Paytm યુઝર્સ માટે રાહતના સમાચાર! RBIએ આપી વૉલેટ સર્વિસ શરૂ કરવાની મંજૂરી

Paytm RBI Approval: ફિનટેક ક્ષેત્રની દિગ્ગજ કંપની Paytmની પેરેન્ટ કંપની One97 Communications માટે શુક્રવાર, 13 નવેમ્બરના રોજ રાહતના સમાચાર આવ્યા છે. કંપનીએ જણાવ્યું છે કે તેની સંપૂર્ણ માલિકીની સબસિડિયરી Paytm Payments Services Limited (PPSL)ને ભારતીય રિઝર્વ બેન્ક (RBI) તરફથી પ્રીપેડ પેમેન્ટ ઇન્સ્ટ્રુમેન્ટ્સ (PPIs) એટલે કે ડિજિટલ વૉલેટ સિસ્ટમ શરૂ કરવા અને તેનું સંચાલન કરવા માટે સૈદ્ધાંતિક મંજૂરી મળી છે.

Payment and Settlement Systems Act, 2007 હેઠળ મળેલી આ મંજૂરીથી PPSL માટે ડિજિટલ વૉલેટ સહિત અન્ય પ્રીપેડ પેમેન્ટ ઇન્સ્ટ્રુમેન્ટ્સની સુવિધા આપવાનો માર્ગ મોકળો થયો છે. ઉલ્લેખનીય છે કે Paytmએ નાણાકીય વર્ષ 2026-27ના પ્રથમ ક્વાર્ટર (Q1 FY27)ના પરિણામો દરમિયાન જાણકારી આપી હતી કે PPSLએ વૉલેટ લાઇસન્સ માટે અરજી કરી છે.

રોકાણકારો અને ગ્રાહકો માટે એ સમજવું જરૂરી છે કે હાલમાં મળેલી સૈદ્ધાંતિક મંજૂરીનો અર્થ એ નથી કે કંપની તરત જ નવા ડિજિટલ વૉલેટ ઇશ્યૂ કરવાનું શરૂ કરી શકશે.

RBIએ પોતાના પત્રમાં સ્પષ્ટ કર્યું છે કે PPSLને અંતિમ મંજૂરી એટલે કે Certificate of Authorisation (CoA) મળ્યા બાદ જ પ્રીપેડ પેમેન્ટ ઇન્સ્ટ્રુમેન્ટ્સ (PPIs) ઇશ્યૂ કરવાની પરવાનગી મળશે. એટલે કે Paytm Walletની સર્વિસ ફરી શરૂ કરવા માટે કંપનીએ હજુ કેટલીક નિયમનકારી પ્રક્રિયાઓ પૂર્ણ કરવી પડશે.

RBIની કડક શરતો: 6 મહિનામાં પૂર્ણ કરવું પડશે આ કામ

અંતિમ લાઇસન્સ મેળવવા માટે RBIએ PPSL સામે કેટલીક શરતો અને સમયમર્યાદા નક્કી કરી છે. આ મંજૂરીની શરતો અનુસાર, PPSLએ યોગ્ય ઓડિટર મારફતે સિસ્ટમ ઓડિટ કરાવવું પડશે.

આ ઓડિટ નોન-બેન્ક પેમેન્ટ સિસ્ટમ ઓપરેટર્સ માટે સાઇબર સુરક્ષા અને ડિજિટલ પેમેન્ટ સેફ્ટી કંટ્રોલ અંગે RBI દ્વારા 5 નવેમ્બરના રોજ જાહેર કરવામાં આવેલા નિર્દેશો અનુસાર હોવું જોઈએ.

કંપનીએ 13 નવેમ્બરના રોજ મળેલા પત્રની તારીખથી છ મહિનાની અંદર RBIને સિસ્ટમ ઓડિટ રિપોર્ટ સોંપવાનો રહેશે. જો કંપની નિર્ધારિત સમયમર્યાદામાં આ પ્રક્રિયા પૂર્ણ કરવામાં નિષ્ફળ રહેશે, તો તેને મળેલી સૈદ્ધાંતિક મંજૂરી આપમેળે રદ થઈ જશે. આવી સ્થિતિમાં RBI અંતિમ મંજૂરી આપવા અંગે વિચારણા કરશે નહીં.

આ ઉપરાંત, RBIએ PPSLને પેમેન્ટ સિસ્ટમના ડેટા સ્ટોરેજ સંબંધિત લાગુ પડતા નિયમોનું પાલન કરવા જણાવ્યું છે. કંપનીના શેરહોલ્ડિંગ અથવા માલિકીમાં કોઈ ફેરફાર થાય તો તેના માટે પણ RBIની અગાઉથી મંજૂરી લેવી પડશે.

Paytm માટે આ મંજૂરી શા માટે મહત્ત્વપૂર્ણ છે?

RBIની આ મંજૂરી Paytm માટે પ્રીપેડ વૉલેટ બિઝનેસમાં ફરી પ્રવેશવાની દિશામાં એક મહત્ત્વપૂર્ણ પગલું છે. જોકે, ગ્રાહકો માટે વૉલેટ સર્વિસ ફરી શરૂ કરતાં પહેલાં કંપનીની સબસિડિયરી PPSLએ RBI દ્વારા નક્કી કરવામાં આવેલી તમામ નિયમનકારી અને અનુપાલન સંબંધિત શરતો પૂર્ણ કરવી પડશે.

ત્યારબાદ જ કંપનીને અંતિમ મંજૂરી મળી શકશે અને Paytm Walletની સર્વિસ ફરી શરૂ કરવાનો માર્ગ ખુલશે. એટલે હાલની મંજૂરીને વૉલેટ સર્વિસ તાત્કાલિક શરૂ થવાની મંજૂરી તરીકે જોવી યોગ્ય નથી.