ટ્રમ્પની એક ધમકી અને ભારતીય ચોખા બજારમાં ભૂકંપ; KRBL અને LT ફૂડ્સના શેરમાં 7%નો કડાકો

Rice Stocks: અમેરિકાના રાષ્ટ્રપતિ ડોનાલ્ડ ટ્રમ્પના એક નિવેદનને કારણે ભારતીય ચોખા કંપનીઓના શેરમાં ભારે ઉથલપાથલ જોવા મળી છે. ટ્રમ્પે ભારતથી આયાત થતા ચોખા પર નવો ટેરિફ લગાવવાનો સંકેત આપતા જ 9 ડિસેમ્બરે ભારતીય શેરબજારમાં KRBL અને LT ફૂડ્સ જેવી મોટી ચોખા કંપનીઓના શેરમાં ભારે વેચવાલી જોવા મળી હતી. શરૂઆતી કારોબારમાં જ આ બંને કંપનીઓના શેરમાં 7% સુધીનો મોટો ઘટાડો નોંધાયો હતો.

ટ્રમ્પે શા માટે આપી ટેરિફની ચેતવણી?

આ સમગ્ર મામલાની શરૂઆત ત્યારે થઈ જ્યારે ડોનાલ્ડ ટ્રમ્પે સોમવારે અમેરિકન ખેડૂતો માટે 12 અબજ ડોલરના રાહત પેકેજની જાહેરાત કરી. આ દરમિયાન મીડિયા સાથે વાત કરતાં તેમણે દાવો કર્યો કે અમેરિકન ખેડૂતોએ તેમને ફરિયાદ કરી છે કે સસ્તી આયાતને કારણે તેમના ઉત્પાદનોને બજારમાં ટકી રહેવું મુશ્કેલ બની રહ્યું છે.

ખેડૂતોના મતે, ભારતીય ચોખાની અમેરિકામાં કથિત 'ડમ્પિંગ' (ઓછી કિંમતે વધુ માત્રામાં વેચાણ)ને કારણે ચોખાના ભાવ ઘટી રહ્યા છે. ખેડૂતોએ આરોપ લગાવ્યો કે માત્ર ભારત જ નહીં, પરંતુ વિયેતનામ અને થાઈલેન્ડ જેવા દેશો પણ ડમ્પિંગ કરી રહ્યા છે. આ મુદ્દે ટ્રમ્પે કડક વલણ અપનાવતા કહ્યું, "તેમણે ડમ્પિંગ ન કરવું જોઈએ. મેં ખેડૂતો પાસેથી આ સાંભળ્યું છે, અને તે ખોટું છે. તમે આવું ન કરી શકો." તેમણે ખાતરી આપી કે તેઓ આ કથિત ડમ્પિંગનો "ધ્યાન રાખશે," જોકે તેમણે કયા પગલાં લેવાશે તે સ્પષ્ટ કર્યું ન હતું. આ નિવેદનની સીધી અસર મંગળવારે શેરબજાર પર જોવા મળી.

KRBL લિમિટેડના મેનેજમેન્ટે તાજેતરમાં જણાવ્યું હતું કે હાલમાં ચોખાની નિકાસ પર 50% ડ્યુટી છે અને તેમને આશા છે કે બંને દેશોની સરકારો વચ્ચે ચાલી રહેલી વાતચીતથી કોઈ સમાધાન નીકળશે. મેનેજમેન્ટે સ્પષ્ટ કર્યું હતું કે, "અમારું અમેરિકન બજારમાં સીધું એક્સપોઝર ખૂબ જ ઓછું છે, તેથી અમારા બિઝનેસ પર તેની નાણાકીય અસર નહિવત્ રહેશે."

બીજી તરફ, LT ફૂડ્સ માટે પરિસ્થિતિ તદ્દન અલગ છે. કંપનીએ જણાવ્યું હતું કે તેની કુલ આવકનો 46% હિસ્સો ઉત્તર અમેરિકામાંથી આવે છે, જે ગત વર્ષની સરખામણીમાં 47% ની વૃદ્ધિ દર્શાવે છે. તેમની ફ્લેગશિપ બ્રાન્ડ અમેરિકાના બાસમતી ચોખાના આયાત બજારમાં 61% હિસ્સો ધરાવે છે. આ કારણે ટ્રમ્પની જાહેરાતની સૌથી વધુ અસર LT ફૂડ્સ પર જોવા મળી.

ટેરિફ મુદ્દે 10-11 ડિસેમ્બરે મહત્વની બેઠક

ટ્રમ્પનું આ નિવેદન એવા સમયે આવ્યું છે જ્યારે અમેરિકન ટ્રેડ પ્રતિનિધિઓનું એક ડેલિગેશન 10-11 ડિસેમ્બરે ભારતની મુલાકાતે આવી રહ્યું છે. આ બેઠક દરમિયાન બંને દેશો વચ્ચે ટેરિફ સંબંધિત અનેક મુદ્દાઓ પર ચર્ચા થવાની છે. હાલમાં અમેરિકા ભારતીય ચોખાની આયાત પર 50% ટેરિફ લગાવે છે.

શેરબજારમાં કંપનીઓનો હાલ

મંગળવારના શરૂઆતી કારોબારમાં KRBL લિમિટેડના શેરમાં 2% નો ઘટાડો જોવા મળ્યો, જ્યારે LT ફૂડ્સના શેરમાં 7% નો મોટો કડાકો બોલી ગયો, કારણ કે તેની અમેરિકન બજાર પર મોટી નિર્ભરતા છે.

આ પણ વાંચો- ભારતીય ચોખા પર ટ્રમ્પની તવાઈ? અમેરિકામાં ડમ્પિંગ રોકવા ટેરિફ લગાવવાના સંકેત, ખેડૂતો માટે 12 અબજ ડોલરનું પેકેજ જાહેર

ડિસ્ક્લેમર: અહીં આપેલી માહિતી માત્ર જાણકારીના હેતુ માટે છે. કોઈપણ રોકાણ નિર્ણય લેતા પહેલા પ્રમાણિત નાણાકીય સલાહકારની સલાહ લેવી અત્યંત જરૂરી છે.