Sensex Rally: સેન્સેક્સમાં 3 દિવસમાં 2,700 પોઇન્ટનો તોફાની ઉછાળો, શું માર્કેટ નવો ઇતિહાસ રચશે કે લેશે બ્રેક? જાણો એક્સપર્ટ્સનો મત

Sensex Rally: ગયા અઠવાડિયે ભારતીય શેરબજારમાં જોવા મળેલા ભારે ઘટાડા અને ગભરાટ પછી આ અઠવાડિયે બજારમાં શાનદાર તેજી પાછી ફરી છે. છેલ્લા 3 જ દિવસમાં સેન્સેક્સ આશરે 2,700 પોઈન્ટ ઉછળી ચૂક્યો છે. બીજી તરફ નિફ્ટીમાં પણ લગભગ 3.5% નો જોરદાર વધારો જોવા મળ્યો છે. આ શાનદાર રિકવરી જોઇને રોકાણકારોના મનમાં સૌથી મોટો સવાલ એ ઉઠી રહ્યો છે કે, શું હવે બજાર અહીંથી થોડો બ્રેક લેશે કે પછી આ તેજી હજુ પણ ચાલુ રહેશે?

બજાર કેમ ઉછળ્યું અને કેમ પડ્યું હતું?

ગયા અઠવાડિયા સુધી અમેરિકા-ઈરાન વચ્ચેનો તણાવ અને ક્રૂડ ઓઈલની વધતી કિંમતોના કારણે દુનિયાભરના શેરબજારોની સાથે ભારતીય માર્કેટ પણ દબાણમાં હતું. જોકે, આ અઠવાડિયે પરિસ્થિતિમાં થોડો સુધારો થતો જોવા મળ્યો છે. છતાં ગ્લોબલ માર્કેટમાં હજુ પણ થોડી અનિશ્ચિતતા તો છે જ, અને તેલની ઊંચી કિંમતો ભવિષ્યમાં મોંઘવારી વધારી શકે છે તેવો ડર પણ રહેલો છે.

પરંતુ નિષ્ણાતોનું માનવું છે કે અત્યારે બજારની તેજી પાછળ કેટલાક મજબૂત દેશી કારણો કામ કરી રહ્યા છે:

કમાણીમાં વધારો: નાણાકીય વર્ષ 2027 (FY27) માં કંપનીઓની કમાણીમાં 15 થી 17% ના ગ્રોથની અપેક્ષા છે, જે બજારને સપોર્ટ આપી રહી છે.

મજબૂત અર્થતંત્ર: ભારતની મજબૂત ઘરેલું અર્થવ્યવસ્થા, સરકારનો વધતો મૂડીખર્ચ, બેંકોનો ક્રેડિટ ગ્રોથ અને ઇન્વેસ્ટમેન્ટ સાઇકલમાં આવેલો સુધારો માર્કેટ માટે ખૂબ જ પોઝિટિવ સંકેત છે.

દિગ્ગજ બ્રોકરેજ અને ફંડ હાઉસ શું કહે છે?

ટાટા મ્યુચ્યુઅલ ફંડની સલાહ

ટાટા મ્યુચ્યુઅલ ફંડના મતે અત્યારે લાર્જ કેપ (મોટી કંપનીના) શેરોમાં રોકાણ કરવું વધુ સારું છે કારણ કે તેમનું વેલ્યુએશન ખૂબ આકર્ષક દેખાય છે અને કમાણી સ્થિર છે. મિડકેપ અને સ્મોલકેપમાં પણ રોકાણની તકો છે, પરંતુ અહીં બહુ સમજી-વિચારીને અમુક ખાસ શેરો પર જ ધ્યાન આપવું હિતાવહ છે.

એક્સિસ સિક્યોરિટીઝની ચેતવણી

એક્સિસ સિક્યોરિટીઝનું માનવું છે કે નિફ્ટી માટે 24,000 થી 24,150 ની રેન્જ બજારની દિશા નક્કી કરશે. બ્રોકરેજ કહે છે કે, "ચાર્ટ પર 'સ્પિનિંગ ટોપ' કેન્ડલ બની છે, જે બજારમાં અનિશ્ચિતતા સ્પષ્ટપણે દર્શાવે છે. બજાર અત્યારે અમેરિકાની મધ્યસ્થ બેંક, ફેડરલ રિઝર્વની બેઠકના નિર્ણયોની રાહ જોઈ રહ્યું છે. હાલ પૂરતો બજારમાં થોડો વિરામ છે અને ટ્રેડર્સ ગ્લોબલ સંકેતો પરથી આગળની દિશા શોધી રહ્યા છે."

