US-ઈરાન યુદ્ધની સીધી અસર: ક્રૂડ ઓઈલના ભાવમાં ભડકો, બ્રેન્ટ ક્રૂડ $75 ને પાર, જાણો લેટેસ્ટ અપડેટ

Crude Oil Price: અમેરિકા અને ઈરાન વચ્ચે વધી રહેલા સૈન્ય તણાવ અને યુદ્ધની પરિસ્થિતિને કારણે ગ્લોબલ માર્કેટમાં ક્રૂડ ઓઈલના ભાવમાં અચાનક મોટો ઉછાળો જોવા મળ્યો છે. હોર્મુઝ સ્ટ્રેટમાં કોમર્શિયલ જહાજો પર ઈરાનના હુમલા બાદ અમેરિકાએ જવાબી કાર્યવાહી કરતા તેલ બજારમાં ગભરાટ ફેલાયો છે, જેના કારણે બુધવારે કાચા તેલની કિંમતોમાં 2% જેટલો વધારો નોંધાયો છે.

ક્રૂડ ઓઈલના લેટેસ્ટ ભાવમાં કેટલી તેજી આવી?

WTI ક્રૂડ: ઓગસ્ટ ડિલિવરી માટેનું અમેરિકન બેન્ચમાર્ક 'વેસ્ટ ટેક્સાસ ઈન્ટરમીડિએટ' (WTI) ક્રૂડ 2.1% વધીને $71.87 પ્રતિ બેરલ પર પહોંચી ગયું છે.

બ્રેન્ટ ક્રૂડ: સપ્ટેમ્બર ડિલિવરી માટેનું ગ્લોબલ બેન્ચમાર્ક 'બ્રેન્ટ ક્રૂડ' 1.9% ના ઉછાળા સાથે $75.53 પ્રતિ બેરલની સપાટી વટાવી ગયું છે.

US સેન્ટ્રલ કમાન્ડના રિપોર્ટ મુજબ, અમેરિકાએ કોમર્શિયલ શિપિંગ પર થયેલા હુમલાનો જડબાતોડ જવાબ આપવા અને ઈરાનને પાઠ ભણાવવા માટે "તાકાતવર હુમલા" કર્યા છે. ઈરાનની મેહર ન્યૂઝ એજન્સીએ પણ હોર્મુઝ સ્ટ્રેટ પાસે આવેલા એક ટાપુ પર ધડાકા થયા હોવાની પુષ્ટિ કરી છે. આ ઉપરાંત, ઈરાનના ડેપ્યુટી વિદેશ મંત્રી કાઝમ ગરીબાબાદીએ ખુલ્લી ચેતવણી આપી છે કે ઈરાન આનો આકરો જવાબ આપશે.

બીજી તરફ, એક મોટો નિર્ણય લેતા US ટ્રેઝરીએ ઈરાનને તેલ એક્સપોર્ટ કરવા માટે આપેલી છૂટ પણ રદ કરી દીધી છે. આ નિર્ણયથી બંને દેશો વચ્ચે થયેલા શાંતિ કરારના નિયમો તૂટી ગયા છે.

દરિયાઈ માર્ગે વેપાર પર મોટો ખતરો

તાજેતરમાં આ વ્યૂહાત્મક જળમાર્ગમાં એક ગેસ કેરિયર અને સાઉદી ઓઈલ ટેન્કર સહિત કુલ 3 જહાજો પર હુમલા થયા છે. આ ઘટનાઓને કારણે મંગળવારનો દિવસ શિપિંગ ઈન્ડસ્ટ્રી માટે ખૂબ જ તણાવપૂર્ણ રહ્યો હતો. આ જિયોપોલિટિકલ ટેન્શનની સીધી અસર યુરોપિયન નેચરલ ગેસના ભાવ પર પણ પડી છે, જેના ફ્યુચર્સમાં 4.9% નો તોતિંગ ઉછાળો જોવા મળ્યો છે.

હોર્મુઝ સ્ટ્રેટ દુનિયાભરના ઓઈલ સપ્લાય માટે ખૂબ જ મહત્વનો રૂટ છે, જે ખાડી દેશોને ગ્લોબલ માર્કેટ સાથે જોડે છે. શાંતિના સમયે અહીંથી દુનિયાના રોજિંદા ઓઈલ ટ્રેડનો 5 મો ભાગ પસાર થાય છે. ઈરાને યુનાઈટેડ નેશન્સ (UN) ની શિપિંગ એજન્સીને કહી દીધું છે કે આ જળમાર્ગના કેટલાક ભાગો પર તેનો અધિકાર છે. આવા નવા હુમલાઓથી શિપિંગ કંપનીઓ આ રૂટનો ઉપયોગ કરતા ડરી રહી છે.

માર્કેટ એક્સપર્ટ્સનું શું માનવું છે?

આ ઘટનાઓ પહેલા ગોલ્ડમેન સૅક્સ જેવી મોટી બેન્કોએ અંદાજ લગાવ્યો હતો કે ઉત્પાદન વધવાથી અને શિપિંગ એક્ટિવિટી નોર્મલ થવાથી ક્રૂડ માર્કેટમાં સપ્લાય વધી શકે છે . આ જ સમયે OPEC+ પણ પ્રોડક્શનમાં કરેલો કાપ ધીમે ધીમે પાછો ખેંચવાની યોજના બનાવી રહ્યું હતું.

જોકે, હવે માર્કેટનું સ્ટ્રક્ચર સંપૂર્ણપણે બદલાઈ ગયું છે. બ્રેન્ટ ક્રૂડનો પ્રોમ્પ્ટ સ્પ્રેડ ફરીથી (બેકવર્ડેશન- એક બુલિશ માર્કેટ સ્ટ્રક્ચર જ્યાં ટૂંકા ગાળાના કોન્ટ્રાક્ટ પ્રીમિયમ પર ટ્રેડ થાય છે) માં જતો રહ્યો છે. બુધવારે આ સ્પ્રેડ 23 સેન્ટ પ્રતિ બેરલ હતો, જે અઠવાડિયાની શરૂઆતમાં જોવા મળેલા 25 સેન્ટના કોન્ટેન્ગોથી બિલકુલ વિરુદ્ધ છે.

આ પણ વાંચો-NSE IPO ને લઈને મોટા સમાચાર, આવતા મહિને SEBIની મંજૂરી મળવાની શક્યતા, સપ્ટેમ્બરમાં આવી શકે છે દેશનો સૌથી મોટો IPO