Railway Stocks: રેલવેના આ શેરો બન્યા રોકેટ! 40,000 કરોડના નવા મેગા ટેન્ડરથી રોકાણકારો થશે માલામાલ, શું તમારી પાસે છે આ શેર?

Railway Stocks: શેરબજારમાં રેલવે સાથે સંકળાયેલી કંપનીઓના શેરમાં (Railway Stocks) જબરદસ્ત તેજી જોવા મળી રહી છે. આ તેજી પાછળનું મુખ્ય કારણ ભારતીય રેલવેની એક મોટી યોજના છે. મળતી માહિતી મુજબ, રેલવે ટૂંક સમયમાં 1 લાખ માલગાડીના ડબ્બા (freight wagons) ખરીદવા માટે 40,000 કરોડ રૂપિયાનું એક મેગા ટેન્ડર બહાર પાડવા જઈ રહી છે. આ મેગા ઓર્ડરના સમાચાર આવતાની સાથે જ રેલવેના શેરોને જાણે પાંખો આવી ગઈ છે.

40,000 કરોડનું મેગા ટેન્ડર

ભારતીય રેલવે આગામી 3થી 4 વર્ષમાં 1 લાખ નવા વેગન ખરીદવાનું મોટું આયોજન કરી રહી છે. આ નવું પ્રસ્તાવિત ટેન્ડર અગાઉ 2022 માં બહાર પાડવામાં આવેલા મોટા ટેન્ડર કરતા પણ વધુ મોટું હોવાની શક્યતા છે. આ ટેન્ડર હેઠળ દર વર્ષે અંદાજે 35,000 થી 40,000 વેગનની ખરીદી થઈ શકે છે. એવી અપેક્ષા છે કે આ ઓર્ડરનો પ્રથમ સેટ ચાલુ નાણાકીય વર્ષના બીજા ક્વાર્ટરમાં (જુલાઈ-સપ્ટેમ્બર) ફાળવવામાં આવી શકે છે. કંપનીઓને ડિલિવરી માટે 3 થી 4 વર્ષનો સમય આપવામાં આવશે.

કયા શેરોમાં જોવા મળી તોફાની તેજી?

ટીટાગઢ રેલ (Titagarh Rail Systems): આ શેર 9.88 ટકા (રૂ. 74.80) ના જંગી ઉછાળા સાથે 832.10 રૂપિયાના સ્તરે બંધ થયો છે. દિવસ દરમિયાન આ શેર 840 રૂપિયાની હાઈ સપાટીએ પહોંચ્યો હતો.

જ્યુપિટર વેગન્સ (Jupiter Wagons): આ શેરમાં પણ જોરદાર ખરીદી જોવા મળી છે. શેર 6.99 ટકા (રૂ. 19.35) વધીને 296.30 રૂપિયા પર બંધ થયો છે. તેનો ઇન્ટ્રાડે હાઈ 303.90 રૂપિયા રહ્યો હતો.

ટેક્સમેકો રેલ (Texmaco Rail): આ કંપનીના શેરમાં પણ 4.69 ટકા (રૂ. 5.07) નો સારો વધારો નોંધાયો છે અને તે 113.28 રૂપિયા પર બંધ થયો છે.

રેલવે અને કંપનીઓ વચ્ચે વાટાઘાટો શરૂ

લેટેસ્ટ રિપોર્ટ્સ અનુસાર, ઇન્ડિયન રેલવે હાલમાં વેગન બનાવતી કંપનીઓ સાથે સતત સંપર્કમાં છે. કંપનીઓની પ્રોડક્શન ક્ષમતા કેટલી છે અને તેઓ કેટલા સમયમાં સપ્લાય કરી શકશે તેનો અંદાજ કાઢવામાં આવી રહ્યો છે. આ વાટાઘાટો પૂરી થયા બાદ રેલવે અલગ-અલગ તબક્કામાં ટેન્ડર બહાર પાડશે.

ટેક્સમેકો રેલ એન્ડ એન્જિનિયરિંગ લિમિટેડના મેનેજિંગ ડિરેક્ટર સુદીપ્ત મુખર્જીએ જણાવ્યું કે, ઇન્ડસ્ટ્રી અત્યારે અગાઉ મળેલા જૂના ઓર્ડર પૂરા કરી રહી છે. આ નવા અને લાંબા ગાળાના ઓર્ડરથી સ્થાનિક વેગન ઇન્ડસ્ટ્રી પોતાની પૂરી ક્ષમતા સાથે કામ કરી શકશે અને પ્રોડક્શન લાઈન સતત ચાલુ રહેશે. નોંધનીય છે કે, અગાઉના ટેન્ડરના કુલ વેગનમાંથી ત્રીજા ભાગના (લગભગ 11,000 વેગન) એકલા કોલકાતા સ્થિત ટેક્સમેકો દ્વારા સપ્લાય કરવામાં આવ્યા હતા. આ કંપનીની વાર્ષિક ક્ષમતા 15,000 થી વધુ વેગન બનાવવાની છે.

માર્કેટમાં કોનો કેટલો દબદબો?

ટીટાગઢ રેલ એ દેશની જાણીતી વેગન અને કોચ બનાવતી કંપની છે. સમગ્ર વેગન મેન્યુફેક્ચરિંગ ઇન્ડસ્ટ્રીમાં તેનો મજબૂત 25 ટકા માર્કેટ શેર છે. બીજી તરફ, જ્યુપિટર વેગન્સ પણ દેશની અગ્રણી કંપની છે, જેની કુલ કમાણીના 87 ટકા હિસ્સો માત્ર રેલવે વેગનમાંથી આવે છે.

ભારતીય રેલવેના આ 40,000 કરોડના સંભવિત ટેન્ડરે રોકાણકારોમાં નવો ઉત્સાહ જગાવ્યો છે. ભવિષ્યમાં આ ઓર્ડર મળવાથી રેલવે કંપનીઓની આવકમાં જંગી વધારો થશે. જો તમારા પોર્ટફોલિયોમાં આ કંપનીઓના શેર છે, તો લોંગ ટર્મમાં તમને સારો એવો નફો થવાની પૂરેપૂરી શક્યતા છે.

આ પણ વાંચો- Market Outlook : તોફાની તેજી સાથે સેન્સેક્સ-નિફ્ટી બંધ, જાણો 26 મેના રોજ કેવી રહેશે બજારની ચાલ

Disclaimer: મનીકંટ્રોલ.કોમ પર આપવામાં આવેલી સલાહ કે વિચારો એક્સપર્ટ/બ્રોકરેજ ફર્મના અંગત મંતવ્યો છે. વેબસાઇટ કે તેનું મેનેજમેન્ટ તેના માટે જવાબદાર નથી. યુઝર્સને મનીકંટ્રોલ દ્વારા સલાહ આપવામાં આવે છે કે કોઈપણ રોકાણનો નિર્ણય લેતા પહેલા હંમેશા પ્રમાણિત નિષ્ણાતની સલાહ લેવી.