Chocolate Market India: ભારતમાં ચોકલેટનો ક્રેઝ! 2030 સુધીમાં માર્કેટ 3.58 બિલિયન ડોલરને પાર કરશે, જાણો વેલેન્ટાઈન ડે અને હેલ્થ ટ્રેન્ડની અસર

Chocolate Market India: વેલેન્ટાઇન વીક ચાલી રહ્યું છે અને આજે એટલે કે 9 ફેબ્રુઆરીએ ‘ચોકલેટ ડે' ઉજવવામાં આવે છે. સામાન્ય રીતે આ દિવસ પ્રેમી યુગલો માટે ખાસ હોય છે, પરંતુ આ દિવસ માત્ર પ્રેમનો એકરાર કરવા પૂરતો સીમિત નથી રહ્યો. તે ભારતમાં ઝડપથી વિસ્તરી રહેલા ચોકલેટ બિઝનેસનું પણ પ્રતિબિંબ છે. એક સમય હતો જ્યારે ચોકલેટ માત્ર બાળકો પૂરતી સીમિત હતી, પરંતુ હવે યુવાનો, નોકરી કરતા પ્રોફેશનલ્સ અને વડીલોમાં પણ ચોકલેટનો જબરદસ્ત ક્રેઝ જોવા મળી રહ્યો છે.

2030 સુધીમાં ચોકલેટ માર્કેટમાં જબરદસ્ત ઉછાળો

ભારતીય ચોકલેટ ઈન્ડસ્ટ્રી હવે તેના શરૂઆતી તબક્કામાંથી બહાર નીકળીને વિકાસના રસ્તે દોડી રહી છે. માર્કેટ રિસર્ચ કંપની ‘મોર્ડોર ઇન્ટેલિજન્સ'ના રિપોર્ટ પ્રમાણે, ભારતમાં ચોકલેટ માર્કેટ 2030 સુધીમાં લગભગ 3.58 બિલિયન ડોલર સુધી પહોંચી જશે. આંકડાઓ પર નજર કરીએ તો, આગામી વર્ષોમાં આ ઉદ્યોગ વાર્ષિક 7.6 ટકાના દરે વધવાની શક્યતા છે.

આ ગ્રોથ પાછળ માત્ર તહેવારો કે વેલેન્ટાઇન ડે જવાબદાર નથી. લોકોની બદલાતી લાઈફસ્ટાઈલ, ખાણીપીણીની નવી આદતો અને મોબાઈલથી થતી ડિજિટલ શોપિંગે આ ક્ષેત્રે મહત્વનો ભાગ ભજવ્યો છે.

હવે ગ્રાહકો માત્ર સસ્તી અને ગળપણવાળી ચોકલેટથી સંતુષ્ટ નથી. લોકોનો ઝુકાવ હવે પ્રીમિયમ અને ડાર્ક ચોકલેટ તરફ વધ્યો છે. ખાસ કરીને સ્વાસ્થ્ય પ્રત્યે જાગૃત લોકો હવે ચોકલેટને માત્ર સ્વાદ માટે નહીં પણ સ્વાસ્થ્યના ફાયદા માટે પણ ખાઈ રહ્યા છે. બજારમાં અત્યારે નીચે મુજબના બદલાવ જોવા મળી રહ્યા છે:

ડાર્ક ચોકલેટનો ક્રેઝ: ડાર્ક ચોકલેટ તણાવ (સ્ટ્રેસ) ઘટાડવા, હૃદયને સ્વસ્થ રાખવા અને શરીરમાં એનર્જી વધારવા માટે સારી ગણાય છે. આ કારણે ફિટનેસ અને વેલનેસ ટ્રેન્ડનો સીધો લાભ ચોકલેટ કંપનીઓને મળી રહ્યો છે.

સુગર-ફ્રી ડિમાન્ડ: ઓછી ખાંડ, વધારે કોકો (Cocoa) અને સુગર-ફ્રી ચોકલેટની માંગમાં સતત વધારો થઈ રહ્યો છે.

ઓનલાઈન ડિલિવરીનો કમાલ

ભારતમાં હવે કરિયાણાની દુકાને જઈને ચોકલેટ ખરીદવાને બદલે ઓનલાઈન ઓર્ડર કરવાનો ટ્રેન્ડ વધ્યો છે. ઈ-કોમર્સ અને ક્વિક-કોમર્સ (ઝડપી ડિલિવરી કરતી એપ્સ) પ્લેટફોર્મ્સ પર ચોકલેટનું વેચાણ રોકેટ ગતિએ વધ્યું છે. એક રિપોર્ટ અનુસાર, વેલેન્ટાઈન ડે જેવા પ્રસંગોએ ક્વિક-ડિલિવરી એપ્સ પર દર કલાકે હજારોની સંખ્યામાં ચોકલેટ વેચાય છે. ખાસ કરીને મહિલાઓ અને યુવા વર્ગમાં ઓનલાઈન ચોકલેટ મંગાવવાનું પ્રમાણ ઘણું ઊંચું છે.

યુવાનો છે માર્કેટના અસલી ડ્રાઈવર

ભારત એક યુવાન દેશ છે, જ્યાં વસ્તીના લગભગ 65 ટકા લોકો 35 વર્ષથી ઓછી ઉંમરના છે. આ યુવા વર્ગ જ ચોકલેટ માર્કેટને આગળ વધારી રહ્યો છે. યુવાનોને આકર્ષવા માટે કંપનીઓ પણ અવનવા નુસખા અપનાવી રહી છે:

* નવા અને યુનિક સ્વાદ (Flavors).

* આકર્ષક અને ફંકી પેકેજિંગ.

* બાળકો માટે રમકડાં સાથેના પેકિંગ.

* રક્ષાબંધન, દિવાળી, નાતાલ અને વેલેન્ટાઇન ડે માટે ખાસ 'લિમિટેડ એડિશન' ગિફ્ટ પેક્સ.

આમ, બદલાતા સમય સાથે ચોકલેટ હવે માત્ર એક મીઠાઈ નથી રહી, પણ તે ઉજવણી અને સ્વાસ્થ્ય બંનેનું પ્રતીક બની ગઈ છે. આવનારા સમયમાં આ માર્કેટ હજુ પણ મોટી હરણફાળ ભરશે તે નક્કી છે.

આ પણ વાંચો- ડિજિટલ ફ્રોડ પર સુપ્રીમ કોર્ટ લાલઘૂમ: ગુજરાત સરકારને કડક આદેશ, 54,000 કરોડની ‘સાયબર લૂંટ’ રોકવા તાત્કાલિક SOP લાગુ કરો