Closing Bell: શેરબજારમાં તોફાની તેજી, સેન્સેક્સ 900 પોઈન્ટ ઉછળીને 80,000ને પાર, નિફ્ટી 24,750ની ઉપર બંધ

Closing Bell: ભારતીય શેરબજારમાં આજે સેન્સેક્સની વિકલી એક્સપાયરીના દિવસે રોકાણકારો માટે બમ્પર કમાણીનો દિવસ રહ્યો. શરૂઆતથી જ બજારમાં શાનદાર તેજીનો માહોલ જોવા મળ્યો હતો, જેના કારણે સેન્સેક્સ અને નિફ્ટી બંને 1 ટકાથી વધુના ઉછાળા સાથે બંધ થયા છે.

આજના કારોબારના અંતે સેન્સેક્સ 899.71 પોઈન્ટ એટલે કે 1.14 ટકાના જંગી ઉછાળા સાથે 80,015.90 ના સ્તર પર બંધ થયો છે. બીજી તરફ, નિફ્ટી 285.40 પોઈન્ટ એટલે કે 1.17 ટકાની મજબૂતી સાથે 24,765.90 ની સપાટી પર બંધ થયો. શેરબજારની સાથે સાથે કરન્સી માર્કેટમાં પણ પોઝિટિવ અસર જોવા મળી, જેમાં રૂપિયો 55 પૈસા મજબૂત થઈને 91.60 પ્રતિ ડોલરના સ્તરે બંધ થયો.

IT સેક્ટરને છોડીને તમામ સેક્ટરમાં હરિયાળી

આજના ટ્રેડિંગ સેશનમાં માત્ર IT (ઇન્ફોર્મેશન ટેક્નોલોજી) સેક્ટરને બાદ કરતા તમામ સેક્ટોરલ ઇન્ડેક્સ લીલા નિશાનમાં બંધ થયા છે.મોટા શેરોની સરખામણીમાં બ્રોડર માર્કેટમાં જબરદસ્ત ખરીદી રહી. નિફ્ટી મિડકેપ ઈન્ડેક્સ 1.52 ટકા અને નિફ્ટી સ્મોલકેપ 1.58 ટકા ઉછળીને બંધ થયા. મેટલ, PSE અને એનર્જી શેરોમાં રોકાણકારોએ દિલ ખોલીને પૈસા લગાવ્યા. સેક્ટર મુજબ જોઈએ તો નિફ્ટી મેટલ ઈન્ડેક્સ સૌથી વધુ 2.3 ટકા ઉછળ્યો હતો. આ ઉપરાંત ફાર્મા, ઓટો, ઓઇલ એન્ડ ગેસ અને કન્સ્ટ્રક્શન ડ્યુરેબલ્સ સેક્ટરમાં પણ સારો ઉછાળો જોવા મળ્યો છે.

ટોપ ગેનર્સ

સેન્સેક્સની કંપનીઓમાં અદાણી પોર્ટ્સ, લાર્સન એન્ડ ટુબ્રો (L&T), ભારત ઇલેક્ટ્રોનિક્સ, રિલાયન્સ ઇન્ડસ્ટ્રીઝ, NTPC, ઇન્ડિગો, મહિન્દ્રા એન્ડ મહિન્દ્રા, પાવર ગ્રીડ, ટાટા સ્ટીલ, મારુતિ અને બજાજ ફાઇનાન્સ સૌથી વધુ ફાયદામાં રહ્યા હતા.

ટોપ લૂઝર્સ

બીજી તરફ ટેક મહિન્દ્રા, ICICI બેંક, HCL ટેક, TCS અને હિન્દુસ્તાન યુનિલિવરના શેરોમાં ઘટાડો જોવા મળ્યો હતો.

ગ્લોબલ માર્કેટમાંથી મળ્યા મજબૂત સંકેતો

ગુરુવારે સવારે એશિયન બજારોમાં પણ ભારે તેજી જોવા મળી હતી. અમેરિકન બજારોની તેજીની સીધી અસર એશિયા પર પડી હતી. દક્ષિણ કોરિયાનો કોસ્પી (Kospi) ઈન્ડેક્સ 12 ટકાથી વધુ ઉછળ્યો, જેણે અગાઉના સેશનની તમામ ખોટ સરભર કરી લીધી. જાપાનનો નિક્કેઈ 225 પણ 4 ટકાથી વધુ વધ્યો. બુધવારે અમેરિકામાં S&P 500 સૂચકાંક 0.78 ટકા, ડાઉ જોન્સ 0.49 ટકા અને ટેકનોલોજી શેરોથી ભરેલો નેસ્ડેક (Nasdaq) 1.29 ટકાના ઉછાળા સાથે બંધ થયો હતો. સર્વિસ સેક્ટરના સારા ડેટાને કારણે આ તેજી આવી હતી.

ક્રૂડ ઓઇલ અને સોનામાં પણ ભડકો

કોમોડિટી માર્કેટમાં ક્રૂડ ઓઇલના ભાવમાં સળંગ પાંચમા દિવસે વધારો નોંધાયો છે. ઈરાન દ્વારા દુનિયાના મુખ્ય ઓઇલ રૂટ 'સ્ટ્રેટ ઓફ હોર્મુઝ' માં જહાજો પર હુમલાની ધમકી આપવામાં આવી છે. આ કારણે ઓઇલની સપ્લાય ખોરવાઈ જવાની ચિંતા વધી છે, જેથી બ્રેન્ટ ક્રૂડ 0.57 ટકા વધીને 82.98 ડોલર પ્રતિ બેરલ પર પહોંચી ગયું છે.

બીજી તરફ, અમેરિકા અને ઈરાન વચ્ચેના વધતા તણાવને કારણે વૈશ્વિક અનિશ્ચિતતા ઊભી થઈ છે. આવા સમયે રોકાણકારો સુરક્ષિત રોકાણ તરીકે સોના તરફ વળ્યા છે. જેના પરિણામે ગુરુવારે સોનાના ભાવમાં પણ 1 ટકાથી વધુનો ઉછાળો જોવા મળ્યો છે.

આ પણ વાંચો-Market View: શેરબજારમાં હજુ એક કડાકો બાકી! નિષ્ણાતોની સલાહ- ઉછાળે ફસાયેલા શેરોમાંથી નીકળી જાઓ