Microsoftમાં મોટો ફેરફાર: ભારત સહિત 60,000 કર્મચારીઓને સામેથી નોકરી છોડવાની ઓફર, જાણો કંપનીનો નવો પ્લાન

આર્ટિફિશિયલ ઇન્ટેલિજન્સની દુનિયામાં અત્યારે સૌથી વધુ પૈસા ખર્ચી રહેલી જાણીતી ટેક કંપની માઇક્રોસોફ્ટએ એક મોટો નિર્ણય લીધો છે. કંપનીએ ભારત સહિત વિશ્વના ચાર દેશોમાં પોતાના કર્મચારીઓને સામેથી એક ઓફર આપી છે, જેમાં તેમને સ્વેચ્છાએ નોકરી છોડવાના બદલામાં આર્થિક મદદ આપવાની વાત કહેવામાં આવી છે.

દુનિયાભરના લગભગ 60,000 કર્મચારીઓ આ યોજના માટે પાત્ર છે. કંપની હાલમાં AI અને ક્લાઉડ ઇન્ફ્રાસ્ટ્રક્ચર પાછળ અબજો ડોલર ખર્ચી રહી છે, ત્યારે આ નિર્ણય લેવાયો છે. જોકે, સ્પષ્ટતા કરવી જરૂરી છે કે આ કોઈ છટણી નથી અને પાત્રતા ધરાવતા તમામ કર્મચારીઓની નોકરી જવાની નથી.

કયા દેશોમાં અને કોને મળશે આ ઓફર?

માઇક્રોસોફ્ટે સોમવારે આ 'વોલન્ટરી એક્ઝિટ ઓફર' ની સત્તાવાર જાહેરાત કરી છે. આ યોજના ભારત, અમેરિકા, બ્રિટન અને કેનેડામાં કંપનીની પસંદગીની ટીમો માટે જ લાગુ પડશે.ભારતમાં માઇક્રોસોફ્ટના આશરે 23,000 કર્મચારીઓ કામ કરે છે. જોકે, આમાંથી કેટલા કર્મચારીઓ આ ઓફરના દાયરામાં આવશે તે હજુ સ્પષ્ટ નથી. ભારતના પાત્ર કર્મચારીઓએ આ ઓફર સ્વીકારવી કે નહીં તેનો નિર્ણય લેવા માટે આગામી 1 ડિસેમ્બર 2025 સુધીનો સમય આપવામાં આવ્યો છે.

આ ઓફર હેઠળ જે કર્મચારીઓ રાજીખુશીથી નોકરી છોડશે તેમને કંપની તરફથી આકર્ષક પેકેજ અને કરિયર સપોર્ટ આપવામાં આવશે.

પગાર: કર્મચારીએ કંપનીમાં જેટલા વર્ષ કામ કર્યું હશે, તે દરેક વર્ષ દીઠ એક મહિનાનો બેઝિક પગાર આપવામાં આવશે.

અન્ય લાભો: આ સાથે હેલ્થ ઇન્શ્યોરન્સ અને કરિયર ટ્રાન્ઝિશન (નવી નોકરી શોધવામાં) ની મદદ પણ પૂરી પાડવામાં આવશે.

માઇક્રોસોફ્ટના ચીફ HR ઓફિસર એમી કોલમેનના જણાવ્યા અનુસાર, આ સુવિધા કંપનીના અમુક ચોક્કસ વિભાગોમાં લેવલ 70 અને તેનાથી નીચેની કક્ષાના કર્મચારીઓને જ મળશે. જે લોકો આ માટે પાત્ર હશે, તેમને ઈમેલ દ્વારા ઓફરની તમામ શરતો જણાવવામાં આવશે.

કંપનીએ આ નિર્ણય શા માટે લીધો?

HR ઓફિસર એમી કોલમેને સ્પષ્ટ કર્યું છે કે, આ પ્રોગ્રામનો મુખ્ય હેતુ એવા કર્મચારીઓને મદદ કરવાનો છે જેઓ હવે માઇક્રોસોફ્ટની બહાર પોતાનું નવું કરિયર બનાવવા માંગે છે. આનાથી કંપનીને પોતાની બદલાતી જરૂરિયાતો મુજબ સ્ટાફની સંખ્યા અને કામકાજમાં ફેરફાર કરવાની તક મળશે. આ યોજના તમામ વિભાગોમાં એકસરખી લાગુ નહીં થાય, પરંતુ બિઝનેસની જરૂરિયાત અને ગ્રાહકોના કામને ધ્યાનમાં રાખીને નિર્ણય લેવાશે.

ભારતમાં AI પર 20.5 અબજ ડોલરના રોકાણનો પ્લાન

એક તરફ કંપની કેટલાક કર્મચારીઓને છૂટા થવાની ઓફર આપી રહી છે, તો બીજી તરફ ભારતમાં મોટા રોકાણની તૈયારી પણ કરી રહી છે. માઇક્રોસોફ્ટે વર્ષ 2025 થી 2029 ની વચ્ચે ભારતમાં ક્લાઉડ અને AI ઇન્ફ્રાસ્ટ્રક્ચર, સ્કિલ ટ્રેનિંગ અને ઓપરેશન ક્ષેત્રે 20.5 અબજ ડોલરનું જંગી રોકાણ કરવાની જાહેરાત કરી છે. કંપનીનો ટાર્ગેટ છે કે વર્ષ 2030 સુધીમાં ભારતમાં 2 કરોડ લોકોને AI ને લગતી સ્કિલ શીખવવામાં આવે. આ ઉપરાંત, કંપની પોતાના હાલના કર્મચારીઓને પણ નવી સ્કિલ શીખવા અને અંદર જ કરિયરના નવા વિકલ્પો શોધવામાં પૂરી મદદ કરશે.

આ પણ વાંચો-FDમાં રોકાણ કરનારાઓ માટે ખુશખબર, Indian Bankએ વ્યાજ દરોમાં કર્યો વધારો, ફટાફટ ચેક કરો નવા રેટ્સ