Sensex-Nifty Rally: શેરબજારમાં રોકાણકારોની ચાંદી! સેન્સેક્સમાં 997 પોઈન્ટનો જોરદાર ઉછાળો, જાણો તેજી પાછળના 5 મુખ્ય કારણો

Sensex-Nifty Rally: લાંબા વીકેન્ડ બાદ આજે 4 મે ના રોજ જ્યારે શેરબજાર ખુલ્યું ત્યારે રોકાણકારોના ચહેરા ખીલી ઉઠ્યા હતા. ભારતીય ઇક્વિટી બેન્ચમાર્ક ઇન્ડેક્સ સેન્સેક્સ અને નિફ્ટીમાં આજે સવારથી જ શાનદાર તેજી જોવા મળી રહી છે. સેન્સેક્સ લગભગ 1000 પોઈન્ટ ઉછળ્યો છે, જ્યારે નિફ્ટી પણ 24,300 ની સપાટીની અત્યંત નજીક પહોંચી ગયો છે. બજારમાં ચારેતરફ હરિયાળી જોવા મળી રહી છે અને તમામ 16 મુખ્ય સેક્ટરના ઇન્ડેક્સ ગ્રીન ઝોનમાં ટ્રેડ થઈ રહ્યા છે.

ઇન્ટ્રા-ડે ટ્રેડિંગ દરમિયાન સેન્સેક્સ 997.25 પોઈન્ટ વધીને 77,910.75 સુધી પહોંચ્યો હતો, જ્યારે નિફ્ટી 292.65 પોઈન્ટના વધારા સાથે 24,290.20 ની ટોચે પહોંચ્યો હતો. સ્મોલકેપ અને મિડકેપ ઇન્ડેક્સમાં પણ 1-1% નો સુધારો જોવા મળ્યો છે.

બજારમાં આ તેજી પાછળના 5 મુખ્ય કારણો

1. પાંચ રાજ્યોના ચૂંટણી પરિણામોની અસર

2. ક્રૂડ ઓઈલના ભાવમાં મોટો ઘટાડો

આંતરરાષ્ટ્રીય બજારમાં બ્રેન્ટ ક્રૂડના ભાવમાં 0.27% નો ઘટાડો થયો છે અને તે પ્રતિ બેરલ $107.9 પર આવી ગયો છે. ગયા અઠવાડિયે તે $126.41 ની ચાર વર્ષની ઊંચી સપાટીએ હતો. અમેરિકી રાષ્ટ્રપતિ ડોનાલ્ડ ટ્રમ્પ દ્વારા હોર્મુઝ સ્ટ્રેટમાં જહાજોને મદદ કરવાની જાહેરાત બાદ તેલના ભાવમાં નરમાશ આવી છે, જે ભારત જેવા તેલ આયાતકાર દેશ માટે પોઝિટિવ છે.

3. વૈશ્વિક બજારોમાંથી મજબૂત સંકેતો

એશિયન બજારોમાં દક્ષિણ કોરિયાનો કોસ્પી, ચીનનો શાંઘાઈ કમ્પોઝિટ અને હોંગકોંગના હેંગસેંગમાં તેજી જોવા મળી રહી છે. વધુમાં, શુક્રવારે અમેરિકી બજારો પણ ગ્રીન ઝોનમાં બંધ થયા હતા, જેની પોઝિટિવ અસર આજે ભારતીય બજાર પર જોવા મળી છે.

4. ઓટો શેરોમાં ધૂમ ખરીદી

એપ્રિલ મહિનામાં વાહનોના વેચાણના મજબૂત આંકડા આવતા જ ઓટો ઇન્ડેક્સ 2% જેટલો ઉછળ્યો છે. મારુતિ સુઝુકીના શેરમાં 4%, બજાજ ઓટોમાં 4.8% અને હીરો મોટોકોર્પમાં 2.3% નો વધારો જોવા મળ્યો છે. બજાજ ઓટોનો શેર 18 મહિનાની હાઈ સપાટીએ પહોંચી ગયો છે.

5. જીઓ-પોલિટિકલ ટેન્શનમાં ઘટાડો

ઈરાન અને અમેરિકા વચ્ચે ચાલી રહેલા તણાવમાં થોડી નરમાશ જોવા મળી રહી છે. અમેરિકા દ્વારા હોર્મુઝ સ્ટ્રેટમાં ફસાયેલા જહાજોને છોડાવવા માટે મદદના સંકેતો મળતા બજારમાં સ્થિરતા આવી છે. નિષ્ણાતો માને છે કે હવે મોટા હુમલાની શક્યતા ઓછી છે, જે માર્કેટ માટે રાહતના સમાચાર છે.

નિષ્ણાતોનો મત અને ટેકનિકલ આઉટલુક

જીયોજીત ઇન્વેસ્ટમેન્ટ્સના ચીફ માર્કેટ સ્ટ્રેટેજિસ્ટ આનંદ જેમ્સના જણાવ્યા મુજબ, નિફ્ટી ફરીથી 25,000 થી 25,600 ની રેન્જ તરફ આગળ વધી શકે છે. જોકે, ઇન્ડિયા VIX 18 ની ઉપર હોવાથી બજારમાં વોલેટિલિટી (ઉતાર-ચઢાવ) જળવાઈ રહી શકે છે. હાલમાં નિફ્ટી માટે 24,050 થી 24,350 ની રેન્જ મહત્વની છે.

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.

આ પણ વાંચો-તમિલનાડુમાં 'થલપથી' વિજયની સુનામી! Sun TV ના શેરમાં 9% નો કડાકો, ઓગસ્ટ 2024 પછીનો સૌથી મોટો ઘટાડો