Bitcoin Crash: ક્રિપ્ટો માર્કેટમાં મોટો કડાકો! રેકોર્ડ હાઈ લેવલથી બિટકોઈન તૂટીને અડધો થઈ ગયો, રોકાણકારોને રાતા પાણીએ રોવાનો વારો

Bitcoin Price Crash: ક્રિપ્ટો કરન્સી માર્કેટમાં હાલમાં ભારે અફડાતફડીનો માહોલ છે. રોકાણકારોના શ્વાસ અધ્ધર થઈ ગયા છે કારણ કે દુનિયાની સૌથી મોટી ક્રિપ્ટો કરન્સી બિટકોઈન (Bitcoin) માં મોટું ગાબડું પડ્યું છે. બિટકોઈન તેના અત્યાર સુધીના સૌથી હાઈ લેવલ પરથી તૂટીને લગભગ અડધો થઈ ગયો છે.

માર્કેટની હાલત એવી છે કે માત્ર બિટકોઈન જ નહીં, પણ બીજી મોટી કરન્સી એથેરિયમ (Ethereum) પણ $2000 ના લેવલની નીચે સરકી ગઈ છે. જો માર્કેટ કેપની વાત કરીએ તો, ટોપ-10 ક્રિપ્ટો કરન્સીમાં છેલ્લા એક અઠવાડિયામાં જ 30% સુધીનું ધોવાણ થયું છે. ચાલો જાણીએ કે જે બિટકોઈન થોડા સમય પહેલા રોકેટની ગતિએ ભાગી રહ્યો હતો, તેમાં અચાનક આટલો મોટો ઘટાડો કેમ આવ્યો?

ટ્રમ્પની એન્ટ્રીથી બિટકોઈન બન્યો હતો ‘રોકેટ'

તમને યાદ હશે કે જ્યારે અમેરિકામાં ડોનાલ્ડ ટ્રમ્પ બીજી વાર રાષ્ટ્રપતિ ચૂંટણી જીતી રહ્યા હતા, ત્યારે બિટકોઈનમાં જબરદસ્ત તેજી જોવા મળી હતી. 6 નવેમ્બર 2024 ના રોજ બિટકોઈને પહેલીવાર $75,000 નું લેવલ ક્રોસ કર્યું હતું. ટ્રમ્પે ચૂંટણીમાં વચન આપ્યું હતું કે તેઓ ક્રિપ્ટો રિઝર્વ બનાવશે અને ક્રિપ્ટો-ફ્રેન્ડલી નીતિઓ લાવશે. આ આશાએ બિટકોઈનની ચમક વધારી દીધી હતી.

બિટકોઈન તૂટવા પાછળના મુખ્ય કારણો

બિટકોઈનની ચમક જાન્યુઆરી મહિનામાં લગભગ 11% જેટલી ફીકી પડી હતી. વર્ષ 2018 પછી પહેલીવાર એવું બન્યું છે કે સતત ચાર મહિના સુધી તેમાં ઘટાડો જોવા મળ્યો હોય. આ ઘટાડા પાછળ અમેરિકન ફેડરલ રિઝર્વ અને ડૉલરની મજબૂતી જવાબદાર માનવામાં આવે છે.

જ્યારે ફેડરલ રિઝર્વના પ્રમુખ તરીકે કેવિન વોર્શ (Kevin Warsh) ના નામની મંજૂરી મળી, ત્યારે સોનાના ભાવમાં પણ એક દાયકાનો સૌથી મોટો ઘટાડો નોંધાયો હતો. આ જોઈને રોકાણકારો ડરી ગયા અને તેની અસર વોલેટાઈલ (અસ્થિર) ગણાતા ક્રિપ્ટો માર્કેટ પર પણ થઈ. એક્સપર્ટ્સનું માનવું છે કે, 2021 માં જે $70,000 નું હાઈ લેવલ હતું, તે સપોર્ટ લેવલ તૂટતા જ રોકાણકારોનો ભરોસો ડગી ગયો છે અને લોન્ગ ટર્મ માટે ચિંતા ઉભી થઈ છે.

ક્રિપ્ટો કરન્સીની વર્તમાન સ્થિતિ (એક નજર)

છેલ્લા 24 કલાક અને એક અઠવાડિયામાં ટોચની કરન્સીઓમાં કેવો ઘટાડો થયો છે તે નીચે મુજબ છે:

બિટકોઈન (Bitcoin): ભાવ $64,831.42 (એક અઠવાડિયામાં 21.62% નો ઘટાડો)

એથેરિયમ (Ethereum): ભાવ $1905.84 (એક અઠવાડિયામાં 30.07% નો ઘટાડો)

બીએનબી (BNB): ભાવ $626.35 (એક અઠવાડિયામાં 25.71% નો ઘટાડો)

સોલાના (Solana): ભાવ $80.05 (એક અઠવાડિયામાં 30.59% નો ઘટાડો)

એક્સઆરપી (XRP): ભાવ $1.30 (એક અઠવાડિયામાં 25.20% નો ઘટાડો)

ડોગકોઈન (DogeCoin): ભાવ $0.9124 (એક અઠવાડિયામાં 19.84% નો ઘટાડો)

આમ, હાલના તબક્કે માર્કેટમાં ભારે વેચવાલી જોવા મળી રહી છે. જે રોકાણકારોએ ટોચના ભાવે ખરીદી કરી હતી, તેમના પોર્ટફોલિયો અત્યારે લાલ નિશાનમાં છે.

આ પણ વાંચો- Work Life Balance: ઘર અને ઓફિસના ટેન્શનથી બગડી રહી છે તબિયત? તો આ રીતે રહો સ્ટ્રેસ ફ્રી, જાણો સચોટ ઉપાયો

(ડિસ્ક્લેમર: આ સમાચાર માત્ર માહિતી માટે છે. ક્રિપ્ટો કરન્સી માર્કેટ ખૂબ જ જોખમી અને અસ્થિર છે. અહીં આપવામાં આવેલી માહિતી કોઈ પણ પ્રકારની રોકાણ કરવાની સલાહ નથી. રોકાણ કરતા પહેલા હંમેશા સર્ટિફાઈડ આર્થિક સલાહકારની મદદ લેવી હિતાવહ છે.)