Commodity Market Updates: ઉત્તરાયણ પૂર્વે જ ઝવેરી બજારમાં તેજીનો પતંગ આસમાને પહોંચ્યો છે. સોના અને ચાંદીના ભાવમાં આજે તોફાની ઉછાળો જોવા મળ્યો હતો, જેના કારણે ઈતિહાસમાં ક્યારેય ન જોવા મળ્યા હોય તેવા ઊંચા ભાવ નોંધાયા છે. વૈશ્વિક બજારમાં કિંમતી ધાતુઓના ભાવ વધતા ભારતમાં પણ તેની સીધી અસર જોવા મળી છે, જેના લીધે આયાત પડતર (Import Cost) વધી ગઈ છે.
સોના-ચાંદીમાં ઐતિહાસિક તેજી: સોનું 1,44,500 અને ચાંદી 2.55 લાખને પાર, જાણો ભાવ વધવાનું મુખ્ય કારણ
Gold Silver Price: અમદાવાદમાં સોનાનો ભાવ 10 ગ્રામે 1,44,500 થયો અને ચાંદી કિલોએ 2,55,000 પર પહોંચી. વૈશ્વિક બજારમાં સોનું 4600 ડોલરને પાર. જાણો ભાવ વધારાના મુખ્ય કારણો અને MCXના આજના લેટેસ્ટ ભાવ.
અપડેટેડ 12:42:43 PM Jan 13, 2026 પર
Commodity Market Updates: ઉત્તરાયણ પૂર્વે જ ઝવેરી બજારમાં તેજીનો પતંગ આસમાને પહોંચ્યો છે.
અમદાવાદમાં સોના-ચાંદીના નવા રેકોર્ડ
અમદાવાદ ઝવેરી બજારમાં આજે સોનાના ભાવમાં એક જ દિવસમાં 10 ગ્રામ દીઠ 1700 રૂપિયાનો જબરદસ્ત વધારો થયો છે.
* સોનું (99.5): 1,44,200 રૂપિયા
* સોનું (99.9): 1,44,500 રૂપિયા
બીજી તરફ, ચાંદીમાં પણ આગ ઝરતી તેજી જોવા મળી છે. અમદાવાદમાં ચાંદીના ભાવમાં એક કિલોએ સીધો 7000 રૂપિયાનો વધારો થતાં ભાવ 2,55,000 રૂપિયાની રેકોર્ડ સપાટીએ પહોંચી ગયો છે.
વૈશ્વિક બજારમાં સોનું 4600 ડોલરને પાર
વિશ્વ બજારમાં પણ સોનાએ નવી ઊંચાઈ સર કરી છે. સોનાનો ભાવ 4509-4510 ડોલરથી વધીને ઊંચામાં 4600 ડોલરની સપાટીને આંબી ગયો હતો, જે બાદ થોડો ઘટીને 4582-4583 ડોલર રહ્યો હતો. ચાંદીના વૈશ્વિક ભાવ પણ ઉછળીને 85 ડોલરની નજીક પહોંચી ગયા હતા. ચાંદી 79.85 ડોલરથી વધીને ઊંચામાં 84.60 ડોલર થઈ હતી.
ભાવ વધવા પાછળના મુખ્ય કારણો
બજારના નિષ્ણાતોના મતે આ તેજી પાછળ મુખ્યત્વે અમેરિકાની સ્થિતિ જવાબદાર છે.
આર્થિક તણાવ: અમેરિકામાં ફેડરલ રિઝર્વના અધ્યક્ષ અને ડોનાલ્ડ ટ્રમ્પ વચ્ચે તણાવ વધતા ડોલરનો ઇન્ડેક્સ તૂટ્યો છે, જેના કારણે રોકાણકારો સોના તરફ વળ્યા છે.
ભૌગોલિક તણાવ: વેનેઝુએલા બાદ હવે અમેરિકાએ ઈરાન, ગ્રીનલેન્ડ અને કોલંબિયા તરફ કડક વલણ દાખવતા વૈશ્વિક રાજકીય અરાજકતાનો ભય ઉભો થયો છે. આવા સમયે સોનું 'સેફ હેવન' (સુરક્ષિત રોકાણ) માનવામાં આવે છે, તેથી તેની માંગ વધી છે.
મુંબઈ બજાર અને અન્ય કિંમતી ધાતુઓ
મુંબઈમાં જીએસટી વગર સોનાનો ભાવ (99.9) 1,40,449 રૂપિયા અને ચાંદીનો ભાવ 2,56,776 રૂપિયા રહ્યો હતો. ગ્રાહકો માટે આ ભાવમાં 3 ટકા જીએસટી ઉમેરતા કિંમત હજુ વધુ થાય છે.
સોના-ચાંદી સિવાય અન્ય ધાતુઓમાં પણ તેજી છે, પ્લેટિનમ વધીને 2384 ડોલર થયું હતું. પેલેડિયમ 1900 ડોલરની સપાટી કૂદાવીને 1911 ડોલર સુધી પહોંચ્યું હતું. કોપરમાં પણ રેકોર્ડ તેજી જોવા મળી છે અને ભાવ 2.15 ટકા વધ્યા હતા. કોમોડિટી એક્સચેન્જ પર સોના-ચાંદીના વાયદાના ભાવમાં પણ મોટો ઉછાળો આવ્યો છે.
સોનું (ફેબ્રુઆરી વાયદો): 2691 રૂપિયા વધીને 1,41,510 રૂપિયાની સપાટીએ બંધ રહ્યો.
ચાંદી (માર્ચ વાયદો): તોતિંગ 11,728 રૂપિયાના ઉછાળા સાથે 2,64,453 રૂપિયાના સ્તરે પહોંચી.
આ દરમિયાન ક્રૂડ ઓઈલના ભાવમાં મિશ્ર વલણ જોવા મળ્યું હતું. બ્રેન્ટ ક્રૂડ વધીને 64 ડોલર થયા બાદ ઘટીને 62.86 ડોલર આસપાસ રહ્યું હતું. તેજી બાદ નવી માંગ ધીમી પડતા ક્રૂડમાં થોડો ઘટાડો નોંધાયો છે.
MoneyControl News
પહેલા મનીકંટ્રોલ ગુજરાતી પર ગુજરાતીમાં સ્ટોક માર્કેટ, Stock Tips, સમાચાર, પર્સનલ ફાઇનાન્સ અને બિઝનેસ સંબંધિત સમાચાર વાંચો. દૈનિક બજાર અપડેટ્સ માટે Moneycontrol App ડાઉનલોડ કરો.
