ઈન્કમ ટેક્સ બાદ હવે કોર્પોરેટ ફાઈલિંગમાં થશે મોટા ફેરફાર, સરકાર કંપનીઓ અને LLP માટે લાવી રહી છે નવા નિયમો

ઈન્કમ ટેક્સ રિટર્નની પ્રક્રિયાને સરળ બનાવ્યા બાદ હવે કેન્દ્ર સરકાર કોર્પોરેટ જગત માટે મોટા સુધારા કરવા જઈ રહી છે. સરકાર કંપનીઓ અને LLP ફર્મ્સ માટે હાલના કોર્પોરેટ ફાઈલિંગના નિયમોમાં મોટા ફેરફારો કરવાની તૈયારીમાં છે. આ સુધારાનો મુખ્ય ઉદ્દેશ્ય વેપાર કરવાની પ્રક્રિયાને વધુ સરળ બનાવવાનો છે.

સૂત્રો પાસેથી મળેલી માહિતી મુજબ, કોર્પોરેટ અફેર્સ મંત્રાલય (MCA) ટૂંક સમયમાં આ અંગે એક કેબિનેટ નોટ મોકલશે.

સીએનબીસી અવાજના અહેવાલ મુજબ, સરકાર રજિસ્ટ્રાર ઓફ કંપનીઝ (RoC) હેઠળ આવતા વિવિધ ફોર્મ્સને 'રેશનલાઈઝ' એટલે કે તર્કબદ્ધ અને સરળ બનાવવા જઈ રહી છે. હાલમાં MCA પોર્ટલ પર ભરવા પડતા ફોર્મ્સ ઘણા જટિલ અને લાંબા હોય છે, જેને હવે ટૂંકા અને સરળ બનાવવામાં આવશે.

આ માટે સરકાર કંપની એક્ટ અને એલએલપી એક્ટમાં જરૂરી સુધારા લાવવાની તૈયારી કરી રહી છે. આ ફેરફારોથી કંપનીઓ માટે કાયદાકીય પાલન કરવું સરળ બની જશે.

60 થી વધુ ફોર્મ્સનું ભારણ થશે ઓછું

હાલની વ્યવસ્થા મુજબ, કંપનીઓએ અલગ-અલગ સમયે MCA પોર્ટલ પર લગભગ 60 થી વધુ પ્રકારના ફોર્મ ભરવા પડે છે. ઘણીવાર એકની એક માહિતી વારંવાર ભરવાની જરૂર પડે છે. નવા સુધારા બાદ:

બિનજરૂરી ફોર્મ્સની સંખ્યા ઘટાડવામાં આવશે.

એક જ માહિતી વારંવાર ભરવી ન પડે તેવી વ્યવસ્થા કરાશે.

ફોર્મ ભરવાની પ્રક્રિયા ઝડપી અને સરળ બનશે.

ફી સ્ટ્રક્ચર અને નિયમોમાં પણ ફેરફાર

સૂત્રોના જણાવ્યા મુજબ, સરકારનું મુખ્ય ફોકસ 'ડીક્રિમિનલાઈઝેશન' પર છે, એટલે કે નાની-મોટી ભૂલો માટે ફોજદારી કાર્યવાહીને બદલે દંડની જોગવાઈ કરવી. આ ઉપરાંત, હાલના ફી સ્ટ્રક્ચરને પણ સરળ બનાવવામાં આવશે. આનાથી કંપનીઓ અને LLP ફર્મ્સ પર રેગ્યુલેટરી બોજ ઘટશે.

ક્યારે લાગુ થશે આ ફેરફારો?

આ તમામ સુધારાઓ માટે કેબિનેટ નોટ તૈયાર કરી લેવામાં આવી છે. કોર્પોરેટ અફેર્સ મંત્રાલય ટૂંક સમયમાં કેબિનેટની મંજૂરી માટે આ નોટ મોકલશે. આશા રાખવામાં આવી રહી છે કે સંસદના બજેટ સત્રના બીજા ભાગમાં આ અંગેના સુધારા બિલ રજૂ કરવામાં આવી શકે છે. જો આ ફેરફારો મંજૂર થશે, તો દેશના કોર્પોરેટ સેક્ટર માટે કામકાજ કરવું વધુ સરળ બની જશે.

આ પણ વાંચો-January WPI : મોંઘવારીનો ડામ - જાન્યુઆરીમાં જથ્થાબંધ મોંઘવારી 10 મહિનાની ટોચે, આંકડો 0.83% થી વધીને 1.81% પર પહોંચ્યો