Wipro Share Buyback: વિપ્રોનો 15000 કરોડનો બાયબેક ઓફર આજથી શરૂ, જાણો શેરદીઠ ભાવ અને રેશિયો સહિતની તમામ માહિતી

Wipro Share Buyback: આઈટી (IT) સેક્ટરની દિગ્ગજ કંપની વિપ્રો (Wipro) ના રોકાણકારો માટે મોટા સમાચાર છે. કંપનીનો 15000 કરોડ રૂપિયાનો મેગા શેર બાયબેક (Share Buyback) ઓફર આજથી એટલે કે 11 જૂનથી ખુલી ગયો છે. જો તમારી પાસે પણ વિપ્રોના શેર છે અને તમે તેમાં ભાગ લેવા માંગો છો, તો તમારા માટે આ માહિતી ખૂબ જ અગત્યની છે. ચાલો સરળ ભાષામાં સમજીએ આ બાયબેકની તમામ લેટેસ્ટ ડિટેલ્સ.

કેટલો મોટું છે આ બાયબેક?

વિપ્રો આ બાયબેક હેઠળ 15000 કરોડ રૂપિયા ખર્ચીને પોતાના શેરધારકો પાસેથી કુલ 60 કરોડ શેરો પાછા ખરીદવા જઈ રહી છે. આ બાયબેક માટેની રેકોર્ડ ડેટ 5 જૂન, 2026 નક્કી કરવામાં આવી હતી. સરળ શબ્દોમાં કહીએ તો, 5 જૂન સુધી જે લોકોના ડીમેટ એકાઉન્ટમાં વિપ્રોના શેર હતા અને કંપનીના રેકોર્ડમાં તેમનું નામ નોંધાયેલું હતું, માત્ર તેઓ જ આ ઓફરમાં ભાગ લેવા માટે પાત્ર (Eligible) ગણાશે.

બાયબેકની મહત્વની તારીખો અને વિગતો:

* ઓફર બંધ થવાની તારીખ (Closing Date): 17 જૂન

* મેનેજર: જેએમ ફાઇનાન્શિયલ (JM Financial)

* રજિસ્ટ્રાર: કેફિનટેક ટેક્નોલોજિસ લિમિટેડ

અગાઉ કંપનીના બોર્ડ ઓફ ડિરેક્ટર્સે 16 એપ્રિલના રોજ આ 2026 ના બાયબેક પ્રોગ્રામને લીલી ઝંડી આપી હતી.

શું છે શેરનો ભાવ?

કંપનીએ આ બાયબેક માટે શેરની કિંમત (Buyback Price) 250 રૂપિયા પ્રતિ શેર નક્કી કરી છે. ખાસ વાત એ છે કે આ ઓફરમાં કંપનીના પ્રમોટર્સ અને પ્રમોટર ગ્રુપના સભ્યો પણ ભાગ લેવાના છે. અગાઉ કંપનીએ 3 વર્ષ પહેલાં જૂન 2023 માં 12000 કરોડ રૂપિયાનો બાયબેક કર્યો હતો, જેમાં ભાવ 445 રૂપિયા હતો.

શેર મંજૂર થવાનો રેશિયો શું છે?

જો તમે બાયબેકમાં એપ્લાય કરો છો, તો તમારા કેટલા શેર વેચાશે તે આ રેશિયો પર નિર્ભર કરે છે:

નાના રોકાણકારો માટે (રિટેલ કેટેગરી): જો રેકોર્ડ ડેટ (5 જૂન) ના રોજ તમારા ખાતામાં 56 શેર હતા, તો તમે તેમાંથી 11 શેર બાયબેકમાં આપી શકશો.

સામાન્ય કેટેગરી માટે (જનરલ): મોટા રોકાણકારો કે જેમની પાસે 197 શેર છે, તેઓ તેમાંથી 10 શેર ટેન્ડર (વેચાણ માટે રજૂ) કરી શકશે.

બાયબેકમાં કેવી રીતે ભાગ લેવો?

