Stock Market Today : બજાર પર આજે આ ખબરોનું દેખાશે અસર, કોઈ ટ્રેડ લેતા પહેલા જાણી લો માર્કેટને અસર કરતાં આ સંકેતો

Stock Market Today : ભારતીય શેરબજારમાં 30 જૂનના રોજ ટ્રેડિંગની શરૂઆત ફ્લેટ અથવા સામાન્ય વધારા સાથે થવાની સંભાવના દેખાઈ રહી છે. સવારે ગિફ્ટ નિફ્ટીમાં મજબૂત વલણ જોવા મળ્યું છે અને તે શરૂઆતી કારોબારમાં 23991.50 ની આસપાસ ટ્રેડ કરી રહ્યો હતો. માર્કેટમાં કોઈપણ નવી પોઝિશન બનાવતા પહેલા રોકાણકારોએ વૈશ્વિક અને સ્થાનિક બજારોના કેટલાક મહત્વપૂર્ણ સંકેતો પર નજર કરવી ખૂબ જ જરૂરી બની જાય છે.

29 જૂને બજારમાં શું થયું?

ગઈકાલે 29 જૂનના રોજ ભારતીય બજારોમાં સતત બે દિવસથી ચાલી આવતી તેજી પર બ્રેક વાગી હતી. મોટાભાગના સેક્ટરમાં વેચવાલીનું દબાણ જોવા મળ્યું હતું. બપોર પછી પ્રોફિટ બુકિંગ વધતા નિફ્ટી ઇન્ટ્રાડેમાં ઘટીને 23924.55 ના લેવલ પર આવી ગયો હતો. ઓટો, આઈટી, ઓઈલ એન્ડ ગેસ તેમજ બેન્કિંગ શેરોમાં રોકાણકારોએ માલ વેચવાનું શરૂ કર્યું હતું. બ્રોડર માર્કેટની નબળાઈએ રોકાણકારોના સેન્ટિમેન્ટ પર વધુ અસર કરી હતી.

કારોબારના અંતે સેન્સેક્સ 372.10 પોઈન્ટ એટલે કે 0.48 ટકાના ઘટાડા સાથે 76728.37 પર બંધ થયો હતો. જ્યારે નિફ્ટી 109.75 પોઈન્ટ અથવા 0.46 ટકા ઘટીને 23946.25 ની સપાટીએ સેટલ થયો હતો.

આજે સવારે 08.15 વાગ્યાની આસપાસ ગિફ્ટ નિફ્ટી 42.50 પોઈન્ટની એટલે કે 0.18 ટકાની તેજી સાથે 23996.50 ના સ્તર પર કારોબાર કરી રહ્યો હતો. માર્કેટના એક્સપર્ટ્સ માને છે કે ટૂંકા ગાળા માટે બજારનું મોમેન્ટમ થોડું નબળું પડ્યું છે અને નિફ્ટી 23800 થી 24200 ની રેન્જમાં ટ્રેડ થવાની અપેક્ષા છે.

એશિયન શેરબજારોની વાત કરીએ તો ત્યાં મિશ્ર પ્રતિસાદ જોવા મળી રહ્યો છે. જાપાનનો નિક્કેઈ ઈન્ડેક્સ 0.87 ટકા વધ્યો છે અને તાઈવાનના માર્કેટમાં પણ 3.23 ટકાનો મોટો ઉછાળો જોવા મળ્યો છે. સાઉથ કોરિયાનો કોસ્પી 0.83 ટકા ઉપર દેખાઈ રહ્યો છે. જોકે બીજી તરફ હેંગસેંગમાં 1.30 ટકા, સ્ટ્રેટ ટાઇમ્સમાં 0.47 ટકા અને શાંઘાઈ કમ્પોઝિટમાં 0.21 ટકાનો ઘટાડો નોંધાયો છે.

