એક ખરાબ ઇન્ટરનેટ કનેક્શન અને શરૂ થઈ Reliance Jio, ઈશા અંબાણીએ સંભળાવ્યો 2009નો એ રસપ્રદ કિસ્સો

Reliance Jio Origin Story: રિલાયન્સ જિયોના આગામી 2026ના મેગા IPOની જાહેરાત વચ્ચે, ઈશા અંબાણીએ જિયોની શરૂઆતનો એક ખૂબ જ રસપ્રદ કિસ્સો શેર કર્યો છે. તેમણે જણાવ્યું કે કેવી રીતે ઇન્ટરનેટની એક નાની સમસ્યાએ ભારતની સૌથી મોટી ડિજિટલ ક્રાંતિનો પાયો નાખ્યો. ચાલો જાણીએ ઈશા અંબાણીના જ શબ્દોમાં જિયોની સફળતાની કહાની.

2009 ની એ ઘટના જ્યારે નહોતું ચાલતું ઇન્ટરનેટ

ઈશા અંબાણીએ જૂના દિવસોને યાદ કરતાં કહ્યું કે, "વાત 2009-2010 ની છે. હું અને આકાશ અમેરિકામાં ભણતા હતા અને રજાઓમાં મુંબઈ ઘરે આવ્યા હતા. મારે ઓનલાઇન એક કોલેજ અસાઇનમેન્ટ સબમિટ કરવાનું હતું, પરંતુ ઇન્ટરનેટ બરાબર ન ચાલવાના કારણે હું તે જમા કરી શકી નહીં."

આ ઘટના પછી ઘરમાં એ વાત પર લાંબી ચર્ચા થઈ કે ઇન્ટરનેટ કનેક્ટિવિટીની બાબતમાં ભારત પશ્ચિમી દેશો કરતાં આટલું પાછળ કેમ છે? ત્યારે આકાશ અંબાણીએ કહ્યું હતું કે આનો એકમાત્ર ઉકેલ ભારતમાં એક મજબૂત 'ડિજિટલ ટેકનોલોજી પ્લેટફોર્મ કંપની' બનાવવાનો છે. બસ, આ જ વિચાર સાથે 2016 માં જિયોનો પાયો નંખાયો, જે આજે દેશનું સૌથી મોટું ડિજિટલ નેટવર્ક બની ચૂક્યું છે.

ઈશા અંબાણીએ રિલાયન્સની બિઝનેસ ફિલોસોફીના 3 મુખ્ય સ્તંભો જણાવ્યા.

લાંબા ગાળાનું વિઝન : રિલાયન્સ માત્ર આજ કે કાલનો વિચાર નથી કરતી, પરંતુ આવનારા દાયકાઓની જરૂરિયાતોને ધ્યાનમાં રાખીને પ્રોજેક્ટ પર કામ કરે છે.

સ્કેલ : કંપની હંમેશા એવા મોટા સ્કેલ પર કામ કરવાનું લક્ષ્ય રાખે છે, જેનાથી આખી ઇન્ડસ્ટ્રીના અર્થશાસ્ત્રમાં મોટો અને સકારાત્મક બદલાવ લાવી શકાય.

એક્ઝિક્યુશન : રિલાયન્સ મૂળભૂત રીતે એક ટેકનિકલ કંપની છે. કોઈપણ પ્રોજેક્ટને નક્કી કરેલા સમયમાં અને પૂરી ચોકસાઈથી પૂરો કરવો એ કંપનીની આદત છે.

આપેલું વચન પૂરું કરવાની મિસાલ

ઈશા અંબાણીએ કંપનીની નાણાકીય શિસ્ત વિશે વાત કરતાં જણાવ્યું કે, વર્ષ 2019 માં મુકેશ અંબાણીએ રિલાયન્સ ઇન્ડસ્ટ્રીઝને 2021 સુધીમાં 'નેટ-ડેટ ફ્રી' બનાવવાનું વચન આપ્યું હતું. 2020 માં કોરોના મહામારી અને વૈશ્વિક મંદી હોવા છતાં, કંપનીએ નિર્ધારિત સમય કરતાં 9 મહિના પહેલાં જ રિલાયન્સને દેવામુક્ત કરી દીધી હતી.

ધીરુભાઈ અંબાણીનું સપનું અને 29% વાર્ષિક રિટર્ન

રિલાયન્સની ઐતિહાસિક સફરને યાદ કરતાં ઈશાએ તેમના દાદા ધીરુભાઈ અંબાણીને નમન કર્યા. વર્ષ 1977 માં ધીરુભાઈ રિલાયન્સનો IPO લાવ્યા હતા, જેને હવે લગભગ 50 વર્ષ પૂરા થવા આવ્યા છે. આ 50 વર્ષોમાં રિલાયન્સે પોતાના રોકાણકારોને વાર્ષિક 29% નું શાનદાર રિટર્ન આપ્યું છે.

અંતમાં તેમણે કહ્યું કે, "મારા દાદાજી માટે રિલાયન્સ માત્ર એક કંપની ન હતી. રિલાયન્સ એક વચન છે કે દરેક ભારતીયને દેશના વિકાસમાં ભાગીદાર બનવાની, તેની સમૃદ્ધિનો હિસ્સો મેળવવાની અને એક સારા ભવિષ્ય પર વિશ્વાસ રાખવાની તક મળવી જોઈએ."

આ પણ વાંચો-Jio IPO: રિલાયન્સ જિયોના મેગા આઈપીઓ પહેલા કંપનીની આર્થિક સ્થિતિ બની મજબૂત, દેવાનો બોજ ઘટ્યો અને કેશ ફ્લો વધ્યો