મોંઘું તેલ ભારતની મુસીબત વધારશે: જો ક્રૂડ ઓઈલ $130 એ પહોંચ્યું તો GDP ગ્રોથમાં 0.8%નો ઘટાડો આવી શકે છે - S&P ગ્લોબલ

વૈશ્વિક રેટિંગ એજન્સી S&P ગ્લોબલ રેટિંગ્સે ભારતીય અર્થતંત્રને લઈને એક મહત્વની ચેતવણી આપી છે. એજન્સીના જણાવ્યા અનુસાર, જો મધ્ય-પૂર્વના દેશોમાં ચાલી રહેલો તણાવ લાંબો સમય ચાલશે અને ઉર્જા સંકટ ઊભું થશે, તો તેની સીધી અસર ભારતની આર્થિક વૃદ્ધિ પર પડી શકે છે.

S&P ના અહેવાલ મુજબ, જો 2026 માં કાચા તેલ (Crude Oil) ની સરેરાશ કિંમત 130 ડોલર પ્રતિ બેરલ પર પહોંચી જશે, તો નાણાકીય વર્ષ 2027 માં ભારતનો GDP ગ્રોથ રેટ તેના અંદાજિત 7.1% ના સ્તરથી 0.8% જેટલો નીચે ગબડી શકે છે.

તેલની કિંમતો માટેના બે અલગ અંદાજ

S&P ગ્લોબલે બજારની સ્થિતિને સમજવા માટે બે અલગ સ્થિતિઓ રજૂ કરી છે.

બેઝ કેસ: સામાન્ય સંજોગોમાં એજન્સીનું માનવું છે કે 2026 માં તેલ 85 ડોલર અને 2027 માં 70 ડોલર પ્રતિ બેરલ રહી શકે છે.

સામાન્ય જનતા અને કંપનીઓ પર શું થશે અસર?

રેટિંગ એજન્સીના મતે, જો તેલ અને ગેસના ભાવમાં વધારો થશે તો તેની સીધી અસર સામાન્ય પરિવારો, મોટી કંપનીઓ અને બેંકો પર પડશે. સરકાર માટે પણ રાજકોષીય ખાધને નિયંત્રણમાં રાખવી મુશ્કેલ બનશે. જોકે, એજન્સીએ એમ પણ ઉમેર્યું કે સરકાર જનતાને ભાવવધારાથી બચાવવા માટે જે પગલાં લેશે, તેના કારણે સરકારી તિજોરી પર જે ભાર આવશે તે કામચલાઉ હશે.

ભારતની મજબૂત સ્થિતિ પર ભરોસો

આટલા જોખમો હોવા છતાં, S&P એ ભારતની આર્થિક પાયાની સ્થિતિને મજબૂત ગણાવી છે. એજન્સીનું કહેવું છે કે ભારત કોઈપણ આર્થિક આંચકાને સહન કરવા માટે સક્ષમ છે. આ કારણે સરકાર, બેંકો કે મોટી કોર્પોરેટ કંપનીઓના ક્રેડિટ રેટિંગ પર તાત્કાલિક કોઈ ખતરો દેખાતો નથી.

કોર્પોરેટ અને બેંકિંગ સેક્ટરની હાલત

કોર્પોરેટ સેક્ટર: દેશની ટોચની 100 લિસ્ટેડ કંપનીઓના નફામાં (EBITDA) 25% સુધીનો ઘટાડો જોવા મળી શકે છે. જોકે, નાણાકીય વર્ષ 2028 થી સ્થિતિમાં ઝડપથી સુધારો થવાની શક્યતા છે.

બેંકિંગ સેક્ટર: ભારતીય બેંકો અત્યારે ઘણી મજબૂત સ્થિતિમાં છે. છેલ્લા એક દાયકાની સૌથી વધુ મૂડી અને ઓછા NPA (ખરાબ લોન) ને કારણે બેંકો આ મુશ્કેલ સમયનો સામનો કરી શકશે. આગામી 12-24 મહિનામાં લોનનું નુકસાન (Credit Loss) થોડું વધીને 0.9% થઈ શકે છે, પરંતુ એકંદર એસેટ ક્વોલિટી સારી રહેશે.

S&P ગ્લોબલનું અનુમાન છે કે મધ્ય-પૂર્વમાં ચાલી રહેલો સંઘર્ષ ટૂંક સમયમાં તેના ઉચ્ચતમ સ્તરે પહોંચીને શાંત થશે. હોર્મુઝ સ્ટ્રેટ (દરિયાઈ માર્ગ) માં આવતા અવરોધો પણ જલ્દી દૂર થઈ શકે છે, પરંતુ સપ્લાય ચેઈનને લગતી નાની-મોટી મુશ્કેલીઓ આગામી કેટલાક મહિનાઓ સુધી ચાલુ રહી શકે છે. જો તેલના ભાવ કાબૂમાં રહેશે, તો ભારતીય અર્થતંત્ર નિર્ધારિત ગતિએ આગળ વધતું રહેશે.

આ પણ વાંચો-Stock Market Alert: આવતીકાલે 3 મોટી કંપનીઓના 76,000 કરોડના શેર થશે 'ફ્રી', જાણો તમારા પોર્ટફોલિયો પર શું થશે અસર

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.