શેર બજારમાં કડાકા વચ્ચે ક્યાં રોકાણ કરવું? નિફ્ટી કે શેર્સમાં? એક્સપર્ટે જણાવ્યા 2 દમદાર સેક્ટર

Share Market Strategy: ઈરાન અને અમેરિકા-ઈઝરાયેલ વચ્ચે ચાલી રહેલા તણાવ અને યુદ્ધની સ્થિતિને કારણે દુનિયાભરના શેર બજારોમાં ભારે ઉથલપાથલ મચી ગઈ છે. ભારતીય શેર બજારમાં પણ મોટાભાગના શેરોમાં ભારે ઘટાડો જોવા મળ્યો છે. હાલમાં નિફ્ટી (Nifty) તેની ઓલ-ટાઈમ હાઈ સપાટીથી 13% કરતા પણ વધુ નીચે આવી ગયો છે. આવા સમયે રોકાણકારોના મનમાં એક જ સવાલ છે કે આ ઘટાડામાં ઈન્ડેક્સ (નિફ્ટી-સેન્સેક્સ) પર દાવ લગાવવો જોઈએ કે પછી કોઈ ચોક્કસ શેરોમાં રોકાણ કરવું જોઈએ?

ઈન્ડેક્સમાં રોકાણ કરવું કે શેરમાં?

જો તમારી પાસે રોકડ (Cash) પડી છે અને તમે આ સસ્તા થયેલા માર્કેટમાં એન્ટ્રી લેવાનું વિચારી રહ્યા છો, તો થોડી સાવધાની રાખવી જરૂરી છે. મનીકંટ્રોલ સાથેની એક વાતચીતમાં અસિત સી મહેતા ઈન્વેસ્ટમેન્ટ ઈન્ટરમીડિએટ્સના પ્રમુખ (ઈન્સ્ટિટ્યુશનલ રિસર્ચ) સિદ્ધાર્થ ભામરેએ રોકાણકારોને ખાસ સલાહ આપી છે. તેમનું કહેવું છે કે અત્યારે ઈન્ડેક્સ લેવલ પર "બોટમ ફિશિંગ" એટલે કે બજાર સાવ તળિયે છે એમ માનીને નિફ્ટીમાં મોટી ખરીદી કરવી ટાળવું જોઈએ. તેની જગ્યાએ અમુક પસંદગીના સેક્ટરમાં પૈસા લગાવવા વધુ હિતાવહ છે.

આ 2 સેક્ટરમાં છે શાનદાર તક

* ગેસ ડિસ્ટ્રિબ્યુશન (Gas Distribution)

* ઈન્ફ્રાસ્ટ્રક્ચર (Infrastructure)

યુદ્ધના કારણે આ બંને સેક્ટરના શેરોમાં મોટો ઘટાડો આવ્યો છે. પરંતુ એક્સપર્ટ માને છે કે પશ્ચિમ એશિયામાં યુદ્ધનો માહોલ શાંત થતાં જ આ સેક્ટર્સની કંપનીઓની કમાણી (રેવેન્યુ) બહુ જલ્દી તેમના જૂના લેવલ પર આવી જશે. યુદ્ધ આજે નહીં તો કાલે પૂરું થવાનું જ છે, તેથી આ સેક્ટર્સ ભવિષ્યમાં સારો નફો આપી શકે છે.

યુદ્ધની અસર અને ક્રૂડ ઓઈલના ભાવ

ઈરાન અને અમેરિકા વચ્ચેની લડાઈ ક્યારે પૂરી થશે તે વિશે અત્યારે કંઈ પણ કહેવું ઉતાવળ ગણાશે. આ યુદ્ધને કારણે હોર્મુઝની સામુદ્રધુની (Strait of Hormuz) માં જહાજોની અવરજવર પર ખરાબ અસર પડી છે. જો એપ્રિલ મહિનામાં પણ આ જ સ્થિતિ ચાલુ રહેશે, તો કાચા તેલ (Crude Oil) ના ભાવ ઊંચા જ રહેશે. જ્યા સુધી ક્રૂડ ઓઈલના ભાવ ઘટીને 75 ડોલર (Per Barrel) થી નીચે નહીં આવે, ત્યાં સુધી બજારમાં દબાણ જોવા મળી શકે છે.

માર્કેટનું વેલ્યુએશન કેટલું આકર્ષક?

મોંઘા ક્રૂડ ઓઈલ અને એનર્જીની અછતને કારણે મેન્યુફેક્ચરિંગ અને વપરાશ (Consumption) પર અસર પડશે, જેની સીધી અસર સર્વિસ સેક્ટર પર પણ જોવા મળશે. આના કારણે નાણાકીય વર્ષ 2027 ના કમાણીના અંદાજોમાં ઘટાડો પણ થઈ શકે છે.

બજારમાં અત્યારે જે ઘટાડો આવ્યો છે, શું તેનાથી શેરોના ભાવ 6 મહિના પહેલા કરતા વધુ સસ્તા અને આકર્ષક થઈ ગયા છે? આ સવાલના જવાબમાં એક્સપર્ટ કહે છે કે બધું જ યુદ્ધ કેટલો સમય ચાલે છે તેના પર નિર્ભર છે. જો યુદ્ધ જલ્દી પૂરું થઈ જાય અને ઓઈલ સપ્લાય સામાન્ય થઈ જાય, તો આજના ઘટાડાએ શેરોના વેલ્યુએશનને ખરેખર ખૂબ આકર્ષક બનાવી દીધા છે.

આ પણ વાંચો- શેરબજારમાં આ કંપનીનો દબદબો! ગુજરાત સરકાર તરફથી મળ્યો 698 કરોડનો મેગા ઓર્ડર, શું તમારા પોર્ટફોલિયોમાં છે આ શેર?