કોમોડિટી લાઇવ: ક્રૂડ ઓઈલમાં વોલેટાઈલ કારોબાર, સોના-ચાંદીની ચમકમાં વધારો

શરૂઆતી કારોબારમાં ડૉલર સામે રૂપિયો 10 પૈસા મજબૂત થઈ 85.85 પ્રતિ ડૉલરની સામે 85.75 પ્રતિડૉલર પર ખૂલ્યો. જોકે ત્યાર બાદ રૂપિયાના સ્તરની આસપાસ કારોબાર જોવા મળી રહ્યો છે.

સોનામાં શરૂઆતી તેજી બાદ ઉપલા સ્તરેથી કિંમતોમાં મામુલી નરમાશ રહી, જ્યાં comex પર ભાવ 3340 ડૉલરની નીચે આવ્યા, તો સ્થાનિક બજારમાં 97,120ના સ્તરની પાસે કારોબાર જોવા મળ્યો હતો. ઉલ્લેખનિય છે કે US તરફથી 14 દેશો પર ટેરિફની જાહેરાત બાદ અને ડૉલર ઇન્ડેક્સમાં વેચવાલીના કારણે સોનાને સપોર્ટ મળતો દેખાયો હતો, પણ હવે બજારની નજર ભારત માટે USની ટ્રેડ પૉલિસી પર બનેલી છે.

સ્થાનિક બજારમાં શરૂઆતી કારોબારમાં કોપર સહિત તમામ મેટલ્સમાં મજબૂતી જોવા મળી હતી, માત્ર લેડમાં થોડી ઓછી તેજી જોઈ, પણ વૈશ્વિક બજારમાં USના ચાઈના પર ટેરિફ 1 ઓગસ્ટથી લાગૂ થવાના સમાચાર બાદ મેટલ્સના સેન્ટિમેન્ટ બગડતા દેખાયા.

ક્રૂડ ઓઈલમાં 70 ડૉલરને પહોંચ્યા બાદ બ્રેન્ટમાં ફરી દબાણ આવતા ભાવ 70 ડૉલરની નીચે પહોંચ્યા, તો NYMEX ક્રૂડમાં આશરે અડધા ટકાથી વધુની વેચવાલી સાથે 68 ડૉલરની નીચે કારોબાર જોવા મળી રહ્યો છે. અહીં ગઈકાલે ભાવ આશરે 2 ટકા વધતા દેખાયા હતા, ઉલ્લેખનિય છે કે સાઉદી અરેબિયાએ એશિયા માટે ક્રૂડની કિંમતોમાં વધારો કર્યો છે..જેના કારણે કિંમતોમાં ઉછાળો જોવા મળ્યો હતો.

શરૂઆતી કારોબારમાં સ્થાનિક બજારમાં નેચરલ ગેસની કિંમતો આશરે 1 ટકાથી વધુ ઘટીને 291ના સ્તરની પાસે પહોંચતી જોવા મળી હતી.

કૉટનમાં કારોબાર કિંમતો ઘટીને 1 સપ્તાહના નીચલા સ્તરે પહોંચી. USDA એ કહ્યું કે સાપ્તાહિક ધોરણે USનો કૉટન એક્સપોર્ટ 13% ઘટ્યો.