અમેરિકન બજારોમાં શાનદાર રેકોર્ડ

સોમવારે અમેરિકન શેરબજારમાં જબરદસ્ત તેજીનો માહોલ રહ્યો હતો. અમેરિકા અને ઈરાન વચ્ચે વિકેન્ડ પર થયેલા તણાવમાં ઘટાડો થતા અને તાજેતરની વેચવાલી બાદ ટેક્નોલોજી શેરોમાં આવેલી નવી ખરીદીના કારણે ડાઉ જોન્સે ક્લોઝિંગનો એક નવો રેકોર્ડ બનાવ્યો છે.

ડાઉ જોન્સ ઈન્ડસ્ટ્રીયલ એવરેજ 306.63 પોઈન્ટ ઉછળીને 52182.74 ના લેવલ પર બંધ રહ્યો હતો. એસએન્ડપી 500 ઈન્ડેક્સમાં પણ 1.18 ટકાની તેજી જોવા મળી હતી અને તે 7440.43 પર પહોંચ્યો હતો. નાસ્ડેક કમ્પોઝિટ 522.53 પોઈન્ટ અથવા 2.07 ટકાના મોટા ઉછાળા સાથે 25820.14 ની સપાટી પર બંધ થવામાં સફળ રહ્યો હતો.

કરન્સી અને કોમોડિટી બજારના અપડેટ્સ

મંગળવારે જાપાનીઝ યેન 1986 પછીના તેના સૌથી નીચલા સ્તરે પહોંચી ગયો છે જેને લઈને ટોક્યો તરફથી દખલગીરી થવાની ચિંતા વધી છે. અમેરિકન જોબ ડેટા આવતા પહેલા ડોલર 13 મહિનાની ટોચ પરથી નીચે આવ્યો છે અને હાલમાં ડોલર ઈન્ડેક્સ 101.2 ના લેવલ પર છે. એશિયન કરન્સી માર્કેટમાં પણ મિશ્ર ટ્રેન્ડ છે જેમાં મલેશિયન રિંગિટ 0.52 ટકા અને ઇન્ડોનેશિયન રૂપિયો 0.40 ટકાના વધારા સાથે મજબૂત દેખાયા છે. જ્યારે દક્ષિણ કોરિયાઈ વોનમાં 0.51 ટકાનો ઘટાડો જોવા મળ્યો છે.

ક્રૂડ ઓઇલના ભાવમાં થોડી નરમાઈ જોવા મળી રહી છે. દોહામાં અમેરિકા અને ઈરાન વચ્ચેની સંભવિત વાતચીત પર રોકાણકારો બારીકાઈથી નજર રાખી રહ્યા છે. ડબલ્યુટીઆઈ ક્રૂડમાં 0.81 ટકા અને બ્રેન્ટ ક્રૂડમાં 1.04 ટકાની મૂવમેન્ટ નોંધાઈ છે. ગોલ્ડ માર્કેટની વાત કરીએ તો કોમેક્સ પર સોનાના ભાવમાં 1.61 ટકા અને ચાંદીમાં 2.72 ટકાનો નોંધપાત્ર ઘટાડો આવ્યો છે. બીજી બાજુ અમેરિકામાં 10 વર્ષના ટ્રેઝરી બોન્ડ પર યીલ્ડ 4.37 ટકા અને 2 વર્ષના બોન્ડ પર 4.10 ટકાના સ્તરે જોવા મળી રહી છે.

FII અને DII ના આંકડા

છેલ્લા ટ્રેડિંગ સેશનમાં 29 જૂનના આંકડા પર નજર કરીએ તો વિદેશી સંસ્થાકીય રોકાણકારો એટલે કે FII એ બજારમાંથી 1350 કરોડ રૂપિયાના શેર વેચીને નેટ સેલર રહ્યા હતા. જ્યારે સ્થાનિક સંસ્થાકીય રોકાણકારો એટલે કે DII એ બજારને સપોર્ટ આપ્યો હતો. તેમણે સતત પાંચમા સેશનમાં પોતાની ખરીદી જાળવી રાખીને 2800 કરોડ રૂપિયાના શેર ખરીદ્યા હતા.