શેરબજારમાં તોફાની તેજી: માત્ર 5 સેકન્ડમાં રોકાણકારોની સંપત્તિમાં 13 લાખ કરોડનો વધારો, જાણો શું છે કારણ?

Stock Market Update: ભારતીય શેરબજાર માટે આજનો દિવસ રોકાણકારોના ચહેરા પર ખુશી લાવનારો સાબિત થયો છે. શેરબજારના મુખ્ય ઇન્ડેક્સ સેન્સેક્સ (Sensex) અને નિફ્ટી (Nifty)માં આજે સવારથી જ જોરદાર તેજી જોવા મળી છે. બજાર ખુલતાની સાથે જ સેન્સેક્સમાં 2600 પોઈન્ટ્સનો ઉછાળો નોંધાયો હતો, જેના કારણે માત્ર થોડી જ ક્ષણોમાં રોકાણકારોની સંપત્તિમાં 13 લાખ કરોડ રૂપિયાથી વધુનો વધારો થયો છે.

13 લાખ કરોડથી વધુની સંપત્તિમાં વધારો

ગઈકાલે, 07 એપ્રિલ 2026ના રોજ સેન્સેક્સ 74,616.58 અને નિફ્ટી 50, 23,123.65ના સ્તરે બંધ થયા હતા. પરંતુ આજે બજાર ગેપ-અપ સાથે ખુલ્યું અને જોતજોતામાં જ રોકાણકારોની માલામાલ કરી દીધા. BSE પર લિસ્ટેડ તમામ કંપનીઓનું કુલ માર્કેટ કેપ જે 07 એપ્રિલના રોજ 4,29,26,308.76 કરોડ હતું, તે આજે વધીને 4,43,00,914.91 કરોડ પર પહોંચી ગયું છે. આમ, એક જ દિવસમાં રોકાણકારોની સંપત્તિમાં 13,74,606.15 કરોડનો જંગી ઉછાળો જોવા મળ્યો છે.

બજારમાં તેજી પાછળના 3 મુખ્ય કારણો:

ડોનાલ્ડ ટ્રમ્પની સીઝફાયર પહેલ: અમેરિકી રાષ્ટ્રપતિ ડોનાલ્ડ ટ્રમ્પ દ્વારા ઈરાન સાથે બે અઠવાડિયાના સીઝફાયર (યુદ્ધવિરામ) માટે સહમતી સધાઈ હોવાના સમાચાર આવ્યા છે. આ સમાચાર બાદ સમગ્ર એશિયન બજારોમાં સકારાત્મક માહોલ બન્યો છે.

ક્રૂડ ઓઈલના ભાવમાં ઘટાડો: સીઝફાયરના સમાચારની સીધી અસર ક્રૂડ ઓઈલના ભાવ પર પડી છે. વેસ્ટ ટેક્સાસ ઇન્ટરમીડિયેટ (WTI) ક્રૂડમાં 19% અને ગ્લોબલ બેન્ચમાર્ક બ્રેન્ટ ક્રૂડમાં 16% સુધીનો ઘટાડો નોંધાયો છે. તેલના ભાવ ઘટવા એ ભારતીય અર્થતંત્ર માટે રાહતના સમાચાર છે.

RBIની MPC બેઠક: આજે ભારતીય રિઝર્વ બેંકની મોનેટરી પોલિસી કમિટી (MPC) ની બેઠકના નિર્ણયો જાહેર થવાના છે. રોકાણકારો આ બેઠકમાંથી સકારાત્મક સંકેતોની અપેક્ષા રાખી રહ્યા છે, જેના કારણે બજારમાં ખરીદીનું જોર વધ્યું છે.

બજારની વર્તમાન સ્થિતિ

આજે માત્ર લાર્જ-કેપ જ નહીં, પરંતુ મિડકેપ અને સ્મોલકેપ શેરોમાં પણ જોરદાર ખરીદદારી જોવા મળી રહી છે. BSE ના તમામ સેક્ટરના ઇન્ડેક્સ આજે લીલા નિશાનમાં ટ્રેડ કરી રહ્યા છે, જે દર્શાવે છે કે બજારમાં અત્યારે ચોતરફી તેજીનો માહોલ છે.

અંતમાં કહી શકાય કે આંતરરાષ્ટ્રીય સ્તરે શાંતિની આશા અને ક્રૂડ ઓઈલના ઘટતા ભાવોએ ભારતીય શેરબજારને નવી ઊંચાઈઓ પર પહોંચાડ્યું છે. જોકે, રોકાણકારોએ RBI ના નિર્ણયો અને વૈશ્વિક ઘટનાઓ પર નજર રાખવી જોઈએ.

આ પણ વાંચો- Stocks to Watch: આ ત્રણ ફેક્ટર્સ નક્કી કરશે માર્કેટની ચાલ! ઈન્ફોસિસ અને બાયોકોન સહિત આ સ્ટોક્સ પર રાખો ખાસ નજર

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.