SEBI probe Pump-and-Dump: શેરબજારના નિયમનકાર સેબીએ સ્ટોક માર્કેટમાં ગેરરીતિ આચરનારા તત્વો સામે લાલ આંખ કરી છે. છેલ્લા ત્રણ દિવસથી સેબીની ટીમે મુંબઈ, હૈદરાબાદ, બેંગલુરુ અને ખાસ કરીને ગુજરાતના ભુજમાં મોટા પાયે દરોડા પાડ્યા છે. આ કાર્યવાહી પમ્પ એન્ડ ડમ્પના શંકાસ્પદ નેટવર્કને તોડી પાડવા માટે કરવામાં આવી છે.
SEBIના અનેક શહેરોમાં તાબડતોબ દરોડા: ‘પમ્પ એન્ડ ડમ્પ’ કરી રોકાણકારોને લૂંટવાનું કૌભાંડ? મુંબઈથી ભુજ સુધી તપાસનો ધમધમાટ
SEBIએ મુંબઈ, હૈદરાબાદ અને ભુજ સહિત અનેક શહેરોમાં ‘પમ્પ એન્ડ ડમ્પ’ મામલે દરોડા પાડ્યા છે. ખોટી રીતે શેરના ભાવ વધારી રોકાણકારોને ફસાવવાના આ ખેલમાં કઈ કંપનીઓ ફસાઈ? વાંચો સંપૂર્ણ વિગત.
અપડેટેડ 02:40:23 PM Apr 27, 2026 પર
સેબીની આ તપાસમાં કચ્છનું ભુજ શહેર એક મહત્વના કેન્દ્ર તરીકે ઉભરી આવ્યું છે.
શું છે આ ‘પમ્પ એન્ડ ડમ્પ’ રમત?
સરળ ભાષામાં સમજીએ તો, આ એક એવું કૌભાંડ છે જેમાં કેટલીક વ્યક્તિઓ કે સંસ્થાઓ ભેગા મળીને કોઈ ચોક્કસ શેરના ભાવને આર્ટિફિશિયલ (ખોટી) રીતે ખૂબ ઊંચે લઈ જાય છે. જ્યારે ભાવ આકાશે પહોંચે અને સામાન્ય રોકાણકારો લાલચમાં આવીને શેર ખરીદવા લાગે, ત્યારે આ ઓપરેટરો પોતાના શેર ઊંચા ભાવે વેચીને નીકળી જાય છે. પરિણામે શેરનો ભાવ અચાનક તૂટે છે અને સામાન્ય રોકાણકારોના પૈસા ડૂબી જાય છે.
કઈ કંપનીઓ સેબીની રડારમાં છે?
મનીકંટ્રોલના અહેવાલ મુજબ, સેબી હાલમાં એક નાની ઇન્વેસ્ટમેન્ટ બેંકિંગ કંપની અને એક ડ્રિપ ઇરિગેશન કંપનીની તપાસ કરી રહી છે. સેબીને શંકા છે કે આ કંપનીઓએ તેમના નબળા આર્થિક દેખાવ છતાં ‘બોનસ શેર’ જાહેર કર્યા હતા. આ બોનસ ઈસ્યુનો ઉપયોગ રોકાણકારોને આકર્ષવા અને શેરના ભાવમાં કૃત્રિમ તેજી લાવવા માટે કરવામાં આવ્યો હોવાની શક્યતા છે.
ભુજ બન્યું તપાસનું મુખ્ય કેન્દ્ર
સેબીની આ તપાસમાં કચ્છનું ભુજ શહેર એક મહત્વના કેન્દ્ર તરીકે ઉભરી આવ્યું છે. આનાથી એ સંકેત મળે છે કે શેરબજારમાં હેરાફેરી કરનારાઓનું નેટવર્ક માત્ર મુંબઈ જેવા મોટા શહેરો પૂરતું મર્યાદિત નથી, પરંતુ નાના શહેરોમાં પણ ફેલાયેલું છે. શુક્રવાર મોડી રાત સુધી ચાલેલી આ કાર્યવાહીમાં સેબીએ અનેક મહત્વના દસ્તાવેજો અને ડિજિટલ રેકોર્ડ્સ જપ્ત કર્યા છે.
RM Drip કંપનીએ શું આપી સ્પષ્ટતા?
આ મામલે આરએમ ડ્રિપ એન્ડ સ્પ્રિંકલર્સ સિસ્ટમએ એક્સચેન્જ ફાઇલિંગમાં જણાવ્યું છે કે 22-23 એપ્રિલ દરમિયાન તેના પ્રમોટર્સ અને ડિરેક્ટર્સના સ્થળો પર સેબી દ્વારા તપાસ કરવામાં આવી હતી. જોકે, કંપનીએ દાવો કર્યો છે કે આ કાર્યવાહીની તેમના બિઝનેસ કે આર્થિક સ્થિતિ પર કોઈ અસર પડશે નહીં. કંપનીના જણાવ્યા અનુસાર સેબીએ આ સર્ચ ઓપરેશનનું કોઈ ચોક્કસ કારણ હજુ જણાવ્યું નથી.
રોકાણકારો માટે શું છે બોધપાઠ?
સેબી અત્યારે ટ્રેડિંગ પેટર્ન, ફંડની અવરજવર અને વોટ્સએપ કે અન્ય માધ્યમો દ્વારા થતા કમ્યુનિકેશનની તપાસ કરી રહી છે. રોકાણકારોએ ખાસ ધ્યાન રાખવું જોઈએ કે,
કોઈપણ શેર અચાનક રોકેટની ગતિએ વધવા લાગે તો સાવધ રહેવું.
માત્ર બોનસ કે ડિવિડન્ડની લાલચમાં આવ્યા વગર કંપનીના ફંડામેન્ટલ્સ તપાસવા.
સોશિયલ મીડિયા પર મળતી ટિપ્સના આધારે રોકાણ કરવાનું ટાળવું.
MoneyControl News
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.
