Bandhan Bank Share Price: Q4 ના જોરદાર પરિણામો બાદ શેરમાં 12% ની તેજી, રોકાણકારોને મળશે ડિવિડન્ડ; જાણો શું છે નવા ટાર્ગેટ

Bandhan Bank Share Price: શેરબજારમાં આજે બંધન બેંક (Bandhan Bank)ના શેરધારકો માટે ખુશીના સમાચાર આવ્યા છે. 29 એપ્રિલના રોજ બેંકના શેરમાં જોરદાર તેજી જોવા મળી હતી. BSE પર બંધન બેંકનો શેર તેના અગાઉના બંધ ભાવથી 12.6% ઉછળીને 200.80 રૂપિયાની સપાટીએ પહોંચી ગયો હતો. આ તેજી પાછળનું મુખ્ય કારણ જાન્યુઆરી-માર્ચ 2026 ક્વાર્ટરના શાનદાર નાણાકીય પરિણામો છે.

નફામાં 68%નો તોતિંગ વધારો

માર્ચ 2026ના ક્વાર્ટરમાં બંધન બેંકનો શુદ્ધ નફો (Net Profit) વાર્ષિક ધોરણે 68% વધીને 534.1 કરોડ રૂપિયા રહ્યો છે. નોંધનીય છે કે ગયા વર્ષે સમાન ગાળામાં બેંકનો નફો 317.9 કરોડ રૂપિયા હતો. બેંકની શુદ્ધ વ્યાજ આવક (NII) પણ 1.4% ના વધારા સાથે 2,795.6 કરોડ રૂપિયા પર પહોંચી છે.

એસેટ ક્વોલિટીમાં મોટો સુધારો

* ગ્રોસ NPA: ગયા વર્ષના 4.7% થી ઘટીને હવે 3.27% પર આવી ગયો છે.

* નેટ NPA: જે માર્ચ 2025 માં 1.3% હતો, તે હવે ઘટીને માત્ર 0.97% રહ્યો છે.

બિઝનેસ ગ્રોથ અને ડિવિડન્ડની જાહેરાત

બેંકના અહેવાલ મુજબ, માર્ચ 2026 ક્વાર્ટરમાં તેના એડવાન્સિસ (ધિરાણ) વાર્ષિક ધોરણે 12.6% વધીને 1.54 લાખ કરોડ રૂપિયા થયા છે. જ્યારે ડિપોઝિટ્સમાં 10% નો વધારો જોવા મળ્યો છે, જે 1.66 લાખ કરોડ રૂપિયા પર પહોંચી છે.

આ સારા પ્રદર્શનને પગલે બેંકના બોર્ડે નાણાકીય વર્ષ 2026 માટે શેરધારકોને 1.50 રૂપિયા પ્રતિ શેર ડિવિડન્ડ આપવાની જાહેરાત કરી છે. આગામી વાર્ષિક સામાન્ય સભામાં આ અંગે મંજૂરી લેવામાં આવશે અને ત્યારબાદ રેકોર્ડ ડેટ જાહેર કરવામાં આવશે.

શું કહે છે દિગ્ગજ બ્રોકરેજ ફર્મ્સ?

બંધન બેંકના સારા પ્રદર્શનને જોઈને મોટી બ્રોકરેજ ફર્મ્સ પણ તેજીની આશા રાખી રહી છે:

CLSA: આઉટપરફોર્મ રેટિંગ જાળવી રાખ્યું છે અને ટાર્ગેટ પ્રાઈઝ વધારીને 220 રૂપિયા કરી છે. બ્રોકરેજનું કહેવું છે કે લાંબા સમય બાદ બેંકની એસેટ ક્વોલિટીમાં સુધારો થયો છે.

Jefferies: શેરમાં બાય રેટિંગ સાથે 215 રૂપિયા નો ટાર્ગેટ આપ્યો છે.

UBS: ન્યુટ્રલ રેટિંગ સાથે ટાર્ગેટ વધારીને 200 રૂપિયા કર્યો છે. જોકે, UBS મુજબ શેરમાં સુધારાની અસર મોટાભાગે કિંમતોમાં જોવા મળી ચૂકી છે.

છેલ્લા એક મહિનામાં બંધન બેંકનો શેર 35% જેટલો મજબૂત થયો છે અને તાજેતરની ખરીદીને કારણે બેંકનું માર્કેટ કેપ 32,200 કરોડ રૂપિયાને પાર કરી ગયું છે. પ્રમોટર્સ પાસે બેંકમાં 38.98% હિસ્સો છે. રોકાણકારો માટે એસેટ ક્વોલિટીમાં સુધારો અને ડિવિડન્ડની જાહેરાત સારા સંકેત માનવામાં આવી રહ્યા છે.

આ પણ વાંચો- Maruti Suzuki Share Price: પરિણામો બાદ મારૂતિના શેરમાં તેજીનો ફટાકડો, જાણો એક્સપર્ટ્સની સલાહ - ખરીદવો, વેચવો કે હોલ્ડ કરવો?

Disclaimer: મનીકંટ્રોલ.કોમ પર આપવામાં આવેલી સલાહ કે વિચારો એક્સપર્ટ/બ્રોકરેજ ફર્મના અંગત મંતવ્યો છે. વેબસાઇટ કે તેનું મેનેજમેન્ટ તેના માટે જવાબદાર નથી. યુઝર્સને મનીકંટ્રોલ દ્વારા સલાહ આપવામાં આવે છે કે કોઈપણ રોકાણનો નિર્ણય લેતા પહેલા હંમેશા પ્રમાણિત નિષ્ણાતની સલાહ લેવી.