US Fed Meeting: અમેરિકામાં વ્યાજ દરો યથાવત, જાણો ભારતીય શેરબજાર પર શું થશે અસર અને Gift Niftyના સંકેત

Gift Nifty Indicator: બુધવારે ભારતીય શેરબજારમાં જબરદસ્ત તેજી જોવા મળી હતી, પરંતુ ગુરુવારે બજારની શરૂઆત થોડી સુસ્ત અને સામાન્ય ઘટાડા સાથે થઈ શકે છે. અમેરિકાના બજારોમાં રાતોરાત થયેલી ભારે વેચવાલી અને US Federal Reserveના નિર્ણય બાદ, આજે સવારે 8 વાગ્યાની આસપાસ GIFT Nifty 88 પોઈન્ટ 0.36% ઘટીને 24,215 પર ટ્રેડ કરી રહ્યો હતો.

આ આંકડાઓ સ્પષ્ટ સંકેત આપે છે કે આજે Nifty 50 બુધવારના ક્લોઝિંગ લેવલ 24,250.20થી નીચે ખૂલી શકે છે. આપને જણાવી દઈએ કે ગઈકાલે Sensex 888.68 પોઈન્ટ ઉછળીને 77,654.60 પર અને Nifty 264.85 પોઈન્ટ વધીને 24,250.20 પર બંધ થયો હતો.

US ફેડ મીટિંગનો નિર્ણય

અમેરિકાની સેન્ટ્રલ બેન્કની બે દિવસીય મીટિંગ પૂરી થઈ ગઈ છે. અપેક્ષા મુજબ, ચેરમેન કેવિન વૉર્શના નેતૃત્વમાં વ્યાજ દરોમાં કોઈ જ ફેરફાર કરવામાં આવ્યો નથી. સતત પાંચમી વખત ફેડરલ રિઝર્વે પોતાના બેન્ચમાર્ક વ્યાજ દરો 3.50% થી 3.75% ની રેન્જમાં જાળવી રાખ્યા છે. મોંઘવારી અને આર્થિક વિકાસના આંકડાઓ જોયા બાદ જ ભવિષ્યમાં કોઈ ફેરફાર કરવામાં આવશે.

અમેરિકન બજાર: આર્ટિફિશિયલ ઇન્ટેલિજન્સ (AI) પાછળ થતા ખર્ચ અંગે રોકાણકારોની ચિંતા વધી છે. જેને કારણે અમેરિકામાં ટેકનોલોજી શેરોમાં ભારે કડાકો બોલ્યો છે. Dow Jones 2.19%, S&P 500 1.52% અને Nasdaq 1.74% ના મોટા ઘટાડા સાથે બંધ થયા હતા.

એશિયન બજાર: બીજી તરફ એશિયન બજારોમાં આજે સારો માહોલ છે. જાપાનના Nikkei માં 2% નો ઉછાળો આવ્યો છે અને દક્ષિણ કોરિયાના Kospi માં 4% ની શાનદાર રિકવરી જોવા મળી છે.

ક્રૂડ ઓઇલના ભાવમાં નરમાશ

મિડલ ઇસ્ટમાં ચાલી રહેલા તણાવ અને ડોનાલ્ડ ટ્રમ્પના નિવેદનો છતાં, હાલ પૂરતી ક્રૂડ ઓઇલની કિંમતોમાં થોડો ઘટાડો નોંધાયો છે. બ્રેન્ટ ક્રૂડ 1.42% ઘટીને 89.45 ડોલર પ્રતિ બેરલ અને WTI ક્રૂડ 0.66% ઘટીને 83.90 ડોલર પ્રતિ બેરલ પર આવી ગયું છે. જોકે, બજારના નિષ્ણાતો માને છે કે ક્રૂડના ભાવ ગમે ત્યારે 90 ડોલરને પાર કરી શકે છે, જે એક મોટું જોખમ છે.

ભારતીય બજાર પર સીધી અસર અને એક્સપર્ટ્સની સલાહ

નિફ્ટીના લેવલ્સ: એનરિચ મનીના CEO પોનમુડી આર. ના જણાવ્યા અનુસાર, ફેડનો નિર્ણય જાહેર થતા બજારની એક મોટી અનિશ્ચિતતા દૂર થઈ છે. નિફ્ટી માટે હાલમાં 24,300-24,400 નું લેવલ એક મોટું રેઝિસ્ટન્સ છે. જો બજાર આ લેવલને પાર કરશે તો તે 24,500-24,600 સુધી જઈ શકે છે. નીચેની તરફ 24,150-24,000 નો મજબૂત સપોર્ટ છે. જો 24,000 નું લેવલ તૂટશે તો બજારમાં નફો બુક થવાની (પ્રોફિટ બુકિંગ) શરૂઆત થઈ શકે છે અને નિફ્ટી 23,800 સુધી ગગડી શકે છે.

મુખ્ય જોખમ: જિયોજિત ઇન્વેસ્ટમેન્ટ્સના વીકે વિજયકુમારનું માનવું છે કે, ભારતીય બજાર પર ફેડના નિર્ણયની કોઈ નકારાત્મક અસર નહીં પડે. પરંતુ આપણા બજાર માટે સૌથી મોટી ચિંતા મિડલ ઇસ્ટનો તણાવ અને ક્રૂડ ઓઇલના ભાવ છે. અત્યારે ઘરેલું (DII) અને વિદેશી (FII) રોકાણકારોની ખરીદી બજારને મજબૂત સપોર્ટ આપી રહી છે.

આ પણ વાંચો- Bajaj Housing Q1 Results: બજાજ ગ્રુપની આ કંપનીનો નફો 22.6% ઉછળીને 715 કરોડ થયો, હવે રોકાણકારોની નજર શેર પર

ડિસ્ક્લેમર: આ માહિતી માત્ર જાણકારીના હેતુથી આપવામાં આવી છે. અહીં જણાવવું જરૂરી છે કે શેરબજારમાં રોકાણ એ બજારના જોખમોને આધીન છે. રોકાણકારોએ કોઈપણ જગ્યાએ નાણાં રોકતા પહેલા હંમેશા નિષ્ણાતની સલાહ લેવી જોઈએ. મનીકંટ્રોલ દ્વારા ક્યારેય પણ કોઈને રોકાણ કરવાની સલાહ આપવામાં આવતી નથી.