ટેક્નિકલ લેવલ અને એક્સપર્ટના ટાર્ગેટ

ટેક્નિકલ રીતે જોઈએ તો નિફ્ટી માટે 24,000 થી 24,150 નું લેવલ એક મજબૂત અવરોધમાનવામાં આવે છે. જ્યારે નીચેની તરફ 23,000 થી 22,900 નું લેવલ એક મહત્વપૂર્ણ સપોર્ટ છે.

ચીફ માર્કેટ સ્ટ્રેટેજિસ્ટ, જિયોજિતના આનંદ જેમ્સના મતે, "23,700 નું લેવલ નિફ્ટી માટે એક મોટો પડકાર છે. જો આ લેવલ પાર થાય તો નિફ્ટીનો આગળનો ટાર્ગેટ 23,990 સુધી જઈ શકે છે. જો શરૂઆતમાં જ નબળાઈ જોવા મળે તો 23,550 નો સપોર્ટ બચાવવો જરૂરી બનશે. જો આ સપોર્ટ તૂટી જાય, તો બજાર 23,300 થી 23,130 ની રેન્જ સુધી પણ ગબડી શકે છે."

પ્રાઈમ રિસર્ચ હેડ, એચડીએફસી સિક્યોરિટીઝના દેવર્ષ વકીલના જણાવ્યા અનુસાર, "જ્યારે વિદેશી સંસ્થાગત રોકાણકારો ઇન્ડેક્સ ફ્યુચર્સમાં તેમની શોર્ટ પોઝિશન બંધ કરવાનું શરૂ કરશે, ત્યારે બજારમાં નવી અને ઝડપી તેજી જોવા મળશે."

ટેકનિકલ રિસર્ચ એનાલિસ્ટ, ચોઈસ ઈક્વિટીના આકાશ શાહ કહે છે કે, ટ્રેડર્સ અત્યારે બેન્કિંગ, ફાઇનાન્સિયલ અને કેપિટલ ગુડ્સ સેક્ટરના શેરો પર વિશેષ ધ્યાન આપી શકે છે, કારણ કે આમાં બાકીના સેક્ટર કરતા વધુ મજબૂતાઈ જોવા મળી રહી છે. જોકે, તેમણે ચેતવણી આપી છે કે બજારના ઇન્ડેક્સ અત્યારે મહત્વના લેવલની આસપાસ હોવાથી, કોઈપણ શેરમાં સમજી-વિચારીને જ રોકાણ કરવું અને જોખમને કાબૂમાં રાખવું જરૂરી છે.

ચીફ ઇન્વેસ્ટમેન્ટ સ્ટ્રેટેજિસ્ટ, જિયોજિતના વિજયકુમારના મતે, યુદ્ધને લગતી અનિશ્ચિતતા છતાં માર્કેટમાં જે રિકવરી આવી છે તેનું મોટું કારણ એ છે કે ક્રૂડ ઓઇલની કિંમતો 102 ડોલરની આસપાસ જ જળવાઈ રહી છે. ક્રૂડ તેલ 120 ડોલરને પાર જશે તેવો ડર હજુ સુધી સાચો પડ્યો નથી.

ડિસ્ક્લેમર: અહીં આપેલી માહિતી બ્રોકરેજ ફર્મના રિપોર્ટ પર આધારિત છે. શેરબજારમાં રોકાણ જોખમોને આધીન હોય છે. કોઈપણ રોકાણનો નિર્ણય લેતા પહેલા, કૃપા કરીને સર્ટિફાઇડ નિષ્ણાત અથવા તમારા નાણાકીય સલાહકારની મદદ લો. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.

આ પણ વાંચો-Stock Markets: બજારના ઘટાડામાં સસ્તા ભાવે શેર ખરીદી લેવા કે હજુ રોકાણ કરવું જોખમી છે? જાણો એક્સપર્ટ્સની સલાહ