Silver Price Outlook: ટોચ પરથી 50% તૂટ્યા પછી પણ ચાંદીના ફંડામેન્ટલ્સ મજબૂત, સોલર એનર્જી અને AI સેક્ટરથી વધશે ડિમાન્ડ
ચાંદીના ભાવમાં ટોચ પરથી 50% નો કડાકો બોલાયો હોવા છતાં સિલ્વર ઈન્સ્ટિટ્યૂટના CEO માઈકલ ડિરીએન્ઝોનું માનવું છે કે લાંબા ગાળે ચાંદીની માંગ મજબૂત રહેશે. જાણો રોકાણ કરતા પહેલા ખાસ વાત.
સોના અને ચાંદી પર વધારાનો ટેક્સ લાગુ કરવામાં આવ્યા બાદ ભારતમાં ચાંદીની રોકાણ માંગ પર દબાણ જોવા મળ્યું છે.
Silver Price Outlook: તાજેતરમાં ચાંદીના ભાવમાં તેના સર્વોચ્ચ સ્તરપરથી અંદાજે 50% જેટલો મોટો કડાકો બોલાયો છે, જેના કારણે રોકાણકારોમાં ચિંતાનો માહોલ છે. પરંતુ 'સિલ્વર ઈન્સ્ટિટ્યૂટ'ના પ્રેસિડેન્ટ અને CEO માઈકલ ડિરીએન્ઝોએ રોકાણકારોને રાહત આપતું નિવેદન આપ્યું છે.
તેમણે જણાવ્યું છે કે ભાવમાં ભારે ઘટાડો આવ્યો હોવા છતાં, ચાંદીના લાંબા ગાળાના ફંડામેન્ટલ્સ જરા પણ નબળા પડ્યા નથી અને બજારમાં હવે ચાંદીની કિંમતોનું એક નવું નીચલું સ્તર નક્કી થઈ ગયું છે. તેમનું માનવું છે કે ટૂંકા ગાળાના દબાણ છતાં સોલર એનર્જી, ઈલેક્ટ્રોનિક્સ અને આર્ટિફિશિયલ ઈન્ટેલિજન્સ સેક્ટરમાંથી આવનારી માંગ ચાંદીના વપરાશને મજબૂત સપોર્ટ આપતી રહેશે.
3 મહિનામાં 50 ડોલરથી 120 ડોલર થઈ હતી ચાંદી
ચાંદીના ભાવમાં આ મોટો ઘટાડો આવતા પહેલાં, માત્ર 3 મહિનાના ટૂંકા ગાળામાં વૈશ્વિક બજારમાં ચાંદી અંદાજે 50 ડોલર પ્રતિ ઔંસથી ઉછળીને સીધી 120 ડોલર પ્રતિ ઔંસ સુધી પહોંચી ગઈ હતી. ડિરીએન્ઝોના મતે, તે સમયે આવેલી તેજી કદાચ જરૂર કરતા થોડી વધારે જ હતી. પરંતુ ચાંદીની માંગનો મૂળ આધાર હજુ પણ એકદમ મજબૂત છે અને હવે બજારમાં ભાવનું એક નવું બોટમ (નીચલું સ્તર) બની ગયું છે.
સોલર, ઈલેક્ટ્રોનિક્સ અને AI સેક્ટરથી મળશે મોટો ટેકો
ઔદ્યોગિક માંગ અંગે સિલ્વર ઈન્સ્ટિટ્યૂટનો અંદાજ છે કે વર્ષ 2026 માં ચાંદીના કુલ ઔદ્યોગિક વપરાશમાં આશરે 2% નો સામાન્ય ઘટાડો આવી શકે છે. સોલર પેનલોમાં ચાંદીનો ઓછો ઉપયોગ અને ફોટોવોલ્ટેઈક ટેકનોલોજીમાં થઈ રહેલા ફેરફારો તેનું મુખ્ય કારણ છે. જોકે, જો સોલર સેક્ટરની માંગને બાજુ પર રાખીએ, તો પણ અન્ય ક્ષેત્રોમાં ચાંદીના ઔદ્યોગિક વપરાશમાં અંદાજે 5% નો વધારો થવાની આશા છે.