વિપ્રોના શેરહોલ્ડર્સ પોતાના રજિસ્ટર્ડ સ્ટોક બ્રોકરનો સંપર્ક કરીને BSE અથવા NSE પર ખુલનારી સ્પેશિયલ વિન્ડો દ્વારા આ બાયબેકમાં પોતાની બોલી લગાવી શકે છે.

ધ્યાનમાં રાખવાની બાબતો: બાયબેકમાં ભાગ લેવા માટે તમારું ડીમેટ એકાઉન્ટ એક્ટિવ અને અનબ્લોક હોવું જોઈએ. સાથે જ, બેંક એકાઉન્ટ ડીમેટ સાથે લિંક હોવું ફરજિયાત છે, જેથી પેમેન્ટ સીધું બેંકમાં આવી શકે.

આગળની પ્રોસેસ અને પેમેન્ટ ક્યારે મળશે?

19 જૂન, 2026: રજિસ્ટ્રાર દ્વારા જમા થયેલા તમામ શેરોનું વેરિફિકેશન પૂરું કરવામાં આવશે.

23 જૂન: કેટલા શેર મંજૂર થયા છે અને કેટલા રિજેક્ટ થયા છે, તેની માહિતી સ્ટોક એક્સચેન્જને આપી દેવાશે.

24 જૂન: પાત્ર રોકાણકારોના ખાતામાં પેમેન્ટ જમા થઈ જશે. જે શેર કંપનીએ નથી સ્વીકાર્યા, તે પણ 24 જૂન સુધીમાં તમારા ડીમેટ એકાઉન્ટમાં પાછા આપી દેવામાં આવશે.

શેરબજારમાં વિપ્રોના શેરની હાલની સ્થિતિ

11 જૂનના રોજ બજારમાં વિપ્રોના શેરમાં થોડું દબાણ જોવા મળ્યું હતું. BSE પર શેરનો ભાવ અગાઉના બંધ ભાવથી લગભગ 1.7 ટકા ઘટીને 175.80 રૂપિયાના નીચલા સ્તરે પહોંચી ગયો હતો. હાલમાં કંપનીની માર્કેટ કેપિટલ (Market Cap) 1.86 લાખ કરોડ રૂપિયા છે અને તે BSE 100 ઇન્ડેક્સનો અગત્યનો હિસ્સો છે.

છેલ્લા કેટલાક સમયથી શેરમાં નબળાઈ જોવા મળી છે. છેલ્લા એક સપ્તાહમાં શેર 13 ટકા અને 6 મહિનામાં 30 ટકા જેટલો તૂટ્યો છે. માર્ચ 2026 ના આંકડા મુજબ કંપનીમાં પ્રમોટર્સનો હિસ્સો 72.62 ટકા છે. બજારના 45 એક્સપર્ટ્સ (એનાલિસ્ટ્સ) માંથી 11 નિષ્ણાતો આ શેર ‘ખરીદવાની' (Buy), 19 નિષ્ણાતો ‘હોલ્ડ' કરવાની અને 15 નિષ્ણાતો તેને ‘વેચવાની' (Sell) સલાહ આપી રહ્યા છે.

આ પણ વાંચો - દુનિયાના સૌથી શાંતિપૂર્ણ દેશોની યાદી જાહેર: ગ્લોબલ પીસ ઇન્ડેક્સ 2026માં અમેરિકા અને પાકિસ્તાનને મોટો ઝટકો, જાણો ભારત કયા નંબરે છે?

Disclaimer: મનીકંટ્રોલ.કોમ પર આપવામાં આવેલી સલાહ કે વિચારો એક્સપર્ટ/બ્રોકરેજ ફર્મના અંગત મંતવ્યો છે. વેબસાઇટ કે તેનું મેનેજમેન્ટ તેના માટે જવાબદાર નથી. યુઝર્સને મનીકંટ્રોલ દ્વારા સલાહ આપવામાં આવે છે કે કોઈપણ રોકાણનો નિર્ણય લેતા પહેલા હંમેશા પ્રમાણિત નિષ્ણાતની સલાહ લેવી.