TCS નો AI પર મોટો દાવ: ચેરમેન ચંદ્રશેખરને કહ્યું- આ ખતરો નથી, ગ્રોથની શાનદાર તક છે

આજના સમયમાં એક તરફ આર્ટિફિશિયલ ઇન્ટેલિજન્સને નોકરીઓ અને રોજગાર માટે મોટા ખતરા સમાન ગણવામાં આવે છે. પરંતુ બીજી તરફ દેશની સૌથી મોટી આઈટી કંપની TCSનું માનવું કંઈક અલગ જ છે. TCS ના મતે AI એ રોજગાર માટે ખતરો નથી, પરંતુ ભવિષ્યના ગ્રોથ માટેની એક બહુ મોટી અને શાનદાર તક છે.

TCS હાલમાં અનેક AI એજન્ટ્સ ડેવલપ કરવા પર જોરશોરથી કામ કરી રહી છે. કંપની માને છે કે હવે એ સમય દૂર નથી જ્યારે TCS માં જેટલા માણસો કામ કરતા હશે, તેટલી જ સંખ્યામાં AI એજન્ટ્સ પણ કંપની માટે કામ કરતા હશે. આ તમામ મહત્વની વાતો TCS ના ચેરમેન એન. ચંદ્રશેખરને તાજેતરની વાર્ષિક સામાન્ય સભામાં કહી હતી અને કંપનીનો AI પ્રત્યેનો દ્રષ્ટિકોણ સ્પષ્ટ કર્યો હતો.

AI રેવન્યુમાં નોંધાયો સતત વધારો

ચંદ્રશેખરને કંપનીના બિઝનેસમાં AI ની સતત વધી રહેલી ભાગીદારીનો ખાસ ઉલ્લેખ કર્યો હતો. તેમણે આંકડા આપતા જણાવ્યું કે છેલ્લી 4 ત્રિમાસિક ગાળાથી કંપનીની AI રેવન્યુમાં 22% ના કમ્પાઉન્ડ ક્વૉર્ટરલી ગ્રોથ રેટથી સતત વધારો નોંધાયો છે. સૌથી મોટી વાત એ છે કે છેલ્લી ક્વાર્ટરમાં કંપનીની AI ની એન્યુઅલાઈઝ્ડ રેવન્યુ લગભગ $250 કરોડ સુધી પહોંચી ગઈ છે.

AI ના કારણે જૂના ટ્રેડિશનલ આઈટી સર્વિસ મોડલ નબળા પડી જશે તેવી ચિંતાઓ બજારમાં સતત વ્યક્ત કરવામાં આવી રહી છે. જોકે, ચંદ્રશેખરને આ ચિંતાને સાવ પાયાવિહોણી ગણાવી છે. તેમના મતે, મોટી કંપનીઓમાં આજે પણ કોમ્પ્લેક્સ ટેકનોલોજી લગાવવા માટે ઈન્ડસ્ટ્રીની કોર સ્ટ્રેન્થ (મૂળ તાકાત) ખૂબ જ મહત્વની ભૂમિકા ભજવે છે.

ભૂતકાળના ટેકનિકલ ફેરફારો સાથે વર્તમાનની સરખામણી કરતા તેમણે કહ્યું કે, AI ના કારણે કંપનીઓનો ખર્ચ ઘટશે, જેનાથી વિવિધ ઈન્ડસ્ટ્રીઝમાં ટેકનોલોજીનો વપરાશ વધારે ઝડપથી વધશે. આના પરિણામે ડિજિટલ ટ્રાન્સફોર્મેશન પ્રોજેક્ટ્સની માંગમાં મોટો ઉછાળો આવશે. જેમ જેમ બિઝનેસ પ્રોસેસ, નિર્ણય લેવાની પ્રક્રિયા અને ગ્રાહકો સાથેના વ્યવહારોમાં AI નો ઉપયોગ વધતો જશે, તેમ ટેકનોલોજી પરનો ખર્ચ પણ વધશે. આ સીધી રીતે આઈટી કંપનીઓ માટે નવી તકોના દરવાજા ખોલશે.

ઓટોમેશનથી આગળનું મોટું પગલું

TCS સ્પષ્ટ માને છે કે AI માત્ર ઓટોમેશન પૂરતું સીમિત નથી. આ ટેકનોલોજી સપ્લાય ચેનથી લઈને ગ્રાહકો સાથેના જોડાણ સુધીના આખા બિઝનેસ ઓપરેશનને નવેસરથી ડિઝાઈન કરવાનું માધ્યમ છે. આ વાતને સમજાવવા તેમણે ઉદાહરણ આપ્યું કે કંપનીએ એક ગ્લોબલ બેંક માટે એવું સ્પેશિયલ AI પ્લેટફોર્મ બનાવ્યું છે જે તે બેંકની આખી કસ્ટમર પ્રોસેસ જાતે હેન્ડલ કરી શકે છે.

જેમ જેમ AI એજન્ટ્સ જાતે નવું શીખતા થશે અને સ્વતંત્ર રીતે કામ કરતા થશે, તેમ કંપનીઓને તેમને મેનેજ કરવા માટે ઘણી મદદ જોઈશે. કંપનીઓને AI ના ટ્રેનિંગ, ગવર્નન્સ, કમ્પ્લાયન્સ, મોનિટરિંગ અને કોસ્ટ મેનેજમેન્ટની જરૂર પડશે. આ જ બાબતો આઈટી કંપનીઓ માટે લાંબા ગાળાના બિઝનેસની તકો પૂરી પાડશે.

સોવરેન AI ની વધતી ડિમાન્ડ

અત્યારે વિશ્વભરની સરકારો અને અમુક ખાસ રેગ્યુલેટેડ સેક્ટર્સને પોતાના ડેટા અને સિક્યોરિટી પર વધારે મજબૂત કંટ્રોલની જરૂર હોય છે. આ સુરક્ષાના કારણોસર જ 'સોવરેન AI' ઇન્ફ્રાસ્ટ્રક્ચરની માંગમાં વધારો જોવા મળી રહ્યો છે. ગ્રાહકોની આ ખાસ જરૂરિયાતને પહોંચી વળવા માટે TCS એ ભારત અને યુરોપમાં પહેલેથી જ સોવરેન AI ઇન્ફ્રાસ્ટ્રક્ચર સોલ્યુશન્સ લોન્ચ કરી દીધા છે અને ગ્રાહકોની જૂની સિસ્ટમને AI સાથે જોડવામાં મદદ કરી રહી છે.

આ પણ વાંચો-CMR Green IPO: 631 કરોડના ઈશ્યુને મળ્યો બમ્પર રિસ્પોન્સ, લિસ્ટિંગમાં પણ તગડા નફાની પૂરી શક્યતા