સોના-ચાંદી બન્યા રોકેટ! 7 દિવસમાં સોનામાં 16,000થી વધુનો ઉછાળો, ચાંદીનો ભાવ 3.40 લાખને પાર, જાણો લેટેસ્ટ રેટ્સ

Gold and Silver Price Today: જો તમે સોનું કે ચાંદી ખરીદવાનું વિચારી રહ્યા હોવ, તો આ સમાચાર તમારા હોશ ઉડાવી શકે છે. છેલ્લા એક અઠવાડિયામાં સોના અને ચાંદી બંનેએ એવી તેજ રફ્તાર પકડી છે કે રોકાણકારોથી લઈને સામાન્ય ખરીદદારો પણ આશ્ચર્યચકિત થઈ ગયા છે. લગ્નની સીઝન અને રોકાણ માટે શ્રેષ્ઠ ગણાતા સોનાએ વીકલી બેઝિસ પર રેકોર્ડબ્રેક તેજી બતાવી છે, જ્યારે ચાંદી પણ નવી ઊંચાઈઓ સર કરી રહી છે.

દેશમાં ફરી એકવાર સોનું અને ચાંદી 'સેફ હેવન' એટલે કે સુરક્ષિત રોકાણ તરીકે ઉભરી આવ્યા છે. બુલિયન માર્કેટમાં એવી હલચલ મચી છે કે જૂના તમામ રેકોર્ડ તૂટી ગયા છે.

એક જ અઠવાડિયામાં સોનામાં જબરદસ્ત ઉછાળો

છેલ્લા 7 દિવસના આંકડા જોઈએ તો સોનાના ભાવ આસમાને પહોંચ્યા છે. વીકલી બેઝિસ પર 24 કેરેટ સોનાના ભાવમાં લગભગ 16,480 રૂપિયાનો તોતિંગ વધારો નોંધાયો છે. આ સાથે જ 22 કેરેટ સોનું પણ 15,100 રૂપિયા સુધી મોંઘું થયું છે.

* 24 કેરેટ સોનું: 1,60,410 રૂપિયા પ્રતિ 10 ગ્રામ

* 22 કેરેટ સોનું: 1,47,050 રૂપિયા પ્રતિ 10 ગ્રામ

આ ભાવ અત્યાર સુધીના સૌથી ઉંચા સ્તરોમાંથી એક માનવામાં આવે છે.

દેશના મોટા શહેરોમાં શું છે સોનાના ભાવ?

દિલ્હી સિવાય દેશના અન્ય મહાનગરોમાં પણ સોનાની કિંમતોમાં એકસરખી તેજી જોવા મળી છે. મુંબઈ, ચેન્નઈ અને કોલકાતા જેવા શહેરોમાં 24 કેરેટ સોનાનો ભાવ 1,60,260 રૂપિયા પ્રતિ 10 ગ્રામ નોંધાયો છે. જ્યારે અહીં 22 કેરેટ સોનું 1,46,900 રૂપિયાની આસપાસ ટ્રેડ થઈ રહ્યું છે. પુણે અને બેંગલુરુમાં પણ લગભગ આ જ ભાવ ચાલી રહ્યા છે.

આંતરરાષ્ટ્રીય બજારમાં કેમ આવી તેજી?

સોનાના ભાવમાં આવેલા આ ઉછાળા પાછળ આંતરરાષ્ટ્રીય બજારનો મોટો હાથ છે. ગ્લોબલ માર્કેટમાં સોનાનો હાજર ભાવ રેકોર્ડ 4,967.41 ડોલર પ્રતિ ઔંસ સુધી પહોંચી ગયો છે. દુનિયાભરમાં ચાલી રહેલી આર્થિક અનિશ્ચિતતા અને જિયો-પોલિટિકલ તણાવને કારણે રોકાણકારો સુરક્ષિત વિકલ્પ તરીકે સોના તરફ વળ્યા છે, જેના કારણે ભાવ વધી રહ્યા છે.

હજુ પણ મોંઘું થઈ શકે છે સોનું

નિષ્ણાતોનું માનીએ તો સોનાની તેજી અહીં અટકવાની નથી. ગોલ્ડમેન સૅક્સ જેવી દિગ્ગજ સંસ્થાએ ડિસેમ્બર 2026 માટે સોનાનો ટાર્ગેટ વધારીને 5400 ડોલર પ્રતિ ઔંસ કરી દીધો છે. જો અમેરિકન ફેડરલ રિઝર્વ વ્યાજદરોમાં ઘટાડો કરે છે, તો સોના-ચાંદીમાં રોકાણ હજુ વધશે અને ભાવ વધુ ઊંચા જઈ શકે છે.

ચાંદી પણ નથી પાછળ, ભાવ સાંભળી ચોંકી જશો

ફક્ત સોનું જ નહીં, ચાંદીએ પણ રોકાણકારોને માલામાલ કરી દીધા છે. છેલ્લા એક અઠવાડિયામાં ચાંદીના ભાવમાં લગભગ 40,000 રૂપિયાનો ઉછાળો આવ્યો છે.

25 જાન્યુઆરીના રોજ ચાંદીનો ભાવ 3,40,000 રૂપિયા પ્રતિ કિલોગ્રામના સ્તરે પહોંચી ગયો છે.

વિદેશી બજારોમાં પણ ચાંદી મજબૂતી સાથે 99.46 ડોલર પ્રતિ ઔંસના ભાવે ટ્રેડ કરી રહી છે.

આમ, વર્તમાન સમયમાં બુલિયન માર્કેટમાં જબરદસ્ત તેજી જોવા મળી રહી છે, જે આગામી સમયમાં પણ ચાલુ રહે તેવી શક્યતા છે.

આ પણ વાંચો- Padma Awards 2026: ગુજરાતના 5 રત્નોને પદ્મ શ્રીનું સન્માન; ‘અનુપમા’ના બાપુજી, હાસ્ય સમ્રાટ રતિલાલ બોરીસાગર સહિત આ મહાનુભાવોની પસંદગી