BHELના શેરમાં તોફાની તેજી: Q4ના નફામાં થયો અઢી ગણો વધારો, Morgan Stanleyએ આપ્યો 444નો મોટો ટાર્ગેટ

BHEL Share Price Target: સરકારી કંપની ભારત હેવી ઇલેક્ટ્રિકલ્સ લિમિટેડ (BHEL) ના શેરધારકો માટે સારા સમાચાર આવ્યા છે. માર્ચ 2026 ના ક્વાર્ટરના પરિણામો જાહેર થયા બાદ સોમવાર અને મંગળવાર બંને દિવસે BHEL ના શેરમાં જોરદાર ઉછાળો જોવા મળ્યો છે. કંપનીએ નફા અને આવકના મામલે તમામ અંદાજોને પાછળ છોડી દીધા છે, જેના કારણે શેરબજારના નિષ્ણાતો પણ આ સ્ટોક પર ફિદા થયા છે.

Q4 પરિણામોમાં બમ્પર નફો

BHEL દ્વારા જાહેર કરવામાં આવેલા આંકડા મુજબ, માર્ચ 2026 ના ક્વાર્ટરમાં કંપનીનો કન્સોલિડેટેડ નેટ પ્રોફિટ 1,290.47 કરોડ નોંધાયો છે. જો આ આંકડાની સરખામણી ગયા વર્ષના સમાન ક્વાર્ટર સાથે કરવામાં આવે, તો ત્યારે નફો 504.45 કરોડ હતો. એટલે કે કંપનીના નફામાં અઢી ગણાથી પણ વધુનો જંગી વધારો થયો છે.

માત્ર નફો જ નહીં, પણ આવકમાં પણ મોટો ઉછાળો જોવા મળ્યો છે. ચોથા ક્વાર્ટરમાં કંપનીની કુલ આવક વધીને 12,553.50 કરોડ થઈ ગઈ છે, જે ગયા વર્ષે આ જ સમયગાળામાં 9,142.64 કરોડ હતી. ખાસ કરીને પાવર સેગમેન્ટમાંથી થતી આવક 9,509.85 કરોડ રહી છે. નાણાકીય વર્ષ 2025-26 માટે કંપનીનો કુલ નફો 1,600.26 કરોડ રહ્યો છે, જે અગાઉના વર્ષના 533.90 કરોડની સરખામણીએ ઘણો વધારે છે.

શાનદાર પરિણામોની અસર સીધી શેરના ભાવ પર જોવા મળી હતી. મંગળવારે પણ BHEL ના શેર 2% થી વધુના વધારા સાથે ટ્રેડ થઈ રહ્યા હતા. અગાઉ સોમવારે BSE પર શેર 6.97% ના વધારા સાથે 376.95 પર બંધ થયો હતો. ટ્રેડિંગ દરમિયાન શેરે 398.95 ની સપાટી વટાવીને તેની 52-સપ્તાહની નવી હાઈ સપાટી બનાવી હતી. NSE પર પણ આ શેર 7.6% ની મજબૂતી સાથે 379.20 પર બંધ રહ્યો હતો.

Morgan Stanley એ વધાર્યો ટાર્ગેટ

ગ્લોબલ બ્રોકરેજ ફર્મ મોર્ગન સ્ટેનલી (Morgan Stanley) એ BHEL ના સ્ટોક પર પોતાની 'Overweight' રેટિંગ જાળવી રાખી છે. બ્રોકરેજ ફર્મે BHEL માટે 444 નો નવો ટાર્ગેટ પ્રાઈસ સેટ કર્યો છે. નિષ્ણાતોના મતે, વર્તમાન સ્તરથી આ શેરમાં હજુ પણ 17% સુધીની તેજી આવી શકે છે.

શા માટે વધી શકે છે ભાવ?

મોર્ગન સ્ટેનલીના મતે, કંપનીનું રેવન્યુ એક્ઝિક્યુશન સુધરી રહ્યું છે અને પાવર માર્જિનમાં પણ સ્થિરતા જોવા મળી રહી છે, જે કંપની માટે પોઝિટિવ પાસું છે. ભારતમાં હાલમાં જે રીતે કેપેક્સ (CapEx) અને પાવર સાયકલ તેજીમાં છે, તેમાં BHEL એક મજબૂત સ્થિતિમાં છે. આ કારણોસર લાંબા ગાળાના રોકાણકારો માટે આ એક આકર્ષક વિકલ્પ બની શકે છે.

જો તમે સરકારી કંપનીઓના શેરમાં રોકાણ કરવા ઈચ્છતા હોવ, તો BHEL ના પરિણામો અને બ્રોકરેજ ફર્મનો આ નવો ટાર્ગેટ તમારા માટે મહત્વનો સાબિત થઈ શકે છે. જોકે, શેરબજારમાં રોકાણ કરતા પહેલા હંમેશા તમારા નાણાકીય સલાહકારની મદદ લેવી જરૂરી છે.

આ પણ વાંચો- Stock Market Update: નિફ્ટીમાં 24,300નો લેવલ તોડવો જરૂરી, જાણો કયા સ્તરે કમાણીની તક અને ક્યાં સાવધાન રહેવું?

Disclaimer: મનીકંટ્રોલ.કોમ પર આપવામાં આવેલી સલાહ કે વિચારો એક્સપર્ટ/બ્રોકરેજ ફર્મના અંગત મંતવ્યો છે. વેબસાઇટ કે તેનું મેનેજમેન્ટ તેના માટે જવાબદાર નથી. યુઝર્સને મનીકંટ્રોલ દ્વારા સલાહ આપવામાં આવે છે કે કોઈપણ રોકાણનો નિર્ણય લેતા પહેલા હંમેશા પ્રમાણિત નિષ્ણાતની સલાહ લેવી.