UPIનો મોટો રેકોર્ડ: ઓક્ટોબરમાં દરરોજ 1 લાખ કરોડથી વધુ ટ્રાન્ઝેક્શન, MDR ચાર્જની તૈયારી વચ્ચે ડિજિટલ પેમેન્ટમાં ધમાકો

UPI Transaction Record: ભારતમાં ડિજિટલ પેમેન્ટ હવે લોકોની રોજિંદી જિંદગીનો અભિન્ન હિસ્સો બની ગયું છે. નાની દુકાનથી લઈને મોટા મોલ સુધી, બધે જ UPI સ્કેન કરીને પેમેન્ટ થાય છે. અને હવે આ UPI એ એક એવો રેકોર્ડ બનાવ્યો છે જેની કલ્પના પણ મુશ્કેલ હતી. ઓક્ટોબર 2026 માં પ્રથમ વખત દરરોજ સરેરાશ 1 લાખ કરોડ રૂપિયાથી વધુનું ટ્રાન્ઝેક્શન UPI દ્વારા થયું છે. NPCI ના તાજા આંકડા મુજબ આખા મહિનામાં કુલ 31.53 લાખ કરોડ રૂપિયાનું લેવડદેવડ થયું, જે કોઈ પણ એક મહિનાનો અત્યાર સુધીનો સૌથી મોટો આંકડો છે.

ઓક્ટોબરના આંકડા કેટલા મોટા છે?

NPCIના ડેટા પર નજર કરીએ તો ઓક્ટોબર મહિનો ખરેખર ઐતિહાસિક રહ્યો:

કુલ માસિક ટ્રાન્ઝેક્શન વેલ્યૂ: 31.53 લાખ કરોડ રૂપિયા

કુલ ટ્રાન્ઝેક્શન સંખ્યા: 2547 કરોડ

દૈનિક સરેરાશ ટ્રાન્ઝેક્શન: 82.1 કરોડ

આ પહેલાં સપ્ટેમ્બર 2026 માં દૈનિક સરેરાશ ટ્રાન્ઝેક્શન વેલ્યૂ લગભગ 98,000 કરોડ રૂપિયા હતી. અને માસિક ટ્રાન્ઝેક્શનનો જૂનો રેકોર્ડ મે 2026 માં 29.9 લાખ કરોડ રૂપિયાનો હતો. ઓક્ટોબરમાં પ્રથમ વખત માસિક આંકડો 30 લાખ કરોડની સપાટી વટાવી ગયો.

ટ્રાન્ઝેક્શન સંખ્યામાં પણ રેકોર્ડ

માત્ર રકમ જ નહીં, ટ્રાન્ઝેક્શનની સંખ્યામાં પણ નવો રેકોર્ડ બન્યો છે. ઓક્ટોબરમાં 2547 કરોડ ટ્રાન્ઝેક્શન થયા, જ્યારે અગાઉનો રેકોર્ડ ઓગસ્ટ 2026 માં લગભગ 2450 કરોડનો હતો. દૈનિક સરેરાશ 82.1 કરોડ ટ્રાન્ઝેક્શનનો આંકડો પણ સપ્ટેમ્બરના 80.2 કરોડના રેકોર્ડને પાછળ છોડી દીધો. આ વધારા પાછળ બે મુખ્ય કારણો છે. એક તો તહેવારોની સિઝનમાં ખરીદી અને ગ્રાહક ખર્ચમાં મોટો ઉછાળો આવ્યો, અને બીજું ઓક્ટોબરમાં 31 દિવસ હોવાથી કુલ સંખ્યા વધુ રહી. સામાન્ય રીતે 31 દિવસવાળા મહિનામાં ટ્રાન્ઝેક્શન વધુ થાય છે. ઉલ્લેખનીય છે કે NPCI દેશના કુલ ડિજિટલ પેમેન્ટ ટ્રાન્ઝેક્શનમાં લગભગ 89% હિસ્સો ધરાવે છે.

MDR ચાર્જ: દિવાળી પછી શું થશે?

આ રેકોર્ડ એવા સમયે બન્યો છે જ્યારે UPI પર મર્ચન્ટ ડિસ્કાઉન્ટ રેટ ચાર્જ લાગુ કરવાની તૈયારી ચાલી રહી છે. NPCI એ ગયા મહિને MDR ચાર્જ લાગુ કરવાનો નિર્ણય દિવાળી પછી સુધી ટાળી દીધો હતો.

MDR અંગેની મુખ્ય વાતો આ પ્રમાણે છે.

MDR દર: 2,000 રૂપિયાથી વધુના મર્ચન્ટ ટ્રાન્ઝેક્શન પર 0.4% (40 બેસિસ પોઈન્ટ)

ઉદાહરણ: 10,000 રૂપિયાના પેમેન્ટ પર દુકાનદારે 40 રૂપિયા ચાર્જ ચૂકવવો પડી શકે

કોને લાગશે: ડિજિટલ પેમેન્ટ પ્રોસેસ કરવા બદલ વેપારીઓ પાસેથી આ ચાર્જ વસૂલાશે

અસર: બેંકો અને પેમેન્ટ કંપનીઓને આશરે 15,000 કરોડ રૂપિયાની વધારાની આવક થઈ શકે

UPI એ ભારતની ડિજિટલ ક્રાંતિનું સૌથી મોટું ઉદાહરણ છે. ઓક્ટોબર 2026 ના આંકડા સાબિત કરે છે કે દેશ કેશલેસ ઇકોનોમી તરફ ઝડપથી આગળ વધી રહ્યો છે. જોકે, દિવાળી પછી MDR ચાર્જ લાગુ થશે તો તેની અસર વેપારીઓ અને ગ્રાહકો પર કેવી પડશે તે જોવું રહ્યું. હાલ તો UPI નો આ રેકોર્ડ દેશના ડિજિટલ ઇન્ફ્રાસ્ટ્રક્ચરની મજબૂતાઈ દર્શાવે છે.

આ પણ વાંચો-સોવરિન ગોલ્ડ બોન્ડ પર 200%થી વધુ રિટર્ન, RBIએ રિડેમ્પશન પ્રાઇસ જાહેર કર્યો, જાણો ટેક્સના નવા નિયમો