ટ્રમ્પના ‘રેસિપ્રોકલ' ટેરિફ પર સુપ્રીમ કોર્ટની રોક: સોના-ચાંદી અને શેરબજાર પર શું થશે અસર? જાણો એક્સપર્ટ્સનો મત

Trump Tariffs: અમેરિકાના રાજકારણમાં અને અર્થતંત્રમાં હાલ મોટી ઉથલ-પાથલ ચાલી રહી છે. અમેરિકાની સુપ્રીમ કોર્ટે રાષ્ટ્રપતિ ડોનાલ્ડ ટ્રમ્પ દ્વારા લાદવામાં આવેલા વ્યાપક ‘રેસિપ્રોકલ’ (પરસ્પર) ટેરિફને રદ કરી દીધો છે. જોકે, આ નિર્ણય બાદ ટ્રમ્પે તાત્કાલિક અસરથી તમામ દેશોમાંથી થતી આયાત પર 15% નવો ‘ગ્લોબલ ટેરિફ’ લગાવી દીધો છે.

આ ઘટનાક્રમની સીધી અસર સોમવારે ખુલતા વૈશ્વિક બજારોમાં જોવા મળી શકે છે. અમેરિકા અને ભારત વચ્ચેની વેપાર નીતિઓ પણ હવે નવા સિરે નક્કી થશે તેવું નિષ્ણાતો માની રહ્યા છે. ચાલો જાણીએ કે જુદા-જુદા સેક્ટર અને માર્કેટ પર આની શું અસર થઈ શકે છે.

ભારતીય શેરબજાર પર શું થશે અસર?

નિષ્ણાંતોના જણાવ્યા મુજબ, બજારમાં હાલ અનિશ્ચિતતાનો માહોલ છે અને શેરબજારને અનિશ્ચિતતા જરાય પસંદ નથી હોતી.

ભૂ-રાજકીય તણાવ: ઈરાન અને અન્ય દેશો વચ્ચેનો તણાવ બજાર માટે જોખમી બની શકે છે. જો ક્રૂડ ઓઈલ (કાચા તેલ) ના ભાવ વધશે, તો માર્કેટમાં મોટી તેજી આવવી મુશ્કેલ છે.

સોના-ચાંદી ચમકશે કે ઘટશે?

જ્યારે પણ શેરબજારમાં અનિશ્ચિતતા વધે છે, ત્યારે રોકાણકારો સુરક્ષિત વિકલ્પ તરફ વળે છે. વર્તમાન માહોલમાં સોના અને ચાંદી જેવા સુરક્ષિત રોકાણ (Safe Haven)ની માંગ વધી શકે છે. જોકે, તેમણે બજારમાં તેજી આવે ત્યારે નફો બુક કરવાની સલાહ પણ આપી છે.

અમેરિકન કંપનીઓ માટે રાહતના સમાચાર?

વધુ એક નિષ્ણાંતનું માનવું છે કે, સુપ્રીમ કોર્ટના આ નિર્ણયથી ગ્લોબલ ટ્રેડ પર મંડરાઈ રહેલું મોટું સંકટ થોડું હળવું થયું છે. આનાથી કંપનીઓને ખર્ચ અને નફા અંગે સ્પષ્ટતા મળશે. સપ્લાય ચેઈન પરનું દબાણ ઘટશે, જે કોર્પોરેટ અમેરિકા માટે પોઝિટિવ સંકેત છે.

ડોલર અને વ્યાજદરોનું શું થશે?

ટ્રમ્પની ટેરિફ નીતિ ભલે નબળી પડી હોય, પરંતુ અમેરિકન શેરબજાર મજબૂત છે. આર્ટિફિશિયલ ઈન્ટેલિજન્સ (AI) અને ટેક્નોલોજી સેક્ટરમાં રોકાણને કારણે માર્કેટ ટકેલું છે. આયાત ખર્ચ ઘટવાથી મોંઘવારી ઘટી શકે છે. પરંતુ સરકારી ખાધ વધવાને કારણે બોન્ડ યીલ્ડ પર દબાણ રહેશે અને ડોલરમાં ઉતાર-ચઢાવ ચાલુ રહી શકે છે. જો અમેરિકામાં બેરોજગારીનો દર ઘટશે તો ફેડરલ રિઝર્વ (Fed) વ્યાજદરમાં ઘટાડો કરવાનું ટાળી શકે છે.

રોકાણકારોએ હવે શું કરવું?

નિષણાંતોએ રોકાણકારોને સાવચેત રહેવાની સલાહ આપી છે. ખાસ કરીને 24 ફેબ્રુઆરીએ માસિક એક્સપાયરી હોવાથી બજારમાં વોલેટિલિટી (ઉતાર-ચઢાવ) જોવા મળી શકે છે.

નિફ્ટી લેવલ: નિફ્ટી માટે 25,800 થી 26,000 નું લેવલ ખૂબ જ મહત્વનું રેઝિસ્ટન્સ છે. જો માર્કેટ 26,000 ની ઉપર ટકશે તો જ મોટી તેજી જોવા મળશે.

IT સેક્ટર: હાલના તબક્કે IT શેરોમાં નવું રોકાણ કરતા પહેલા સાવચેત રહેવું અને મર્યાદિત રોકાણ કરવું હિતાવહ છે.

એકંદરે, અમેરિકન કોર્ટનો નિર્ણય અને ટ્રમ્પનો નવો ટેરિફ પ્લાન બજારમાં મિશ્ર સંકેતો આપી રહ્યા છે. સોનું સુરક્ષિત વિકલ્પ બની શકે છે, જ્યારે શેરબજારમાં રોકાણકારોએ 'વોચ એન્ડ વેઈટ' (જુઓ અને રાહ જુઓ) ની નીતિ અપનાવવી જોઈએ.

આ પણ વાંચો- Stock Market Update: શેરબજારમાં તોફાની તેજી! સેન્સેક્સ 300 અંક ઉછળ્યો, નિફ્ટી 25700 પાર, જાણો આજનું માર્કેટ અપડેટ

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.