ભારતીય અર્થવ્યવસ્થાની હરણફાળ: IMFએ GDP ગ્રોથનું અનુમાન વધારીને 7.3% કર્યું, જાણો શું છે મુખ્ય કારણ

ભારતીય અર્થતંત્ર માટે એક અત્યંત ગૌરવપૂર્ણ અને રાહતના સમાચાર સામે આવ્યા છે. વૈશ્વિક પડકારો વચ્ચે પણ ભારતનો ડંકો વાગી રહ્યો છે. ઈન્ટરનેશનલ મોનેટરી ફંડ એટલે કે IMFએ નાણાકીય વર્ષ 2025-26 માટે ભારતના જીડીપી ગ્રોથના અનુમાનમાં મોટો વધારો કર્યો છે.

IMFએ હવે અનુમાન લગાવ્યું છે કે ભારતનો વિકાસ દર 7.3 ટકા રહેશે. તમને જણાવી દઈએ કે, અગાઉ ઓક્ટોબર મહિનામાં આ અનુમાન 6.6 ટકા હતું, જેમાં સીધો 0.7 ટકાનો વધારો કરવામાં આવ્યો છે.

શા માટે વધાર્યું અનુમાન?

IMF દ્વારા આ સકારાત્મક ફેરફાર કરવા પાછળનું મુખ્ય કારણ ભારતનું તાજેતરનું પ્રદર્શન છે. ચાલુ નાણાકીય વર્ષના ત્રીજા ક્વાર્ટરમાં અપેક્ષા કરતા વધુ સારા પરિણામો અને ચોથા ક્વાર્ટરમાં જોવા મળેલી મજબૂત આર્થિક ગતિને કારણે ગ્રોથ રેટ વધારવામાં આવ્યો છે.

જોકે, વર્લ્ડ ઈકોનોમિક આઉટલુક 2026ના રિપોર્ટમાં થોડી સાવચેતી પણ બતાવવામાં આવી છે. FY27 અને FY28માં સાયક્લિકલ ફેક્ટર્સ ઓછા થવાને કારણે ગ્રોથ રેટ ઘટીને 6.4% થઈ શકે છે. રાહતના સમાચાર એ છે કે 2025માં ખાદ્ય ચીજવસ્તુઓના ભાવ ઘટવાથી મોંઘવારી ટાર્ગેટ લેવલ પર આવી શકે છે.

ગ્લોબલ વોર્નિંગ અને મૂડીઝનો રિપોર્ટ

IMFએ ચેતવણી આપી છે કે AI (આર્ટિફિશિયલ ઈન્ટેલિજન્સ) અને વધતા જિઓપોલિટિકલ ટેન્શનને કારણે ગ્લોબલ માર્કેટમાં મોટો ક્રેશ પણ આવી શકે છે. બીજી તરફ, રેટિંગ એજન્સી મૂડીઝે પણ ભારત પર ભરોસો મુકતા ચાલુ વર્ષ માટે 7.3% ગ્રોથનું અનુમાન લગાવ્યું છે. મૂડીઝનું કહેવું છે કે મજબૂત આર્થિક સ્થિતિને કારણે લોકોની સરેરાશ આવક વધશે અને ઈન્સ્યોરન્સ સેક્ટરની માંગમાં મોટો ઉછાળો આવશે.

આ પણ વાંચો-India Iran Relations: અમેરિકાની ધમકી છતાં ભારત કેમ નહીં છોડે ઈરાનનું ચાબહાર પોર્ટ? જાણો શું છે પીએમ મોદીનો માસ્ટર પ્લાન!