કૃપા કરીને સર્ટિફાઇડ નિષ્ણાત અથવા તમારા નાણાકીય સલાહકારની મદદ લો. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.

આ પણ વાંચો-Share Market Strategy: રિઝલ્ટ સીઝનમાં શેર બજારમાં કમાણી કરવી છે? એક્સપર્ટ શુભમ અગ્રવાલની આ સ્પેશિયલ ફોર્મ્યુલા જાણો