TRAI Data: ડિસેમ્બરમાં Airtel અને Jioનો દબદબો! જાણો BSNL અને Viની હાલત કેવી છે?

TRAI Data: ભારતીય ટેલિકોમ સેક્ટર માટે ડિસેમ્બર 2025નો મહિનો ખૂબ જ મહત્વપૂર્ણ રહ્યો છે. TRAI (ટેલિકોમ રેગ્યુલેટરી ઓથોરિટી ઓફ ઈન્ડિયા) એ તાજેતરમાં જાહેર કરેલા આંકડા મુજબ, મોબાઈલ ગ્રાહકોની સંખ્યામાં વધારો તો થયો છે, પરંતુ આ ફાયદો બધી કંપનીઓને એકસરખો નથી મળ્યો. જ્યાં એક તરફ રિલાયન્સ જિયો અને ભારતી એરટેલ જેવી ખાનગી કંપનીઓએ લાખો નવા ગ્રાહકો ઉમેર્યા છે, ત્યાં બીજી તરફ વોડાફોન આઈડિયા (Vi) અને સરકારી કંપની BSNL ના યુઝર્સની સંખ્યામાં સતત ઘટાડો જોવા મળી રહ્યો છે.

Airtel અને Jioને જબરદસ્ત ફાયદો

ડિસેમ્બર મહિનાના આંકડા જોઈએ તો, ભારતી એરટેલે બાજી મારી લીધી છે. આ એક જ મહિનામાં Airtel એ આશરે 54.2 લાખ (54,28,314) નવા મોબાઈલ ગ્રાહકો પોતાના નેટવર્ક સાથે જોડ્યા છે. બીજી બાજુ, દેશની સૌથી મોટી ટેલિકોમ કંપની રિલાયન્સ જિયો પણ પાછળ નથી રહી. Jioને ડિસેમ્બરમાં લગભગ 29.60 લાખ નવા વાયરલેસ ગ્રાહકો મળ્યા છે.

આ બંને કંપનીઓએ ભારતના અલગ-અલગ સર્કલોમાં પોતાની પકડ મજબૂત કરી છે અને સતત ગ્રાહકો વધારવામાં સફળ રહી છે.

એરટેલ અને જિયોની સફળતાની સામે, વોડાફોન આઈડિયા (Vi) અને BSNL માટે સમય મુશ્કેલ ચાલી રહ્યો છે. Vi માટે ગ્રાહકો ગુમાવવાનો સિલસિલો ડિસેમ્બરમાં પણ ચાલુ રહ્યો. આંકડા મુજબ, Vi એ ડિસેમ્બર મહિનામાં લગભગ 9.4 લાખ મોબાઈલ ગ્રાહકો ગુમાવ્યા છે.

બીજી તરફ, સરકારી કંપની BSNLની હાલત પણ બહુ સારી નથી. કંપનીએ લગભગ 2.06 લાખ ગ્રાહકો ગુમાવ્યા છે. જોકે, રાહતની વાત એ છે કે BSNLને અમુક સર્કલોમાં થોડો ફાયદો થયો છે, પરંતુ કુલ મળીને તેમના યુઝર બેઝમાં ઘટાડો જ નોંધાયો છે.

ડિસેમ્બરમાં 72 લાખથી વધુ નવા મોબાઈલ કનેક્શન

એકંદરે જોઈએ તો ભારતીય ટેલિકોમ માર્કેટમાં ગ્રોથ જોવા મળ્યો છે. TRAIના રિપોર્ટ પ્રમાણે, ડિસેમ્બર મહિનામાં તમામ ટેલિકોમ કંપનીઓએ મળીને કુલ 72.3 લાખ નવા મોબાઈલ ગ્રાહકો જોડ્યા છે.

ભારતમાં કુલ ટેલિફોન યુઝર્સની સંખ્યા (વાયરલેસ અને વાયર્ડ બંને મળીને) ડિસેમ્બર 2025 સુધીમાં વધીને 1.306 બિલિયન થઈ ગઈ છે. આ મહિનામાં યુઝર્સની સંખ્યામાં 0.66%નો વધારો થયો છે. આંકડા સ્પષ્ટ કરે છે કે મોબાઈલ માર્કેટમાં પ્રાઈવેટ કંપનીઓનો દબદબો છે, જેમનો હિસ્સો 31 ડિસેમ્બર 2025 સુધીમાં 92.53% રહ્યો છે, જ્યારે સરકારી કંપનીઓ (BSNL/MTNL) પાસે માત્ર 7.47% હિસ્સો બચ્યો છે.

કોની પાસે કેટલો માર્કેટ શેર?

હાલના આંકડા મુજબ માર્કેટમાં રિલાયન્સ જિયો નંબર વન પર કાયમ છે, પણ એરટેલ તેને જોરદાર ટક્કર આપી રહ્યું છે. ચાલો જોઈએ કોની પાસે કેટલો પાવર છે:

Reliance Jio: 39.31% માર્કેટ શેર સાથે સૌથી આગળ છે. તેમના કુલ 489.05 મિલિયન ગ્રાહકો છે.

Bharti Airtel: 37.24% માર્કેટ શેર ધરાવે છે. નવેમ્બર 2025 માં તેમના 457.96 મિલિયન ગ્રાહકો હતા જે વધીને હવે 463.38 મિલિયન થઈ ગયા છે.

Vodafone Idea (Vi): 15.98% માર્કેટ શેર સાથે ત્રીજા નંબરે છે. તેમના કુલ ગ્રાહકો 198.77 મિલિયન છે.

BSNL: 7.46% હિસ્સા સાથે ચોથા ક્રમે છે અને તેમના 92.76 મિલિયન ગ્રાહકો છે.

MTNL: માત્ર 0.02% હિસ્સો ધરાવે છે અને તેમના 0.23 મિલિયન ગ્રાહકો છે.

ડિસેમ્બર 2025નો ડેટા સ્પષ્ટ કરે છે કે ભારતીય ગ્રાહકો સારી સર્વિસ અને નેટવર્ક તરફ વળી રહ્યા છે, જેના કારણે એરટેલ અને જિયોનો ગ્રાફ સતત ઉપર જઈ રહ્યો છે.

આ પણ વાંચો- ‘વંદે માતરમ' અંગે કેન્દ્રનો મોટો નિર્ણય: હવે 6 છંદ ગાવા પડશે, ઊભા થવું ફરજિયાત કે નહીં? જાણો નવી ગાઈડલાઈન