શેરબજારમાં કડાકો: સેન્સેક્સ 361 પોઈન્ટ ગગડ્યો, જાણો બજારમાં અચાનક આવેલી આ ગિરાવટના 3 મુખ્ય કારણો

Share Market Fall: ભારતીય શેરબજારમાં ફરી એકવાર નિરાશાનો માહોલ જોવા મળ્યો છે. સવારે જોરદાર શરૂઆત કર્યા પછી બપોર સુધીમાં તો બજારમાં વેચવાલીનું ભારે દબાણ જોવા મળ્યું હતું. પરિણામે સેન્સેક્સ અને નિફ્ટીએ પોતાની તમામ લીડ ગુમાવી દીધી અને બજાર લાલ નિશાનમાં સરકી ગયું.

સવારની તેજી બપોરે કેમ ગાયબ થઈ?

છેલ્લા બે દિવસના ઘટાડા પછી આજે સવારે બજાર ખુલ્યું ત્યારે સેન્સેક્સ લીલા નિશાનમાં હતો. શરૂઆતના કારોબારમાં સેન્સેક્સ 352 પોઈન્ટ ઉછળીને 76,220.02 ની હાઈ સપાટીએ પહોંચ્યો હતો. નિફ્ટીમાં પણ સારી શરૂઆત જોવા મળી અને તે 95 પોઈન્ટ વધીને 24,002.80 ની સપાટીને સ્પર્શી ગયો હતો. શરૂઆતમાં બજારને ગ્લોબલ માર્કેટની તેજી, કાચા તેલના ભાવમાં આવેલો ઘટાડો અને રૂપિયાની મજબૂતીનો ટેકો મળ્યો હતો.

પરંતુ બપોર પડતા જ બજારનું ચિત્ર બદલાઈ ગયું. સેન્સેક્સે પોતાનો તમામ વધારો ગુમાવી દીધો અને પાછલા બંધથી 361 પોઈન્ટ તૂટીને 75,506.76 ના લો લેવલ પર આવી ગયો. તેવી જ રીતે નિફ્ટી પણ 147.6 પોઈન્ટના ઘટાડા સાથે 23,759.55 ના સ્તરે પહોંચી ગયો.

1. અમેરિકા-ઈરાન ડીલ અંગે અનિશ્ચિતતા:

બજારમાં એવા અહેવાલો હતા કે અમેરિકા અને ઈરાન વચ્ચે 60 દિવસના યુદ્ધવિરામ અંગે સમજૂતી થઈ શકે છે. જોકે, આ બાબતે અમેરિકી રાષ્ટ્રપતિ ડોનાલ્ડ ટ્રમ્પની મંજૂરી બાકી છે. સામે પક્ષે ઈરાનના સરકારી મીડિયાએ આવી કોઈ ડીલ ફાઈનલ થઈ હોવાનો ઇનકાર કર્યો છે. આ અસમંજસના કારણે પશ્ચિમ એશિયામાં તણાવ યથાવત છે. જો આ સમાધાન નહીં થાય તો મહત્વનો દરિયાઈ માર્ગ 'હોર્મુઝ સ્ટ્રેટ' બંધ રહી શકે છે, જેનાથી ક્રૂડ ઓઈલના ભાવ વધશે અને મોંઘવારી લાંબા સમય સુધી ઊંચી રહેશે તેવો ડર રોકાણકારોમાં છે.

2. પ્રોફિટ બુકિંગ (નફાવસૂલી):

બજાર તૂટવા પાછળનું બીજું મોટું કારણ પ્રોફિટ બુકિંગ છે. શરૂઆતી કારોબારમાં બજાર ઊંચા મથાળે પહોંચતા જ રોકાણકારોએ પોતાનો નફો બાંધવાનું શરૂ કરી દીધું. ઊંચા સ્તરે આવેલી આ વેચવાલીએ બજાર પર ભારે દબાણ બનાવ્યું.

3. વિદેશી રોકાણકારો (FII)ની સતત વેચવાલી:

વિદેશી સંસ્થાકીય રોકાણકારો (FII) સતત ભારતીય બજારમાંથી પૈસા ખેંચી રહ્યા છે. આંકડાઓ મુજબ, છેલ્લા ટ્રેડિંગ સેશનમાં જ તેમણે 1,042.70 કરોડ રૂપિયાના શેર વેચી દીધા છે. આ વર્ષમાં અત્યાર સુધીમાં FII કુલ 24.3 અબજ ડોલરના ભારતીય શેર વેચી ચૂક્યા છે, જે બજાર માટે એક નેગેટિવ ફેક્ટર સાબિત થઈ રહ્યું છે.

અગાઉના સેશનમાં કેવી રહી હતી બજારની ચાલ?

બકરી ઈદની રજાના કારણે બજાર બંધ હતું. તે પહેલાના ટ્રેડિંગ સેશનની વાત કરીએ તો, બજારમાં સતત બીજા દિવસે ઘટાડો નોંધાયો હતો. ત્યારે સેન્સેક્સ 141.90 પોઈન્ટ (0.19%) ઘટીને 75,867.80 પર બંધ થયો હતો, જ્યારે નિફ્ટી 6.55 પોઈન્ટ (0.03%) ના મામૂલી ઘટાડા સાથે 23,907.15 ના સ્તરે રહ્યો હતો.

આ પણ વાંચો- LIC Share Price: શું ખરેખર 50% ક્રેશ થયો છે LICનો શેર? જાણો આ મોટા ઘટાડા પાછળનું સાચું કારણ અને રોકાણકારોને ક્યારે મળશે બોનસ શેર

Disclaimer: મનીકંટ્રોલ.કોમ પર આપવામાં આવેલી સલાહ કે વિચારો એક્સપર્ટ/બ્રોકરેજ ફર્મના અંગત મંતવ્યો છે. વેબસાઇટ કે તેનું મેનેજમેન્ટ તેના માટે જવાબદાર નથી. યુઝર્સને મનીકંટ્રોલ દ્વારા સલાહ આપવામાં આવે છે કે કોઈપણ રોકાણનો નિર્ણય લેતા પહેલા હંમેશા પ્રમાણિત નિષ્ણાતની સલાહ લેવી.