સોલર પ્રોજેક્ટ્સમાં મહત્વ અકબંધ: ઊંચા ભાવને કારણે ઉત્પાદકો ચાંદીનો વપરાશ ઘટાડવાનો પ્રયાસ કરી રહ્યા છે, તેમ છતાં ખાસ કરીને જે સોલર પ્રોજેક્ટ્સ 25 થી 30 વર્ષ સુધી ચાલવા માટે ડિઝાઈન કરવામાં આવ્યા છે તેમાં ચાંદી ખૂબ જ મહત્વપૂર્ણ ધાતુ બની રહેશે.
AI અને ગ્રીન એનર્જી: ડિરીએન્ઝોએ કહ્યું કે દુનિયામાં લગભગ દરેક વસ્તુનું ઈલેક્ટ્રોનિક ટ્રાન્સફોર્મેશન આગળ પણ ચાલુ જ રહેશે. ગ્રીન એનર્જી તરફ વધતા ઝોકની સાથે AI અને મોટા ડેટા સેન્ટર્સના નિર્માણથી પણ ચાંદીની માંગને મોટો ફાયદો મળશે.
ઊંચા ટેક્સના કારણે ભારતમાં ચાંદીના રોકાણ પર દબાણ
ભારતીય બજારની વાત કરીએ તો, સોના અને ચાંદી પર વધારાનો ટેક્સ લાગુ કરવામાં આવ્યા બાદ ભારતમાં ચાંદીની રોકાણ માંગ પર દબાણ જોવા મળ્યું છે. દિવાળી પહેલાં ફિઝિકલ ચાંદીની ખરીદીમાં સુધારો ચોક્કસ થયો હતો, પરંતુ ઊંચા ટેક્સને કારણે રોકાણકારો આ ધાતુ ખરીદવાથી પાછળ હટી રહ્યા છે. ઉલ્લેખનીય છે કે તાજેતરના વર્ષોમાં ફિઝિકલ ખરીદી હોય કે એક્સચેન્જ ટ્રેડેડ પ્રોડક્ટ્સ, વૈશ્વિક સ્તરે ચાંદીની માંગ વધારવામાં ભારતનો ફાળો ખૂબ મોટો રહ્યો છે.
માત્ર 'સપ્લાયની અછત' જોઈને રોકાણ કરવાની ભૂલ ન કરતા!
સપ્લાય અંગે સિલ્વર ઈન્સ્ટિટ્યૂટનું અનુમાન છે કે વર્ષ 2026 માં બજારમાં ચાંદીની અછત ઘટીને આશરે 35 મિલિયન ઔંસ રહી જશે. ચાંદી ઉદ્યોગમાં સતત 6 વર્ષથી સપ્લાયની અછત જોવા મળી છે, જેમાં કુલ અછત 750 મિલિયન ઔંસથી વધુ રહી છે. આ આંકડો સમગ્ર વિશ્વની ખાણોમાંથી નીકળતી અંદાજે 1 વર્ષની કુલ સપ્લાય બરાબર છે.
જોકે, ડિરીએન્ઝોએ રોકાણકારોને ખાસ ચેતવણી આપતા કહ્યું છે કે, "બજારમાં ચાંદીની સપ્લાય ઓછી રહેશે માત્ર એવું વિચારીને ચાંદીમાં રોકાણ કરવાનું ટાળવું જોઈએ." તેમણે સ્પષ્ટ કર્યું કે બજારમાં હજુ પણ ઘણા મોટા પ્રમાણમાં ચાંદીનો સ્ટોક ઉપલબ્ધ છે. તેથી રોકાણકારોએ માત્ર સપ્લાયની અછતના આધારે રોકાણનો નિર્ણય લેવાથી બચવું જોઈએ.
ડિસ્ક્લેમર:- Moneycontrol.com પર વ્યક્ત કરવામાં આવેલા મંતવ્યો નિષ્ણાતોના પોતાના અંગત મંતવ્યો છે. આ મંતવ્યો કે ભલામણો માટે વેબસાઇટ અથવા તેનું મેનેજમેન્ટ કોઈપણ રીતે જવાબદાર નથી. મનીકંટ્રોલ તેના યુઝર્સને આગ્રહ કરે છે કે કોઈપણ પ્રકારનો રોકાણનો નિર્ણય લેતા પહેલા પ્રમાણિત નાણાકીય નિષ્ણાતની સલાહ ચોક્કસથી લેવી.