ઈન્ડિગોના મુસાફરોને મોટો ઝટકો! બાળકોની ટિકિટથી લઈને એક્સ્ટ્રા લગેજ સુધીની સેવાઓ થઈ મોંઘી, જુઓ નવું લિસ્ટ

IndiGo baggage allowance: જો તમે આગામી દિવસોમાં હવાઈ મુસાફરી કરવાનું પ્લાનિંગ કરી રહ્યા છો, તો આ સમાચાર તમારા માટે ખૂબ જ અગત્યના છે. દેશની સૌથી મોટી એરલાઈન કંપની ઈન્ડિગો એ પોતાના મુસાફરોને મોટો ઝટકો આપ્યો છે. કંપનીએ ફ્લાઈટ ટિકિટ સિવાયની વધારાની સુવિધાઓના ચાર્જમાં મોટો વધારો ઝીંકી દીધો છે.

હવે તમારે નાના બાળકો સાથે મુસાફરી કરવા, નિર્ધારિત વજન કરતા વધારે સામાન લઈ જવા કે પછી જલ્દી ચેક-ઈન કરવા માટે પહેલા કરતા વધારે ખિસ્સા ખાલી કરવા પડશે. આ નવા ફેરફારો ડોમેસ્ટિક અને ઈન્ટરનેશનલ બંને ફ્લાઈટ્સ માટે લાગુ કરવામાં આવ્યા છે. ચાલો તમને વિગતવાર જણાવીએ કે કઈ સેવામાં કેટલો વધારો થયો છે.

નાના બાળકો સાથેની મુસાફરી થઈ મોંઘી

ઈન્ડિગોએ નાના બાળકો સાથે મુસાફરી કરવાના ચાર્જમાં સીધો 1,000 રૂપિયાનો વધારો કર્યો છે. પહેલા આ ચાર્જ 2,000 રૂપિયા હતો, જે હવે વધારીને 3,000 રૂપિયા કરી દેવામાં આવ્યો છે. આ નિયમ 3 દિવસથી લઈને 2 વર્ષ સુધીની ઉંમરના બાળકો પર લાગુ પડે છે. ખાસ ધ્યાન રાખો કે આ ચાર્જ ભર્યા પછી પણ બાળકને અલગથી સીટ નથી મળતી, પરંતુ મુસાફરી માટે તેમની ટિકિટ બુક કરવી ફરજિયાત હોય છે.

ઘણીવાર માતા-પિતા પોતાના બાળકોને એકલા ફ્લાઈટમાં મોકલતા હોય છે. ઈન્ડિગોની ડોમેસ્ટિક ફ્લાઈટમાં કોઈપણ વડીલ કે વાલી વિના એકલા મુસાફરી કરતા બાળકો માટેની સહાયતા સેવાનો ચાર્જ પણ વધારી દેવાયો છે. હવે આ સુવિધા માટે 5,000 રૂપિયાના બદલે 5,999 રૂપિયા ચૂકવવા પડશે. જોકે, ઈન્ટરનેશનલ ફ્લાઈટમાં આ સેવાનો ચાર્જ 12,999 રૂપિયા જળવાઈ રહ્યો છે. આ સેવા લેવા માટે એરલાઈનના કેટલાક ખાસ નિયમોનું પાલન કરવું પડે છે.

એક્સ્ટ્રા લગેજ લઈ જવું પડશે ભારે

જો તમારો સામાન નિર્ધારિત મર્યાદા કરતા વધારે છે, તો હવે એરપોર્ટ પર તમારે વધારે દંડ ભરવો પડશે. ડોમેસ્ટિક ફ્લાઈટમાં વધારાના સામાન પર હવે પ્રતિ કિલો 800 રૂપિયા ચાર્જ લાગશે. પહેલા આ ચાર્જ 700 રૂપિયા હતો. એટલે કે દર કિલોએ 100 રૂપિયાનો વધારો થયો છે. ઉદાહરણ તરીકે સમજીએ તો, જો તમારી પાસે 5 કિલો એક્સ્ટ્રા સામાન છે, તો હવે તમારે 4,000 રૂપિયા ચૂકવવા પડશે, જેના માટે પહેલા માત્ર 3,500 રૂપિયા લાગતા હતા.

પ્રાયોરિટી ચેક-ઈન અને બોર્ડિંગના નવા રેટ

લાઈનમાં ઊભા રહ્યા વિના ફટાફટ ચેક-ઈન અને બોર્ડિંગ કરવા માટેની ઈન્ડિગોની 'ફાસ્ટ ફોરવર્ડ સેવા' પણ હવે મોંઘી થઈ ગઈ છે. ડોમેસ્ટિક ફ્લાઈટ માટે એરપોર્ટ પર આ સુવિધાનો ચાર્જ 450 રૂપિયાથી વધારીને 650 રૂપિયા કરી દેવામાં આવ્યો છે. જ્યારે ઈન્ટરનેશનલ ફ્લાઈટ માટે આ ચાર્જ પ્રતિ સેક્ટર 850 રૂપિયા નક્કી કરાયો છે.

ટ્રાવેલ સર્ટિફિકેટ માટે પણ વધુ પૈસા ચૂકવવા પડશે

ઘણા લોકોને ઓફિસમાં ટ્રાવેલ એલાઉન્સ ક્લેમ કરવા માટે કે GSTના કામ માટે એરલાઈન પાસેથી 'પ્રવાસ પ્રમાણપત્ર' જોઈતું હોય છે. ઈન્ડિગોએ આ સર્ટિફિકેટનો ચાર્જ પણ 200 રૂપિયાથી વધારીને 300 રૂપિયા કરી દીધો છે.

આ પણ વાંચો - દેશભરમાં UPI પેમેન્ટ પર ચાર્જનો ભારે વિરોધ: પેટ્રોલ પંપ અને દુકાનો પર લાગ્યા "No UPI, Only Cash"ના બોર્ડ

નોંધનીય છે કે, આ તમામ ચાર્જિસ એ 'ઓપ્શનલ' એટલે કે વૈકલ્પિક સેવાઓ છે. મુસાફરો પોતાની જરૂરિયાત મુજબ બેઝિક ટિકિટના ભાડા સિવાય આ સેવાઓ ખરીદી શકે છે. એરલાઈન કંપનીના જણાવ્યા અનુસાર, માર્કેટ અને ખર્ચને ધ્યાનમાં રાખીને વધારાની સેવાઓના ભાવની સમીક્ષા કરવી એ એક નિયમિત પ્રક્રિયા છે અને આ ભાવ વધારો તેનો જ એક ભાગ છે. તેથી, હવે જ્યારે પણ તમે ઈન્ડિગોની ફ્લાઈટ બુક કરો, ત્યારે આ નવા ચાર્જિસને ધ્યાનમાં રાખીને જ તમારું બજેટ નક્કી કરજો.