Stocks to Watch: નિફ્ટીની એક્સપાયરી પર આ સ્ટોક્સમાં જોવા મળશે તેજી, વેદાંતા અને JSW સ્ટીલ પર રહેશે ખાસ નજર

Stocks to Watch: વૈશ્વિક બજારમાંથી મળી રહેલા સારા સંકેતોને કારણે આજે ભારતીય શેરબજારમાં રોનક જોવા મળી શકે છે. ખાસ કરીને અમેરિકા અને ઈરાન વચ્ચે શાંતિની આશા વધતા કાચા તેલના ભાવમાં નરમાશ આવી છે, જેની સીધી અસર ગિફ્ટ નિફ્ટી પર જોવા મળી રહી છે. આજે નિફ્ટીની વીકલી એક્સપાયરી હોવાથી માર્કેટમાં ઉતાર-ચઢાવ અને તેજી બંનેની શક્યતા છે.

ગઈકાલે એટલે કે 20 એપ્રિલના રોજ સેન્સેક્સ 78,520.30 અને નિફ્ટી 24,364.85 ના સ્તર પર નજીવા વધારા સાથે બંધ થયા હતા. આજે ઇન્ટ્રા-ડે ટ્રેડિંગમાં કેટલાક ખાસ કોર્પોરેટ અપડેટ્સને કારણે અમુક શેરોમાં એક્શન જોવા મળી શકે છે.

આજે આ કંપનીઓના પરિણામો પર રહેશે નજર

આજે માર્કેટમાં અનેક દિગ્ગજ કંપનીઓ પોતાના ત્રિમાસિક પરિણામો જાહેર કરવાની છે, જેમાં મુખ્યત્વે, HCL ટેકનોલોજી, નેસ્લે ઇન્ડિયા અને ટાટા એલ્ક્સી. આ ઉપરાંત પર્સિસ્ટન્ટ સિસ્ટમ્સ, ટાટા ઇન્વેસ્ટમેન્ટ અને સનટેક રિયલ્ટી જેવી કંપનીઓ પર પણ રોકાણકારોની નજર રહેશે.

PNB Housing Finance: કંપનીનો નફો વાર્ષિક ધોરણે 14.4% વધીને 648.7 કરોડ રૂપિયા થયો છે. સાથે જ કંપનીએ 8 રૂપિયા ડિવિડન્ડની પણ જાહેરાત કરી છે.

NELCO: આ કંપની ખોટમાંથી નફામાં આવી છે, જે શેર માટે પોઝિટિવ ગણી શકાય.

Ugro Capital: વ્યાજની આવક વધી છે પરંતુ નફામાં 27.1% નો ઘટાડો નોંધાયો છે.

કોર્પોરેટ ન્યૂઝ અને બિઝનેસ અપડેટ્સ

1. Vedanta: વેદાંતાના ડીમર્જરની પ્રક્રિયા 1 મેથી અમલમાં આવશે. હવે કંપની ચાર અલગ-અલગ લિસ્ટેડ એકમોમાં વહેંચાશે, જેમાં એલ્યુમિનિયમ, સ્ટીલ અને પાવર બિઝનેસ અલગ હશે.

2. JSW Steel: કંપનીએ દક્ષિણ કોરિયાની પોસ્કો (POSCO) સાથે મળીને ઓડિશામાં નવો સ્ટીલ પ્લાન્ટ સ્થાપવા માટે કરાર કર્યા છે. આ લાંબા ગાળાના રોકાણકારો માટે સારા સમાચાર છે.

3. TVS Motor: ઇલેક્ટ્રિક થ્રી-વ્હીલર બનાવવા માટે કંપનીએ હ્યુન્ડાઈ મોટર સાથે હાથ મિલાવ્યા છે. ઉપરાંત, કંપનીએ ઝામ્બિયાના માર્કેટમાં પણ પ્રવેશ કર્યો છે.

4. AU Small Finance Bank: 27 એપ્રિલના રોજ મળનારી બોર્ડ મીટિંગમાં ફંડ એકઠું કરવા અને ડિવિડન્ડ બાબતે નિર્ણય લેવામાં આવશે.

બલ્ક ડીલ્સ અને અન્ય અપડેટ્સ

Ind-Swift Lab: HCP ઇન્વેસ્ટમેન્ટ્સે આ કંપનીમાં મોટો હિસ્સો વેચ્યો છે, જેથી આજે દબાણ જોવા મળી શકે.

F&O Ban: આજે SAIL (સેલ) પર ટ્રેડિંગ પ્રતિબંધ રહેશે, જ્યારે સન્માન કેપિટલ આ લિસ્ટમાંથી બહાર આવી છે.

ડિસ્ક્લેમર: અહીં આપેલી માહિતી સ્ટોક પર્ફોમન્સ પર આધારિત છે. એ નોંધવું અગત્યનું છે કે બજારમાં રોકાણ બજારના જોખમોને આધીન છે. રોકાણકાર તરીકે, પૈસાનું રોકાણ કરતા પહેલા હંમેશા નિષ્ણાતની સલાહ લો. મનીકંટ્રોલ ક્યારેય કોઈને અહીં પૈસા રોકવાની સલાહ આપતું નથી.