CONCOR Q2 Results: સરકારી કંપનીને થયો 353 કરોડનો નફો, રોકાણકારો માટે પ્રતિ શેર 1.90 ડિવિડન્ડની જાહેરાત

CONCOR Q2 Results: સરકારી લોજિસ્ટિક્સ અને રેલ ટ્રાન્સપોર્ટેશન કંપની કન્ટેનર કોર્પોરેશન ઓફ ઈન્ડિયાએ નાણાકીય વર્ષ 2027 ના બીજા ક્વાર્ટર (સપ્ટેમ્બર ક્વાર્ટર) ના પરિણામો જાહેર કરી દીધા છે. આ ક્વાર્ટરમાં કંપનીનો ચોખ્ખો નફો વાર્ષિક ધોરણે 6.8% ઘટીને 353 કરોડ નોંધાયો છે, જે ગયા વર્ષે સપ્ટેમ્બર ક્વાર્ટરમાં 379 કરોડ હતો. જોકે, કંપનીની આવકમાં સામાન્ય વધારો જોવા મળ્યો છે અને કંપનીએ પોતાના શેરધારકો માટે વચગાળાના ડિવિડન્ડની પણ જાહેરાત કરી છે.

આવકમાં 1% નો વધારો, માર્જિન પર દેખાયું દબાણ

કંપનીના કામકાજમાંથી થતી આવક વાર્ષિક ધોરણે 1% વધીને 2,379 કરોડ થઈ છે, જે ગયા વર્ષના સમાન ગાળામાં 2,355 કરોડ હતી. બીજી તરફ કંપનીનો EBITDA 4.5% ઘટીને 550 કરોડ રહ્યો છે, જે એક વર્ષ પહેલા 576 કરોડ હતો. આ ઉપરાંત EBITDA માર્જિન પણ 25% થી ઘટીને 23% પર આવી ગયું છે, જે કંપનીના ઓપરેટિંગ પ્રદર્શન પર દબાણ દર્શાવે છે.

વોલ્યુમ ગ્રોથ કંપનીના ટાર્ગેટ કરતા પાછળ રહ્યો

સપ્ટેમ્બર ક્વાર્ટરમાં કંપનીએ 14.48 લાખ TEU કન્ટેનર હેન્ડલ કર્યા છે, જે ગયા વર્ષ કરતા માત્ર 0.53% જ વધારે છે. આ ગાળામાં EXIM વોલ્યુમ 0.1% ઘટ્યું છે, જ્યારે સ્થાનિક વોલ્યુમમાં 2.43% નો વધારો થયો છે. નાણાકીય વર્ષ 2027ના પ્રથમ છ મહિનામાં કુલ વોલ્યુમ 4.5% વધ્યું છે, જે કંપનીના આખા વર્ષના 18% ગ્રોથના લક્ષ્યાંક કરતા ઘણું ઓછું છે. પ્રથમ છ માસમાં EXIM વોલ્યુમ 4.6% અને સ્થાનિક વોલ્યુમ 4.2% વધ્યું છે, જ્યારે કંપનીએ તેના માટે અનુક્રમે 15% અને 25%નો ટાર્ગેટ રાખ્યો છે.

પ્રતિ શેર 1.90 ના ડિવિડન્ડની જાહેરાત, જાણો રેકોર્ડ ડેટ

નફામાં ઘટાડા વચ્ચે પણ CONCORના બોર્ડે રોકાણકારોને ભેટ આપતા બીજા વચગાળાના ડિવિડન્ડની જાહેરાત કરી છે. કંપની 5ની ફેસ વેલ્યુ ધરાવતા દરેક શેર પર 1.90 નું ડિવિડન્ડ આપશે. આ ડિવિડન્ડ પેટે કંપની કુલ 144.71 કરોડની ચુકવણી કરશે.

ડિવિડન્ડનો લાભ મેળવવા માટે કંપનીએ 11 નવેમ્બર 2026 ની 'રેકોર્ડ ડેટ' નક્કી કરી છે. નિયમ મુજબ જાહેરાતના 30 દિવસની અંદર એટલે કે 20 નવેમ્બર 2026 ના રોજ અથવા ત્યારબાદ રોકાણકારોને ડિવિડન્ડની ચુકવણી કરી દેવામાં આવશે. ઉલ્લેખનીય છે કે, મંગળવારે બજાર બંધ થયા બાદ કંપનીએ આ ત્રિમાસિક પરિણામો જાહેર કર્યા હતા. તે પહેલા BSE પર CONCOR નો શેર 1.07% ની તેજી સાથે 418.95 ના સ્તરે બંધ થયો હતો.

આ પણ વાંચો-Market Outlook: તેજી સાથે બંધ થયું શેરબજાર, 3 નવેમ્બરે સેન્સેક્સ-નિફ્ટીની કેવી રહેશે ચાલ?

ડિસ્ક્લેમર: આ માહિતી માત્ર જાણકારીના હેતુથી આપવામાં આવી છે. અહીં જણાવવું જરૂરી છે કે શેરબજારમાં રોકાણ એ બજારના જોખમોને આધીન છે. રોકાણકારોએ કોઈપણ જગ્યાએ નાણાં રોકતા પહેલા હંમેશા નિષ્ણાતની સલાહ લેવી જોઈએ. મનીકંટ્રોલ દ્વારા ક્યારેય પણ કોઈને રોકાણ કરવાની સલાહ આપવામાં આવતી નથી.