સામાન્ય માણસને લાગશે મોંઘવારીનો ઝટકો, ફુગાવો 7% સુધી પહોંચવાનું અનુમાન, RBI રેપો રેટમાં કરી શકે છે ધરખમ વધારો

Inflation rate India 2026 : આવનારા મહિનાઓમાં મોંઘવારી સામાન્ય માણસના ઘરનું બજેટ ખોરવી શકે છે. 'સિસ્ટમેટિક્સ ઇન્સ્ટિટ્યૂશનલ ઇક્વિટીઝ'ના એક લેટેસ્ટ રિપોર્ટમાં ચોંકાવનારો દાવો કરવામાં આવ્યો છે. રિપોર્ટ મુજબ, ભારતીય રિઝર્વ બેંકના અનુમાન કરતા વિપરીત દેશમાં મોંઘવારીનું જોખમ સતત વધી રહ્યું છે. આગામી ત્રિમાસિક ગાળામાં રિટેલ મોંઘવારી દર ઉછળીને 6 થી 7 ટકા સુધી પહોંચી શકે છે.

રેપો રેટમાં થઈ શકે છે મોટો વધારો

જો મોંઘવારી આ સ્તરે પહોંચે છે, તો તેને કાબૂમાં લેવા માટે RBI એ કડક પગલાં લેવા પડશે. રિપોર્ટમાં અંદાજ લગાવવામાં આવ્યો છે કે બેંક રેપો રેટમાં 100 થી 150 બેસિસ પોઈન્ટનો મોટો વધારો કરી શકે છે. હાલમાં રેપો રેટ 5.50% છે, જે વધારીને 6.5% થી 7% સુધી કરવામાં આવી શકે છે. જોકે, આ માત્ર આર્થિક નિષ્ણાતોનો અંદાજ છે, RBI નો સત્તાવાર નિર્ણય આવવાનો બાકી છે.

મોંઘવારી વધવા પાછળના મુખ્ય કારણો કયા છે?

કાચા તેલના ભાવમાં ઉછાળો: આંતરરાષ્ટ્રીય સ્તરે કાચા તેલની કિંમતોમાં 45% જેટલો મોટો વધારો જોવા મળ્યો છે.

હવામાનની અસર: નબળું ચોમાસું અને અલ નીનોની આશંકાએ ખેતી અને પાક પર અસર કરી છે.

કંપનીઓનો વધતો ખર્ચ: નાણાકીય વર્ષ 2026-27 ના પ્રથમ ક્વાર્ટરમાં નોન-ફાઇનાન્સિયલ કંપનીઓના ઉત્પાદન ખર્ચમાં વાર્ષિક ધોરણે 40% નો વધારો થયો છે. કંપનીઓ આ પૂરો બોજ ગ્રાહકો પર નાખી શકતી નથી, જેથી તેમના નફા પર દબાણ આવ્યું છે.

લોકોમાં મોંઘવારીને લઈને ચિંતા વધી

RBI ના ઘરેલુ મોંઘવારી અનુમાન સર્વે મુજબ, સપ્ટેમ્બર 2026માં સામાન્ય પરિવારોને મોંઘવારી દર 9.1% રહેવાની આશંકા હતી. એટલે કે, લોકો માની રહ્યા છે કે આવનારા સમયમાં ભાવ હજુ પણ વધશે. હાલમાં સરકાર દ્વારા ખાવા-પીવાની વસ્તુઓ, ઈંધણ અને ખાતર પર અપાતી સબસિડીના કારણે મોંઘવારી થોડી કાબૂમાં છે. પરંતુ જો સરકાર આ મદદ ઓછી કરશે, તો બજારમાં કિંમતોનું દબાણ ભयंકર વધી શકે છે.

તમારી EMI પર શું અસર થશે?

રિપોર્ટ મુજબ, RBI અગાઉ રેપો રેટમાં 25 બેસિસ પોઈન્ટનો વધારો કરીને તેને 5.50% કરી ચૂકી છે. હવે જો મોંઘવારીના ડરથી વધુ 100-150 bps નો વધારો થાય, તો બેંકોની લોન મોંઘી થશે. આની સીધી અસર તમારી હોમ લોન, કાર લોન અને પર્સનલ લોનની EMI પર પડશે. મતલબ કે, લોન લેનારા ગ્રાહકોએ દર મહિને વધુ હપ્તો ચૂકવવો પડશે.

શેરબજાર અને સરકારી બોન્ડ પર દબાણ

મોંઘવારી અને ઊંચા વ્યાજ દરોની અસર માત્ર સામાન્ય માણસ પર જ નહીં, પણ શેરબજાર પર પણ જોવા મળશે. રિપોર્ટમાં ચેતવણી અપાઈ છે કે કંપનીઓનો ખર્ચ વધવાથી શેરોના વેલ્યુએશન પર નકારાત્મક અસર પડશે. આ ઉપરાંત, 10 વર્ષના સરકારી બોન્ડની યીલ્ડ, જે અત્યારે 7.24% આસપાસ છે, તે મોંઘવારી વધતા 7.5%ની પાર જઈ શકે છે.

આ પણ વાંચો-Jantar Mantar : હવે જંતર-મંતર પર નહીં થાય ધરણા-પ્રદર્શન, દિલ્હી પોલીસે જારી કર્યો નવો આદેશ, વિરોધ પ્રદર્શન માટે નક્કી કરી 3 નવી જગ્યાઓ