Voda-Ideaને મળી 23,000 કરોડની બમ્પર રાહત! 10 વર્ષ સુધી પૈસાની ચિંતા ખતમ, જાણો શેર પર શું થશે અસર?

Voda Idea News: આર્થિક સંકટ અને દેવાના ડુંગર નીચે દબાયેલી ટેલિકોમ કંપની વોડાફોન આઈડિયા (Vi) માટે ખૂબ જ સારા સમાચાર આવ્યા છે. લાંબા સમયથી મુશ્કેલીઓનો સામનો કરી રહેલી આ કંપનીને હવે શ્વાસ લેવાની ફૂરસદ મળી છે, કારણ કે સરકાર તરફથી તેને 23,000 કરોડથી વધુની માતબર રાહત આપવામાં આવી છે. આ ફેરફાર બાદ હવે કંપનીને આગામી ઘણા વર્ષો સુધી મોટું ફંડ ભેગું કરવાની જરૂર પણ નહીં રહે.

AGR બાકી રકમમાં થયો મોટો ઘટાડો

ટેલિકોમ વિભાગ (DoT) એ વોડાફોન આઈડિયાની ડિસેમ્બર 2025 સુધીની એજીઆર (Adjusted Gross Revenue) જવાબદારીમાં મોટો સુધારો કર્યો છે. અગાઉના અંદાજ મુજબ આ રકમ 87,695 કરોડ હતી, જે હવે ઘટાડીને 64,046 કરોડ કરી દેવામાં આવી છે. એટલે કે સીધો 23,649 કરોડનો ફાયદો કંપનીને થયો છે. સુપ્રીમ કોર્ટના નિર્દેશો બાદ સરકારે એજીઆર કેલ્ક્યુલેશન પર કંપનીની ફરિયાદોને ધ્યાને લેતા આ નિર્ણય લીધો છે.

પેમેન્ટ શેડ્યૂલમાં મળી મોટી છૂટછાટ

નાણાકીય વર્ષ 2032થી શરૂઆત: કંપનીએ આગામી ચાર વર્ષ સુધી વાર્ષિક ઓછામાં ઓછા 100 કરોડ ચૂકવવાના રહેશે.

લાંબા ગાળાનો સમય: બાકીની રકમ નાણાકીય વર્ષ 2036 થી 2041 સુધીમાં 6 સમાન હપ્તાઓમાં ચૂકવવાની રહેશે.

આનો સીધો અર્થ એ છે કે મોટા પેમેન્ટ હવે સીધા 10 વર્ષ પછી કરવાના હોવાથી કંપની પર કેશ ફ્લો (રોકડ પ્રવાહ)નું દબાણ ઘટી જશે. જે કંપની અત્યારે સ્પર્ધામાં ટકી રહેવા માટે સંઘર્ષ કરી રહી છે, તેના માટે આ સંજીવની સમાન છે.

શેરબજાર પર શું થશે અસર?

30 એપ્રિલના રોજ શેરબજાર બંધ થયું ત્યારે વોડાફોન આઈડિયાનો શેર 0.68% ના ઘટાડા સાથે 10.22 પર બંધ રહ્યો હતો. આજે મહારાષ્ટ્ર દિવસ નિમિત્તે બજાર બંધ છે, તેથી આ પોઝિટિવ સમાચારની સીધી અસર સોમવાર, 4 મે ના રોજ જ્યારે માર્કેટ ખુલશે ત્યારે જોવા મળી શકે છે. રોકાણકારોમાં આ સમાચારને લઈ ઉત્સાહ જોવા મળી રહ્યો છે.

છેલ્લા એક વર્ષમાં શેરની ચાલ

વોડાફોન આઈડિયાના શેરે છેલ્લા એક વર્ષમાં તેના લો લેવલથી જોરદાર રિકવરી બતાવી છે.

વર્ષનું લો લેવલ: 14 ઓગસ્ટ 2023 ના રોજ શેર 6.12 પર હતો.

વર્ષનું હાઈ લેવલ: માત્ર 4 મહિનામાં જ શેરે 109% નો જમ્પ લગાવી 31 ડિસેમ્બર 2023 ના રોજ 12.80 ની સપાટી વટાવી હતી.

ભારતીય ટેલિકોમ સેક્ટરમાં એરટેલ અને જીઓ સામે ટકી રહેવા મથતી વોડાફોન આઈડિયા માટે સરકારનો આ નિર્ણય ‘ટર્નિંગ પોઈન્ટ' સાબિત થઈ શકે છે. દેવામાં ઘટાડો અને પેમેન્ટ માટે મળેલી લાંબી મુદત કંપનીને તેનું નેટવર્ક સુધારવા અને 5G ના વિસ્તરણમાં મદદરૂપ થશે. હવે જોવાનું એ રહેશે કે શેરબજાર સોમવારે આ સમાચારને કેટલી ગંભીરતાથી લે છે.

આ પણ વાંચો- Gold Price Today: લેબર ડે પર સોનામાં ચમક વધી, ચાંદીના ભાવમાં મોટો ઘટાડો; જાણો અમદાવાદથી દિલ્હી સુધીના લેટેસ્ટ રેટ

ડિસ્ક્લેમર: Moneycontrol.com પર વ્યક્ત કરાયેલા મંતવ્યો નિષ્ણાતોના અંગત મંતવ્યો છે. આ માટે વેબસાઇટ અથવા મેનેજમેન્ટ જવાબદાર નથી. મની કંટ્રોલ યુઝર્સને કોઈપણ રોકાણ નિર્ણય લેતા પહેલા પ્રમાણિત નિષ્ણાતની સલાહ લેવાની સલાહ આપે છે.